Canllawiau newydd Cymdeithas y Cyfreithwyr yn helpu cyfreithwyr i lywio cyfreithiau neilltuol Cymru a Lloegr

Mae Cymdeithas y Cyfreithwyr Cymru a Lloegr wedi cyhoeddi canllawiau newydd ar gyfer cyfreithwyr sy’n ymarfer yng Nghymru a Lloegr, wrth i ddeddfwriaeth sy’n benodol i Gymru esblygu a chreu fframweithiau gwahanol ar draws meysydd datganoledig. 

Datblygwyd y canllawiau gan Dr Bronwen Williams, pennaeth Ysgol y Gyfraith Abertawe ym Mhrifysgol Cymru Y Drindod Dewi Sant sydd hefyd yn aelod o Fwrdd Cenedlaethol Cymru Cymdeithas y Gyfraith

Er bod Cymru a Lloegr yn gweithredu o fewn un awdurdodaeth gyfreithiol, mae’r corff o ddeddfwriaeth benodol i Gymru wedi tyfu’n sylweddol ar draws meysydd datganoledig.

Mae’r nodyn ymarfer wedi’i gynllunio i helpu cyfreithwyr nodi pryd mae cyfraith Lloegr neu Gymru yn berthnasol, a sicrhau bod cleientiaid yn derbyn cyngor cywir sy’n adlewyrchu’r gyfraith sy’n berthnasol ym mhob cenedl. Mae meysydd cyfraith yn cynnwys:

Tai ac Eiddo – Mae gan Gymru a Lloegr reolau gwahanol ar drethiant, tai cymdeithasol a chyfrifoldebau tenantiaid a landlordiaid.

Addysg – Gwahanol fframweithiau statudol ar gyfer cefnogi plant a phobl ifanc ag anghenion dysgu ychwanegol (ADY) yng Nghymru ac anghenion addysgol arbennig neu anableddau (SEND) yn Lloegr.

Meddai Dr Bronwen Williams: “Mae’n hanfodol i gyfreithwyr sy’n ymarfer fod yn ymwybodol o’r meysydd allweddol sy’n cael eu datganoli a datblygu’r fframwaith cyfreithiol yng Nghymru. Mae’r Brifysgol yn gweithio gyda Chymdeithas y Gyfraith i dynnu sylw at bwysigrwydd deddfwriaeth ddatganoledig yng Nghymru. Fel prifysgolion, mae angen i ni ymgorffori’r wybodaeth hon yn ein rhaglenni, ac mae eisoes yn rhan sefydledig o gwricwlwm y gyfraith yn Ysgol y Gyfraith Abertawe.”

Meddai llywydd Cymdeithas y Cyfreithwyr, Mark Evans: “Gyda chyfraith Cymru yn parhau i ddatblygu, mae angen i gyfreithwyr fod yn wyliadwrus o’r gwahaniaethau rhwng Cymru a Lloegr o ran y fframwaith cyfreithiol. Er ein bod yn parhau i fod yn un awdurdodaeth, mae gwahaniaethau mewn meysydd fel eiddo ac addysg yn golygu goblygiadau gwirioneddol i ymarferwyr a chleientiaid. 

“Rwy’n byw yn agos at y ffin ac wedi gweithio mewn cwmni oedd yn gweithio ar ddwy ochr y ffin, felly rwy’n ymwybodol bod datblygu canllawiau yn hanfodol er mwyn cefnogi ein haelodau.

“Mae’r nodyn ymarfer hwn yn cefnogi ein safbwynt ‘Neilltuol, Nid Ar wahân’ trwy roi offeryn ymarferol i gyfreithwyr nodi’r fframwaith cyfreithiol cywir a darparu cyngor cywir lle bynnag y mae eu cleientiaid wedi’u lleoli.”

Meddai Mark Davies, cadeirydd Bwrdd Cenedlaethol Cymru: “Mae cyfraith Cymru wedi datblygu’n sylweddol ers cyflwyno datganoli. Mae deall lle mae’r gyfraith yn wahanol yn bwysig i gyfreithwyr sy’n gweithio yng Nghymru, Lloegr ac ar draws y ffiniau.

 “Mae’r canllawiau hyn yn gam i’w groesawu o ran dod â rhai o’r gwahaniaethau hynny at ei gilydd. Gyda chyfraith Cymru yn parhau i esblygu, rydyn ni’n gobeithio adeiladu ar y gwaith hwn ac edrych yn fanylach ar feysydd penodol o gyfraith ddatganoledig.”

Gwybodaeth Bellach

Eleri Beynon

Pennaeth
Cyfathrebu Corfforaethol a Chysylltiadau Cyhoeddus     
E-bost: e.beynon@pcydds.ac.uk     
Ffôn: 01267 676790