PCYDDS yn Cymeradwyo Pennaeth am Effaith Eithriadol ar Lesiant Staff mewn Addysg Gynradd

Mae adran Arfer Proffesiynol Prifysgol Cymru Y Drindod Dewi Sant (PCYDDS) yn falch i ddathlu’r effaith anhygoel mae Ceri Littlewood, Pennaeth Ysgol Gynradd Yr Hengastell, Pen-y-bont ar Ogwr, wedi’i gael ar gymuned ei hysgol ar ôl iddi gwblhau ei MA mewn Arfer Proffesiynol.

Nid yn unig y mae ymrwymiad Ceri i lesiant ac iechyd meddwl staff addysg gynradd wedi trawsnewid ei dull arweinyddiaeth ei hun ond mae hi hefyd wedi creu effaith tonnog cadarnhaol ymhlith ei staff.

Mae ei phrosiect dysgu seiliedig ar waith, o’r enw ‘How Can We Support Staff Well-being and Mental Health in Primary Education?’ yn dangos ei hymrwymiad i greu amgylchedd cefnogol a meithringar ar gyfer addysgwyr. Mae’r prosiect wedi cyfrannu mewnwelediadau gwerthfawr i’r drafodaeth academaidd ac wedi dylanwadu’n uniongyrchol ar y mentrau llesiant a weithredir yn ei hysgol.

Yn ei thysteb deimladwy, lleisiodd Ceri ei diolch, gan ddweud:

“Mae fy amser yn y brifysgol wedi bod yn eithriadol, ac mae’r Fframwaith Arfer Proffesiynol wedi ychwanegu gwerth enfawr at fy nhaith addysgol.

“Gwnaeth y cwrs ddarparu dealltwriaeth gynhwysfawr o ddamcaniaethau, ymchwil ac arferion gorau cysylltiedig â llesiant staff. Trwy astudiaethau achos a chymwysiadau byd go iawn, cefais fewnwelediadau gwerthfawr i weithrediad strategaethau i gyfoethogi morâl staff, rheoli straen, a meithrin diwylliant cydweithredol a chefnogol o fewn y gymuned ysgol. Caniataodd y dull ymarferol hwn i mi drosi cysyniadau damcaniaethol yn fentrau gweithredadwy.”

Penderfynodd Ceri gofrestru ar y cwrs Arfer Proffesiynol am ei fod yn darparu amserlen hyblyg oedd yn caniatáu iddi barhau yn ei swydd wrth ddilyn cymhwyster addysg uwch. Meddai:

“Trwy ddewis y cwrs hwn, gallwn i gymhwyso’r hyn rwy’n ei ddysgu yn fy ngwaith bob-dydd. Mae cymhwyso’r wybodaeth yn uniongyrchol yn gwneud y profiad dysgu’n fwy perthnasol ac yn fanteisiol ar unwaith i’m gyrfa.

“Mae bod yn rhan o raglen Arfer Proffesiynol yn darparu cyfleoedd rhwydweithio ardderchog. Cefais gyfle i ryngweithio gydag ymarferwyr proffesiynol eraill sydd ag amrywiaeth o brofiadau a safbwyntiau. Bu’r rhwydweithio hwn yn werthfawr i’m twf academaidd a phroffesiynol.”

Ychwanega:

“Mae’r cwrs wedi effeithio’n gadarnhaol ar yr ysgol trwy gyfrannu at amgylchedd gwaith mwy positif a chynhyrchiol. Trwy weithredu’r strategaethau a ddysgwyd yn ystod y rhaglen meistr, gwelsom gynnydd mewn boddhad staff a gwell morâl cyffredinol. Yn ei dro, mae hyn yn darparu rhyngweithiadau cryfach gyda phobl.”

Mae’r cwrs wedi gwella sgiliau arweinyddiaeth a rhyngbersonol Ceri.

“Mae wedi rhoi i mi wybodaeth ac offer i fynd i’r afael â heriau sy’n gysylltiedig â llesiant staff yn effeithiol. Rwyf wedi dod yn fwy abl wrth feithrin cymuned gefnogol yn yr ysgol, ac mae’r profiad wedi dyfnhau fy ymrwymiad i hyrwyddo llesiant addysgwyr ac, yn ei dro, llwyddiant ein disgyblion.

Amlygodd Ceri ymrwymiad y Brifysgol i ddarparu profiad addysgol holistaidd, sy’n cyfuno gwybodaeth ddamcaniaethol gyda chymhwysiad ymarferol. Pwysleisiodd y gefnogaeth a’r arweiniad eithriadol a gafodd trwy gydol ei thaith, gan ganmol aelodau’r gyfadran am fod yn fentoriaid oedd wir yn poeni am ei datblygiad. Ychwanega:

“Anogodd strwythur y Fframwaith Arfer Proffesiynol gydweithio a gwaith tîm, gan feithrin ymdeimlad o gymuned ymhlith cyd-ymarferwyr proffesiynol addysg. Roedd dysgu gan fy nghymheiriaid ac ochr yn ochr â nhw yn fy ysbrydoli, ac roedd gan bob un ohonynt safbwynt a set o sgiliau unigryw.”

Meddai Lowri Harris, Rheolwr Rhaglen y ddarpariaeth Arfer Proffesiynol:

Mae ymrwymiad Ceri i lesiant ei staff i’w ganmol. Nid yn unig mae ei gwaith yn dangos effaith y Fframwaith Arfer Proffesiynol ond hefyd mae’n adlewyrchu cenhadaeth y Brifysgol i rymuso addysgwyr gyda’r wybodaeth a sgiliau sydd eu hangen ar gyfer newid positif.

“Mae Prifysgol Cymru Y Drindod Dewi Sant yn estyn ei llongyfarchiadau i Ceri, ac yn cydnabod yr effaith arwyddocaol mae hi’n parhau i’w chael ym maes addysg gynradd.”

Mae’r tîm yn cynnal gweminar ym mis Chwefror, felly os hoffech ddysgu rhagor am y posibiliadau o fewn y Fframwaith Ymarfer Proffesiynol, e-bostiwch ppf@pcydds.ac.uk, neu ffoniwch 01267 676882.

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476