O Fyfyriwr Ffilm i Addysgwr y Dyfodol: Lewis Evans yn Dod o Hyd i'w Bwrpas yn UWTSD

Pan ddaeth Lewis Evans i UWTSD am y tro cyntaf yn 2020, roedd yn cymryd cam o ffydd. Ar ôl cael trafferth yn yr ysgol ac heb ystyried prifysgol fel opsiwn erioed, cofrestrodd ar y rhaglen BA Ffilm a Theledu yn dilyn colli ei swydd manwerthu yn ystod pandemig COVID-19. Roedd dewis astudio rhywbeth yr oedd yn wirioneddol angerddol yn ei gylch yn drobwynt iddo.

Ar ôl graddio yn 2023, dychwelodd Lewis i fyd manwerthu tra’n parhau i ddilyn ei ddiddordeb mewn gwneud ffilmiau. Gan ei fod eisiau gyrfa a oedd yn cyfuno ei ddiddordebau creadigol â synnwyr cryfach o bwrpas, dychwelodd i UWTSD yn 2025 i astudio’r Dystysgrif Graddedig Broffesiynol mewn Addysg ar gyfer Addysg a Hyfforddiant Ôl-orfodol (PCET). Heddiw, mae’n graddio am yr ail dro!

“Roeddwn i eisiau dod o hyd i’m ‘pam’,” eglura Lewis. “Roeddwn i wedi gweithio’n galed ym mhob swydd a gefais, ond roeddwn i eisiau dod o hyd i rywbeth a oedd yn teimlo’n ystyrlon. Fe wnaeth hyfforddi cydweithwyr yn y gwaith fy ngwneud i sylweddoli y gallai addysgu fod y yrfa yr oeddwn i’n chwilio amdani.”

Denwyd Lewis at y rhaglen PCET oherwydd y cydbwysedd rhwng theori ac addysgu ymarferol, y garfan fach a chefnogol, a’r cyfle i gwblhau lleoliad dysgu o 100 awr. Dewisodd wneud ei leoliad ar y cwrs BA Ffilm a Theledu yr oedd wedi’i astudio’n flaenorol; rhoddodd hyn y cyfle iddo ddychwelyd fel darlithydd a chefnogi myfyrwyr oedd yn dilyn llwybr tebyg.

Daeth ei leoliad yn gyflym yn un o uchafbwyntiau’r cwrs.

“Roedd hi’n hynod werth chweil teimlo fy mod wedi cael effaith gadarnhaol wirioneddol ar y myfyrwyr roeddwn i’n eu dysgu. Rwy’n wirioneddol falch o’r adborth a’r diolch a dderbyniais.”

Mae Lewis hefyd yn priodoli’r profiad cadarnhaol hwn i’r gefnogaeth a gafodd gan ei fentoriaid a’i gyd-fyfyrwyr. Fe wnaeth cyfleoedd datblygu proffesiynol drwy gydol y cwrs – gan gynnwys hyfforddiant ar gefnogaeth iechyd meddwl, cymorth cyntaf mewn argyfwng, dysgu gyda chymorth technoleg ac archwilio dulliau rhyngwladol o addysgu – ehangu ei sgiliau a’i hyder ymhellach.

Fel rhan o fodiwl ymchwil gweithredu’r rhaglen, ymchwiliodd Lewis i sut mae dewisiadau gwahanol ddysgwyr yn dylanwadu ar ddisgwyliadau myfyrwyr o addysgu prifysgol. Drwy addasu ei wersi i roi mwy o bwyslais ar weithgareddau ymarferol cyn cyflwyno theori, gwelodd welliant amlwg yn y ffordd yr oedd myfyrwyr yn ymgysylltu; profiad a ysbrydolodd ef i barhau i archwilio ymchwil addysgol o fewn disgyblaethau creadigol fel gwneud ffilmiau ac ysgrifennu creadigol.

Roedd cydbwyso gwaith academaidd â chyflogaeth ac ymrwymiadau personol yn un o’r heriau mwyaf a wynebodd Lewis, yn ogystal â goresgyn ‘syndrom y twyllwr’ (imposter syndrome). Helpodd rhannu aseiniadau yn dasgau llai, cyraeddadwy a gwneud defnydd llawn o’r gefnogaeth a gynigiwyd gan diwtoriaid ef i gadw ar y trywydd iawn.

“Roedd y mentoriaid yn hynod gefnogol, yn broffesiynol ac yn bersonol. Byddwn yn annog unrhyw un sy’n cael trafferth yn y brifysgol i ofyn am gymorth a defnyddio’r gefnogaeth sydd ar gael; peidiwch â dioddef yn ddistaw.”

Talodd gwaith caled Lewis ar ei ganfed pan gyflawnodd y radd ‘Rhagoriaeth’ (Distinction) yr oedd wedi’i gosod fel nod personol.

Wrth edrych yn ôl, mae’n disgrifio rhaglen PCET fel y cwrs mwyaf heriol yn academaidd y mae wedi’i wneud, ond hefyd fel y mwyaf gwerth chweil.

“Mae’r rhaglen wedi fy helpu i ddatblygu’r hyder a’r sgiliau i arwain dosbarth a chreu amgylcheddau dysgu cadarnhaol. Rwy’n gwybod bod gen i lawer i’w ddysgu o hyd, ond rwyf bellach yn teimlo’n barod i ddilyn gyrfa ym maes addysg.”

Wrth chwilio am gyfleoedd dysgu ar hyn o bryd, mae Lewis yn bwriadu parhau i ddatblygu ei arferion addysgu a’i angerdd dros wneud ffilmiau. Mae hefyd yn dysgu Cymraeg, gyda’r nod o annog darpar fyfyrwyr sy’n gwneud ffilmiau i ddathlu eu hunaniaeth Gymreig drwy eu gwaith creadigol.

“Byddwn yn argymell rhaglen PCET yn gryf i unrhyw un sy’n ystyried gyrfa ym maes addysg ôl-orfodol. Mae’n rhaglen ddiddorol a heriol, ac yn llawn cyfleoedd ar gyfer datblygiad personol a phroffesiynol. Mae’r gefnogaeth gan y staff wedi bod yn rhagorol, ac mae’n brofiad sydd wedi trawsnewid fy hyder a’m huchelgeisiau gyrfaol yn wirioneddol.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071