Y Brifysgol yn croesawu Songs of Praise i Gampws Llambed

Roedd Prifysgol Cymru Y Drindod Dewi Sant yn falch o groesawu rhaglen y BBC Songs of Praise i gampws Llambed yn ddiweddar. Bydd y rhaglen, a gyflwynir gan y soprano Katherine Jenkins ac a gynhyrchir gan Avanti Media a Nine Lives Media ar gyfer y BBC, yn cael ei darlledu ar 27 Chwefror am 13.15 ar BBC One ar gyfer Dydd Gŵyl Dewi.

Yr Athro Medwin Hughes, DL, Is-Ganghellor yn croesawu Kathryn Jenkins i gampws y Brifysgol yn Llambed

Mae campws Llambed y Brifysgol yn dathlu ei Ddaucanmlwyddiant eleni ac yn ystod y rhaglen bu Katherine Jenkins yn cyfweld â’r Athro Medwin Hughes, DL, Is-Ganghellor yn ogystal â myfyrwyr a staff ar y campws. Ymhlith y rhai a gyfwelwyd roedd tri myfyriwr o St Vincent a’r Grenadines sy’n rhan o grŵp o fyfyrwyr sydd wedi derbyn ysgoloriaeth i astudio yn y Brifysgol.

“Rwy’n falch iawn bod Songs of Praise wedi ymweld â’n campws yn ystod blwyddyn ein daucanmlwyddiant,” meddai’r Athro Medwin Hughes. “Sefydlwyd y campws fel Coleg Dewi Sant gan yr Esgob Thomas Burgess i ddarparu addysg ryddfrydol i ddynion ifanc sy’n hyfforddi i fod yn offeiriaid Anglicanaidd. Dros y ddau gan mlynedd diwethaf mae’r campws wedi datblygu enw byd-enwog am y Dyniaethau ac addysg ryngddiwylliannol ac aml-ffydd”.

Meddai cynhyrchydd y rhaglen, Charlotte Hindle, “Fe wnaethon ni fwynhau ein ymweliad â’r Brifysgol yn Llambed yn fawr.  Cawsom groeso gan y staff a’r myfyrwyr ac rydym yn falch iawn bod Songs of Praise wedi gallu bod yn rhan o ddathliadau’r daucanmlwyddiant.

Mae’r dathliad daucanmlwyddiant yn coffau sefydlu Coleg Dewi Sant, Llanbedr Pont Steffan ar 12 Awst 1822 drwy osod y garreg sylfaen sy’n nodi dechrau addysg uwch yng Nghymru.