Cyhoeddi enwau’r rhai sydd yn Rownd Derfynol Cystadleuaeth Cogydd Ifanc, Gweinydd Ifanc a Chymysgydd Ifanc Cymru 2025

Mae sêr y dyfodol yn y maes lletygarwch yng Nghymru yn paratoi i ddod i amlygrwydd yn Stadiwm Swansea.com

Mae  Prifysgol Cymru Y Drindod Dewi Sant (PCYDDS) wedi cyhoeddi enwau’r cystadleuwyr talentog sydd wedi cyrraedd rownd derfynol cystadleuaeth Cogydd Ifanc, Gweinydd Ifanc a Chymysgydd Ifanc Cymru 2025, sydd i’w chynnal yn fyw yn Stadiwm Swansea.com ddydd Llun, 22 Medi.

Bydd y digwyddiad mawreddog, sy’n arddangos goreuon y dalent newydd sy’n datblygu yn y maes lletygarwch  yng Nghymru, yn gweld cogyddion, gweinyddwyr a chymysgwyr ifanc o dan 28 oed yn cystadlu am y teitlau cenedlaethol mawr eu bri – a chyfle i gynrychioli Cymru ar lwyfan y byd.

Mae’r gystadleuaeth yn adlewyrchu  ymrwymiad ehangach PCYDDS i gyfuno astudiaethau academaidd â phrofiad yn y diwydiant. Mae’r rhaglenni Rheolaeth Lletygarwch a Thwristiaeth y Brifysgol, gan gynnwys Rheolaeth Gastronomeg Ryngwladol, Rheolaeth Lletygarwch a Gwestai, a Rheolaeth Digwyddiadau a Gwyliau Rhyngwladol, wedi’u cynllunio i roi gwybodaeth ddamcaniaethol ac arbenigedd ymarferol i fyfyrwyr. Mae cystadlaethau fel Cogydd Ifanc, Gweinydd Ifanc yn cynnig enghraifft fyw o’r modd mae dysgu yn yr ystafell ddosbarth yn cysylltu ag arfer y byd go iawn, gan roi cyfle i bobl ifanc brofi eu sgiliau, adeiladu rhwydweithiau, a pharatoi ar gyfer gyrfaoedd gwerth chweil mewn lletygarwch.

Y rhai sydd wedi cyrraedd y rownd derfynol eleni yw:

Cogydd

• Rob Griffiths – Penmaenuchaf
• Jordan Newton – Beach House
• Edward Junaidean – Thomas
• Tia Davies – The Welsh House, Neath

Cogydd

• Joseph Young – Swansea.com
• Arwen Garland – PCYDDS / Swansea.com
• Bronte Lorimer – Beach House
• Ruby Westwood – The Welsh House, Abertawe

Cymysgydd

• Adhwaith Chandra – Browns, Caerdydd
• Charlotte Malin – Lab 22, Caerdydd
• Bethany Fawkes – Sant Ffraid House, The Oldwalls Collection
• Ellen Budd – Penny, Caerdydd

Y dasg i’r rhai sydd yn y rownd derfynol fydd creu argraff ar banel o feirniaid sy’n arwain yn y diwydiant trwy gyfres o heriau ymarferol a gynlluniwyd i brofi eu creadigrwydd, eu sgiliau technegol a’u proffesiynoldeb.

Adeiladu ar lwyddiant  y llynedd

Yng nghystadleuaeth Cymru yn 2024, coronwyd y canlynol:

Cogydd Ifanc: Alex Dunham o The Whitebrook, Trefynwy

Gweinydd Ifanc: Jack Williams o Westy Penmaenuchaf, Dolgellau

Cymysgydd Ifanc: James Borley o The Dead Canary, Caerdydd

Aeth y tri ohonynt ymlaen i gynrychioli Cymru yn rowndiau terfynol Cogydd Ifanc, Gweinydd Ifanc y Byd yn Singapore, lle gwnaethant arddangos eu doniau ar lwyfan rhyngwladol. Ymhlith y rhai ddaeth yn agos at y brig y llynedd roedd Dalton Weir o The Toad (Cogydd), Enes Hatipoglu o The Celtic Collection (Gweinydd), ac Ellen Budd o Penny (Cymysgydd), sy’n dychwelyd i’r gystadleuaeth eleni i gystadlu eto am y teitl.

Wrth adfyfyrio ar lwyddiant y llynedd, dywedodd Dr Jayne Griffith-Parry, Cyfarwyddwr Academaidd y cyrsiau Rheolaeth Lletygarwch a Thwristiaeth yn PCYDDS, ac arweinydd y gystadleuaeth dros Gymru:

“Unwaith eto, rydym yn falch iawn o ddathlu’r dalent anhygoel yn sector lletygarwch Cymru. Mae’r gystadleuaeth nid yn unig yn darparu llwyfan i’r gweithwyr proffesiynol ifanc hyn ddisgleirio ond hefyd yn dangos cryfder diwylliant bwyd a diod Cymru, sydd wedi’i wreiddio mewn cynnyrch lleol a chreadigrwydd o’r radd flaenaf.”

Arddangosfa ar gyfer lletygarwch Cymreig

Wedi’i sefydlu yn 1979, mae’r gystadleuaeth Cogydd Ifanc, Gweinydd Ifanc wedi dod yn gonglfaen calendr lletygarwch y DU. Mae rowndiau terfynol Cymru, a gynhelir gan PCYDDS, hefyd yn pwysleisio arferion cynaliadwy ac ysbryd cymunedol, gyda’r cynnyrch sydd dros ben o’r gystadleuaeth yn cael ei roi i Dŷ Matthew yn Abertawe, sy’n cefnogi pobl agored i niwed yn y ddinas.

Gyda chefnogaeth gan bartneriaid yn y diwydiant gan gynnwys Neft Vodka, Compass Cymru, Castell Howell, Mor Ladron Rum, Swansea Fish, Towy Fish & Game a  Gwesty’r Village, Abertawe, mae’r  gystadleuaeth yn tynnu sylw at yr ymdrech gydweithredol sy’n gyrru lletygarwch yng Nghymru yn ei flaen.

Wrth i’r edrych ymlaen gynyddu ar gyfer y rowndiau terfynol byw yr wythnos nesaf, bydd y sylw i gyd ar Stadiwm Swansea.com i weld pwy fydd yn cipio’r teitlau ac yn dilyn ôl troed pencampwyr y llynedd.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071