Cymorth ariannol i'ch helpu i lwyddo yn PCYDDS
Rydym yn deall y gall costau astudio fod yn wahanol i bob myfyriwr. Efallai y bydd angen cymorth arnoch gyda deunyddiau hanfodol ar gyfer eich cwrs, teithio i’r Brifysgol neu i leoliad, mynediad at dechnoleg, neu’r costau sy’n gysylltiedig â manteisio ar interniaeth neu gyfle cyflogadwyedd. Efallai hefyd y byddwch yn wynebu pwysau ariannol annisgwyl yn ystod eich astudiaethau.
Mae ein Fframwaith Bwrsarïau Cymorth i Fyfyrwyr yn dwyn ynghyd amrywiaeth o fwrsarïau wedi’u targedu a chymorth ariannol sydd wedi’u cynllunio i helpu myfyrwyr cymwys i oresgyn rhwystrau ariannol, talu costau astudio hanfodol a manteisio i’r eithaf ar gyfleoedd yn ystod eu cyfnod yn YDDS.
Cymorth ar gyfer gwahanol amgylchiadau
Mae amgylchiadau pob myfyriwr yn wahanol, a gall rhai myfyrwyr wynebu costau neu rwystrau ychwanegol wrth astudio.
Rydym yn croesawu’n arbennig geisiadau gan fyfyrwyr a allai wynebu rhwystrau ychwanegol, gan gynnwys myfyrwyr anabl a myfyrwyr ag anghenion dysgu ychwanegol, myfyrwyr sydd â phrofiad o fod mewn gofal, myfyrwyr sydd wedi ymddieithrio oddi wrth eu teuluoedd, gofalwyr sy’n oedolion ifanc, a myfyrwyr sy’n rhieni.
Fodd bynnag, gall heriau ariannol effeithio ar unrhyw un, ac rydym yn croesawu ceisiadau gan bob myfyriwr sy’n credu y gallai fodloni’r meini prawf cymhwysedd ar gyfer cymorth.
Pa gymorth sydd ar gael?
Mae PCYDDS yn cynnig amrywiaeth o fwrsarïau, dyfarniadau a chymorth ariannol i helpu myfyrwyr cymwys gyda chostau ychwanegol, pwysau ariannol a rhwystrau y gallent eu hwynebu yn ystod eu hastudiaethau.
Bwrsariaethau Cymorth Ariannol
Bwrsari Adnoddau Cwrs
Cymorth tuag at ddeunyddiau cwrs gorfodol cymwys, offer a chostau cwrs hanfodol eraill.
Cronfa Cymorth Ariannol i Fyfyrwyr
Cymorth ariannol i fyfyrwyr sy’n wynebu caledi ariannol sylweddol neu annisgwyl yn ystod eu hastudiaethau.
Allech chi fod yn gymwys?
Nid yw ein bwrsarïau’n cael eu dyfarnu’n awtomatig. Bydd angen i chi wneud cais am y cymorth sy’n berthnasol i chi a dangos eich bod yn bodloni’r meini prawf cymhwysedd.
Er mwyn cael eich ystyried ar gyfer bwrsari PCYDDS, rhaid i chi:
- Fod wedi cofrestru yn PCYDDS yn ystod y flwyddyn academaidd gyfredol;
- Fod yn astudio o leiaf 40 credyd academaidd ym mlwyddyn y cais; a
- Bod eich ffioedd dysgu’n cael eu talu’n uniongyrchol i PCYDDS.
Mae gan bob bwrsari ei feini prawf cymhwysedd ei hun, ac mae rhai ar gael i grwpiau penodol o fyfyrwyr yn unig neu ar gamau penodol o’u hastudiaethau.
Rydym yn eich annog i edrych ar y cymorth sydd ar gael a gwirio’r meini prawf cymhwysedd unigol i weld pa gymorth a allai fod ar gael i chi.
Sut i wneud cais
Gwneir ceisiadau am fwrsarïau a chymorth ariannol PCYDDS drwy Ap Hwb.
Gall myfyrwyr presennol sydd wedi cofrestru ddefnyddio Ap Hwb i:
- Edrych ar y bwrsarïau a’r cymorth ariannol sydd ar gael;
- Gwirio’r meini prawf cymhwysedd llawn ar gyfer pob bwrsari;
- Cael gwybod pa dystiolaeth y gallai fod angen ei darparu; a
- Dod o hyd i wybodaeth am sut i wneud cais.
Edrychwch ar y bwrsarïau a gwnewch gais drwy Ap Hwb
Os yw cost astudio, eich amgylchiadau personol neu bwysau ariannol annisgwyl yn creu rhwystr, rydym yn eich annog i edrych ar y cymorth sydd ar gael a gwirio a allech fod yn gymwys.
Ddim yn siŵr pa gymorth sy'n iawn i chi?
Os nad ydych yn siŵr pa fwrsari neu gymorth ariannol a allai fod yn berthnasol i’ch amgylchiadau, neu a allech fod yn gymwys, mae tîm Cymorth Ariannol / Hwb Myfyrwyr yma i helpu. Gallant eich helpu i ddeall y cymorth sydd ar gael, edrych ar eich opsiynau a’ch cyfeirio at y cymorth priodol.