Dyfarnu Gwobr y Brenin am Wasanaeth Gwirfoddol i Fyfyrwyr Dylunio Set a Chynhyrchu PCYDDS

Mae Gwobr Y Brenin am Wasanaeth Gwirfoddol (KAVS) wedi’i dyfarnu i fyfyrwyr cwrs BA Dylunio Set a Chynhyrchu Prifysgol Cymru Y Drindod Dewi Sant mewn cydnabyddiaeth am eu gwaith prosiect a gwirfoddoli gydag Opera Ieuenctid Caerfyrddin a’r Cylch.

Mae’r wobr, a grëwyd yn 2002, wedi dathlu gwaith amhrisiadwy grwpiau gwirfoddoli’r DU ers nifer o flynyddoedd. Mae’n gyfwerth ag MBE, a hon yw’r wobr uchaf y gellir ei rhoi i grwpiau gwirfoddol lleol, ac fe’i dyfernir am oes. Fe’i rhoddir i grwpiau sy’n gwneud gwahaniaeth yn eu cymuned leol.

Mae Opera Ieuenctid Caerfyrddin a’r Cylch, a gydnabuwyd am y cyfleoedd theatr gerddorol a roddir i bobl ifanc yng Ngorllewin Cymru, wedi agor eu gwobr i gyn-wirfoddolwyr a gwirfoddolwyr cyfredol sydd wedi bod yn gweithio gyda’r cwmni er mwyn cael eu cydnabod hefyd. Mae cwrs Dylunio Set a Chynhyrchu PCYDDS wedi bod yn cydweithio gyda’r Opera Ieuenctid yn flynyddol ar eu sioeau trwy ddylunio darnau eiconig o olygfa fel y ddraig, o’r enw Elizabeth, ar gyfer eu cynhyrchiad o ‘Shrek’ y llynedd, a’r car ar gyfer cynhyrchiad eleni, sef ‘Our House’.

Gwobrwywyd myfyrwyr yr ail flwyddyn am eu gwaith ar gynhyrchiad nesaf OICC, sef ‘Our House’, a gwobrwywyd myfyrwyr y drydedd flwyddyn am eu gwaith llynedd ar y cynhyrchiad ‘Shrek’. Cyflwynwyd iddynt fathodynnau i gydnabod eu gwobr gan Mike Rogers a Wyn Davies o Opera Ieuenctid Caerfyrddin a’r Cylch ar ddiwedd mis Ionawr.

Meddai Dr Peter Spring, Cyfarwyddwr Academaidd Dylunio a Diwydiannau Perfformio WISA:

“Rwy’n eithriadol o falch o gyrhaeddiad anhygoel ein myfyrwyr Dylunio Set a Chynhyrchu, ar gampws Caerfyrddin. Mae ennill gwobr o’r fath mor gynnar yn eu gyrfaoedd yn gampus ac rwy’n gobeithio y bydd yn rhoi hyd yn oed mwy o hyder iddynt yn eu talent a’u hymroddiad.

Hoffwn hefyd fanteisio ar y cyfle hwn i longyfarch a lleisio fy edmygedd parhaus o’m cydweithwyr academaidd sy’n mynd tu hwnt i’r disgwyl i gefnogi a meithrin ein holl fyfyrwyr – dyma ffrwyth eu llafur hwythau hefyd.”

Mae’r myfyrwyr yn teimlo ei fod yn fraint i dderbyn y wobr hon. Meddai Taylor Dyderski, myfyriwr trydedd flwyddyn Dylunio Set a Chynhyrchu:

“Rydych chi’n teimlo’n lwcus iawn a bod pobl yn ymddiried ynoch chi pan gewch chi gyfleoedd allanol i weithio mewn diwydiant oherwydd er eu bod yn gwybod mai myfyriwr ydych chi, maen nhw’n rhoi llawer o ymddiriedolaeth a pharch i chi, sy’n magu’ch hyder. Roeddwn hefyd yn ffodus i gael bod yn rhan o Shrek the Musical yn rheolwr llwyfan; roeddwn i’n falch iawn, ac wrth fy modd eu bod yn ymddiried cymaint ynof i.

Ychwanega Caitlin Fox, myfyriwr arall yn ei thrydedd flwyddyn:

“Roedd yn cŵl iawn gallu adeiladu ar gyfer cynhyrchiad go iawn a ninnau ond yn ail flwyddyn ein gradd. Cawsom ddefnyddio gwahanol ddefnyddiau nad ydym wedi’u defnyddio o’r blaen, fel cerfio polystyren, gorchuddio â resin a’r gwahanol baentiau i’w greu. Roedd yn ddiddorol iawn, ac roedd yn wych cael y cyfle.”

Meddai Sam Measor, myfyriwr yn ei ail flwyddyn ar y rhaglen Dylunio Set a Chynhyrchu sy’n gweithio ar gynhyrchiad Our House:

“Mae cael briff byw ar gyfer cleient proffesiynol yn lot o bwysau, ond pwysau da. Mae’n lot o hwyl cael prosiect rydym ni’n ei weld o’i gychwyn i’r cynnyrch gorffenedig ar y llwyfan”.

Ychwanega Abby Poyner, myfyriwr yn ei hail flwyddyn:

“Dydw i erioed wedi gwneud unrhyw beth fel hyn o’r blaen, bu llawer o ddatrys problemau, ond mae gwneud rhywbeth fel hyn wedi bod yn gyffrous, oherwydd eich bod yn gweithio tuag at rywbeth sy’n mynd i fod ar lwyfan. Rydych chi’n teimlo’n falch ac yn meddwl ‘wow, rydw i’n gwneud rhywbeth sy’n mynd i gael ei ddangos i bobl eraill’ ac rydw i’n wastad wedi meddwl ‘ys gwn i bwy wnaeth y darn yna o set’ a nawr, ni fydd wedi!”

Stacey-Jo Atkinson, Cyd-reolwr Rhaglen y BA Dylunio Set a Chynhyrchu

“Rydym yn eithriadol o falch o’r gwaith mae ein myfyrwyr yn ei gynhyrchu, maent i gyd yn ymroddedig, yn benderfynol a phroffesiynol o ran eu hymagwedd at eu gwaith. Mae gallu rhoi profiadau o’r diwydiant go iawn i’r myfyrwyr wrth iddynt astudio yn rhan allweddol o’r rhaglen ac yn rhan annatod o helpu iddynt adeiladu eu set sgiliau, hyder a chysylltiadau â’r diwydiant.

“Diolch enfawr i chi Mike, Wyn a holl gwmni OICC am gydweithio gyda ni ac ymddiried yn ein myfyrwyr i gynhyrchu gwaith o ansawdd ar gyfer eu cynyrchiadau. Rydym yn gwerthfawrogi’r berthynas waith, ac mae’n un sydd wedi caniatáu i lawer o fyfyrwyr gael gwybodaeth am weithio gydag amrywiaeth o ddefnyddiau newydd, gweithio gydag ymarferwyr y diwydiant a chael profiad cefn llwyfan gwerthfawr yn ystod y sioeau.”

Mae Our House (sioe gerdd Madness) yn cael ei dangos yn Theatr y Lyric, Caerfyrddin o 14eg–17eg Chwefror.

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476