Natasha Jones BA, MA

• BA mewn Addysg Blynyddoedd Cynnar
• MA mewn Gwaith Ieuenctid a Chymuned
• Siarad Cymraeg yn rhugl 
• Yn astudio ar gyfer Tyst Ôl-radd AU

Rwy’n chwarae rhan yn y broses o lunio a datblygu cynnwys modylau o fewn fy rôl bresennol fel darlithydd y Blynyddoedd Cynnar, gan gynllunio ar gyfer pob modwl unigol a chyfleu dibenion a dyheadau i fyfyrwyr.  

Mae f’ymrwymiad parhaus i gyfoethogiad proffesiynol yn amlwg drwy arfer, drwy adolygu cynlluniau gwersi a mynychu hyfforddiant pellach. Roeddwn i’n ffodus i weld â’m llygaid fy hun y dulliau addysgu a ddefnyddir yn Reggio Emilia, yr Eidal. Bu’r profiad hwn yn gymorth i mi ddatblygu fy ngallu i gefnogi’n well lunio ystyr i blant a phobl ifanc.

Gan fy mod yn dod o arfer Blynyddoedd Cynnar (ystod oed 0–8), rwyf bob amser wedi cydnabod pwysigrwydd partneriaeth lawn a chyfartal â theuluoedd, plant, a gweithwyr proffesiynol eraill.  Bu cydweithio â’r gweithwyr proffesiynol hynny a’r teuluoedd dan sylw’n fodd i mi hyrwyddo dysgu gan blant a’u datblygiad, gan adeiladu ar eu llwyddiant yn y dyfodol. 

Rwy’n hyblyg yn nhermau gweithio ar wahanol gampysau ac wedi bod yn teithio rhwng Caerfyrddin ac Abertawe ers dechrau gweithio yn y Brifysgol. Rwyf hefyd wedi addysgu grwpiau hyblyg rhan-amser, gan roi darlithoedd gyda’r hwyr ac yn achlysurol ar ddydd Sadwrn.  

Addysgeg chwarae

Mae fy mhrif ddiddordeb mewn chwarae a’i bwysigrwydd i ddatblygiad plant. Gyda fy nghydweithiwr, rwyf wedi dechrau ymchwilio i gyfleoedd am gyllid allanol gyda Chyngor Sir Penfro, am eu bod wedi dynodi y byddai ymarferwyr yn eu hardal yn cael budd o weld perthnasedd chwarae i addysg. Anogir cyfranogwyr i gymryd rhan mewn gweithgareddau dychmygus a chydweithredol, lle mae’r ffocws yn parhau ar archwilio, hwyl, arbrofi, a’r rhyddid i archwilio ffyrdd newydd o feddwl a rhyngweithio heb bwysau deilliant strwythuredig.  

Gan ddilyn ymlaen o lwyddiant yr hyfforddiant, rydym bellach yn trefnu sesiynau dilynol ynghylch arsylwi ac asesu i’r mynychwyr hynny. 

Coleg Cymraeg Cenedlaethol

Mae fy ngwaith prosiect yn y gorffennol hefyd wedi cynnwys gweithdai dysgu mewn partneriaeth â’r Coleg Cymraeg Cenedlaethol. Nod y gweithdai hyn oedd ehangu mynediad i fyfyrwyr o Gymru, yn y gobaith o gynyddu nifer y bobl ifanc oedd yn dod i mewn i addysg uwch. Bu hyn yn gymorth o ran rhoi sail ar gyfer f’ymchwil pellach mewn hyrwyddo ehangu mynediad a chyfle cyfartal mewn addysg uwch. 

Wythnos gyflogadwyedd 

Rwy’n helpu hefyd i redeg ein hwythnos gyflogadwyedd sydd â’r nod o wella gwybodaeth a hyder myfyrwyr er mwyn cynyddu eu sgiliau cyflogadwyedd. Yn gyffredinol, mae ein hwythnos gyflogadwyedd yn paratoi myfyrwyr am y farchnad swyddi a’u dyfodol drwy bontio’r bwlch rhwng eu hastudiaethau academaidd a sgiliau ymarferol chwilio am swyddi. Mae’r maes hwn o ddiddordeb i mi am fy mod i’n gallu helpu i wella canlyniadau myfyrwyr a chael gweld ein myfyrwyr yn llwyddo.  

Mae’r digwyddiad hefyd yn gyfle gwych i ryngweithio â gweithwyr proffesiynol eraill, sydd yn aml wedi arwain at gydweithio, darlithwyr gwadd a chipolwg sy’n cyfoethogi fy nealltwriaeth innau a phobl eraill o fewn y maes.  

Datgloi creadigrwydd drwy chwarae

Gweithdy newydd rwyf innau a chydweithiwr yn gweithio arno ar hyn o bryd yw datgloi creadigrwydd drwy chwarae. Yr amcanion yw deall y cysylltiad rhwng chwarae a chreadigrwydd a dysgu am dechnegau i gynnwys chwarae mewn arferion dyddiol neu amgylcheddau gwaith er mwyn meithrin creadigrwydd.