Cydweithio diwydiannol arloesol yn galluogi Myfyrwyr Cyfrifiadura PCYDDS i arddangos eu sgiliau entrepreneuraidd

Mae myfyrwyr cyfrifiadura PCYDDS sy’n gweithio ar brosiectau grŵp Menter ac Arloesi wedi elwa o gydweithio gyda’r diwydiant mewn ffordd sydd wedi eu galluogi i ddatblygu eu sgiliau entrepreneuraidd.

Gofynnwyd i’r myfyrwyr greu datrysiadau arloesol i broblemau’r oes sydd ohoni drwy ddefnyddio technolegau cyfredol ac sy’n dod i’r amlwg a llwyddasant i gwblhau eu gwaith, er gwaethaf heriau’r cyfnod clo.

Meddai James Williams, Uwch Ddarlithydd Athrofa Gwyddoniaeth a Chelf y Brifysgol: “Mae ymgysylltu â diwydiant wedi bod yn amhrisiadwy i’r garfan hon o fyfyrwyr wrth rannu gwybodaeth am ddatblygiad ac arferion perthnasol cyfredol a helpu’r myfyrwyr i ddarganfod eu diddordebau cynhenid ysbrydoledig eu hunain. Mae partneriaid diwydiant wedi bod yn awyddus i ddangos eu cefnogaeth ar ffurf nawdd modwl, sgyrsiau dosbarth meistr, profiad gwaith a chyfleoedd gwaith.”

Ben Room, CEO BRDSports.co.uk oedd mentor y myfyrwyr. Meddai: “Roedd gweithio gyda myfyrwyr cyfrifiadura PCYDDS yn brofiad gwych, roeddynt yn broffesiynol, cwrtais ac yn parchu fy amser. Roedd y math o sgiliau y gallent eu cynnig yn arloesol ac yn chwa o awel iach. Roedd cael meddyliau a safbwyntiau newydd, modern ac ifanc yn ffocysu ar fy nghwmni yn fywiogus. Ar ddiwedd y prosiect mae’r tîm wedi cynhyrchu platfform defnyddiadwy ar gyfer fy nghwmni a hoffwn yn fawr iawn gallu parhau gyda’r gwaith hwn yn y dyfodol, ac yn sicr byddwn yn hapus i gydweithio ymhellach ar brosiectau’r flwyddyn nesaf.”

Ymhlith yr enghreifftiau o brosiectau mae:

• Band Gwybodaeth Feddygol sydd â sglodyn ynddo, i alluogi i barafeddygon neu ymarferwyr gofal iechyd i allu cyrchu gwybodaeth am gleifion yn rhwydd os nad oeddynt yn gwybod enw’r person neu eu hanes meddygol.
• Ap ffitrwydd sy’n galluogi i gyfranogion gwblhau heriau a chystadlu yn erbyn ffrindiau.
• Dod â siopa manwerthu i mewn i’r 21ain Ganrif – Trawsnewid papur yn dderbynebau digidol. O’r tu fewn i siopau, Apiau a gwefannau eFasnach ar-lein a’u hintegreiddio’n un cyfrif ‘banc’.
• Ap sy’n addysgu defnyddwyr i goginio mewn ffordd llawn hwyl ac unigryw, i greu prydau a phostio lluniau ar gyfryngau cymdeithasol, gan ennill mwy o bwyntiau trwy ymgysylltu.

Llongyfarchiadau arbennig hefyd i fyfyrwyr buddugol y gystadleuaeth Menter ac Arloesi gorau eleni, gan gynnwys Gemma Dunlop, a ddewiswyd gan Reolwr Entrepreneuriaeth Ifanc Llywodraeth Cymru, Ann Swift a Nyakamha Bright, a ddewiswyd gan James Lewis, Pennaeth y rhaglen Dechrau Busnesau Technegol yn yr Alacrity Foundation.

Meddai Ann Swift: “Rwyf wrth fy modd i weld bod myfyrwyr yn dal i allu cymryd rhan yn ddigidol yn y Gystadleuaeth Arloesi drwy gyflwyno ei hadroddiadau a chyflwyniad fideo i ddangos y sgiliau entrepreneuraidd a ffordd o feddwl roeddynt wedi’u datblygu yn ystod modwl y cwrs.  Er fy mod wedi gweld eisiau cwrdd â’r myfyrwyr a chlywed gan y cyflwyniadau grŵp roedd yn dal i fod yn bleser gennyf dderbyn detholiad o gyflwyniadau fideo unigol i’w beirniadu.  Roedd yn wych cael gweld sut roedd y myfyrwyr wedi mynd ati i ymgymryd â’u rolau o fewn y tîm gyda brwdfrydedd, gan gymryd perchenogaeth lawn o’u cyfrifoldebau i sicrhau llwyddiant y prosiectau a chyflwyno datrysiadau arloesol i fodloni anghenion briffiau’r cleient.  Cafodd cyflwyniadau’r myfyrwyr eu cyflwyno’n broffesiynol, gyda hyder ac eglurder, sydd ddim bob tro’n hawdd mewn amgylchedd technegol.  Rwy’n gobeithio bod y myfyrwyr wedi mwynhau’r modwl ac yn gallu cymryd eu sgiliau newydd ymlaen i brosiectau a gyrfaoedd yn y dyfodol, gyda nifer ohonynt yn cael eu hysbrydoli i ddechrau eu busnesau eu hunain yn y dyfodol.”

Meddai Mark Huntly, un o fyfyrwyr BSc Datblygu’r We: “Mae’r profiad wedi bod yn wych, mae creu tîm a chynhyrchu’r prosiect wedi bod yn ffantastig. Bu’r modwl yn un diddorol a oedd yn ennyn brwdfrydedd ac mae James wedi bod yn fentor gwych drwy’r cyfan, gan ddarparu cymorth a chyngor. Rwyf wir wedi mwynhau’r seminarau a ddarparwyd gan arbenigwyr y diwydiant.

“Rwy’n dwlu ar natur ymarferol y cwrs a bu’n wych i fyfyrwyr aeddfed fel fi i ehangu fy ngwybodaeth. Rwyf wedi lwyr fwynhau’r broses o ddysgu hyd yma yn ogystal â’r ochr ymchwilio.”

Meddai Gemma Dunlop: Roedd y prosiect yn cynnwys gweithio fel rhan o dîm o chwech i ddatblygu gwefan arloesol ar gyfer y cwmni BRD Sports. Cynigais fy hun yn arweinydd tîm a’m helpodd i ddysgu sgiliau newydd fel arweinyddiaeth, gwrando ar syniadau pobl eraill, sgiliau cyfathrebu, dibynadwyedd, datrys problemau a gwneud penderfyniadau.

“Roedd gweithio’n gydweithredol gyda’r myfyrwyr eraill yn fy nhîm yn brofiad gwych. Cafodd cyfeillgarwch cryf ei feithrin rhyngom wrth i ni weithio’n effeithiol tuag at ein nod cyffredin. Daethom i adnabod ein gilydd a dysgu oddi wrth ein gilydd. Galluogodd y prosiect i’r tîm ddangos eu sgiliau ac arddangos yr hyn y gallent ei wneud fel datblygwyr gwe. Helpodd y prosiect i fi gael profiad gwerthfawr o godio ymarferol ac mae wedi ychwanegu prosiect go iawn diddorol i’m portffolio, a fydd yn helpu iddo sefyll allan.

“Mae fy nghwrs wedi galluogi i mi gael gwybodaeth eang o godio sy’n hanfodol ar gyfer y byd gwaith go iawn. Mae wedi rhoi imi’r sgiliau, hyder a phrofiad sydd eu hangen i arwain at yrfa wych ym maes datblygu’r we.

“Dewisais gwrs Datblygu’r We yn PCYDDS am ei fod yn cynnwys dysgu sgiliau cyfrifiadura ymarferol yr wyf yn credu y byddant yn fwy tebygol yn ystadegol i arwain at gyflogaeth. Gyda chymaint o gystadleuaeth yn y farchnad swyddi ar hyn o bryd, roedd arna’i eisiau dewis llwybr gyrfaol sy’n ymestyn ac nid crebachu.”

Mae creadigrwydd ac arloesi wrth galon cenhadaeth Prifysgol Cymru Y Drindod Dewi Sant (PCYDDS) i wella cyflogadwyedd graddedigion a’r nifer o fusnesau newydd gan raddedigion. Ein nod yw defnyddio’r sgiliau, gwybodaeth a thechnoleg sydd gennym gyda’n gilydd i alluogi’r Brifysgol a’i graddedigion i gynnig atebion i’r heriau cymdeithasol pwysicaf – yng Nghymru a thu hwnt. Mae ein gweledigaeth yn cynnwys ymrwymiad cryf i adeiladu cymdeithas gynaliadwy sydd wedi ei gyrru gan arloesi ac entrepreneuriaeth.

Mae dysgu arloesol a chydweithio â diwydiant yn ffocws allweddol yn y Brifysgol, gan greu rhagor o gyfleoedd i fyfyrwyr wella eu gobeithion ar ôl graddio. Mae’r dull unigryw hwn o ddod â myfyrwyr, academyddion a busnesau at ei gilydd yn eu galluogi i archwilio syniadau a chreu cyfleoedd i ddatblygu busnesau, cynnyrch a gwasanaethau newydd, cynaliadwy.

Meddai James Williams: “Trwy’r modwl hwn, caiff myfyrwyr eu hannog i ddarganfod a chymhwyso eu brwdfrydedd a’u cryfderau cynhenid ac i weithio gyda chysylltiadau diwydiant a chymuned perthnasol i greu prototeipiau arloesol ac atebion i broblemau sy’n bwysig a perthnasol iddyn nhw a chymdeithas. 

“Mae’n galluogi cydweithredu rhyng-ddisgyblaethol ac yn dod â myfyrwyr at ei gilydd o 8 gwahanol raglen HND/Gradd Cyfrifiadura ac Electroneg. Nid yn unig y mae’n creu pont rhwng y rhaglenni academaidd mewnol ond hefyd gyda diwydiant allanol a sefydliadau cymunedol sy’n galluogi i fyfyrwyr ehangu eu sgiliau technegol a chyflogadwyedd trwy gydweithio â diwydiant yn y byd go iawn a gweithio ar heriau cyfredol. 

“Mae myfyrwyr wedi cael nawdd sbarduno i ddatblygu eu prototeipiau, wedi creu Cwmnïau Cychwyn Busnes Technoleg ac mae graddedigion lleol a gyflogwyd wedi cyfoethogi ffyniant, adfywio economaidd a chynaliadwyedd yr ardal.” 

• https://uwtsdcomputing.blog/2019/11/13/social-enterprise-business-technology-innovation/
• https://uwtsdcomputing.blog/2019/11/13/future-tech-solutions-dvlas-bothack-botathon/
• https://uwtsdcomputing.blog/2019/11/21/evolution-of-it-cloud-computing/
• https://uwtsdcomputing.blog/2020/03/04/visit-to-bt-test-centre/
• https://uwtsdcomputing.blog/2020/03/12/enterprise-masterclass-by-paul-harwood/

Cewch weld rhagor yma: https://www.uwtsd.ac.uk/cy/pwnciau/cyfrifiadura/

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau

Executive Press and Media Relations Officer

Cyfathrebu Corfforaethol a Chysylltiadau Cyhoeddus

Corporate Communications and PR

Tel: 01792 483695

Mobile: 07384 467071

Email: Rebecca.Davies@uwtsd.ac.uk