Cystadleuaeth E-chwaraeon yn anelu at ysbrydoli pobl ifanc

Mae ysgolion yn Sir Gaerfyrddin yn cymryd rhan mewn cystadleuaeth eChwaraeon ac yn dysgu am y diwydiant gemau a’i broffesiynau perthynol ar yr un pryd.

Mae’r gystadleuaeth Gaming Heroes yn rhan o gyfres o weithdai dydd ar gyfer ysgolion a gyflwynir ar gampws Y Graig, Coleg Sir Gâr ar y cyd â Phrifysgol Cymru Y Drindod Dewi Sant (PCYDDS) ac fe’i hwylusir gan Esports Wales.

Mae dysgwyr o Goleg Sir Gâr, Ysgol Coedcae, Ysgol Bryngwyn, Ysgol Gyfun Emlyn, Ysgol Dyffryn Aman ac Ysgol Sant Ioan Lloyd yn cymryd rhan yn y gystadleuaeth sy’n cynnwys hyd at 50 o ddysgwyr ifanc o bob ysgol yn cymryd rhan mewn gweithdai cyn chwarae’r gêm ‘Fall Guys’.  Maent yn rheoli cymeriad y gellir ei addasu, y cyfeirir ato’n aml fel “Bean” ac yn cystadlu mewn gwahanol gyrsiau rhwystrau a gemau bach yn erbyn ei gilydd. Y nod yw goroesi pob rownd fel y chwaraewyr olaf yn y gystadleuaeth. 

Nod y digwyddiadau yw datblygu sgiliau digidol y dysgwyr yn ogystal â dangos yr ystod o yrfaoedd sydd ar gael yn y diwydiant gemau a phroffesiynau cyd-fynd fel codio, dylunio gemau, podledu a’r diwydiannau creadigol yn ehangach yn ogystal â’r cyrsiau a’r cymwysterau sydd ar gael yn lleol.  Mae eChwaraeon yn rhoi amrywiaeth o sgiliau a phriodoleddau gwerthfawr trosglwyddadwy sy’n berthnasol yn y gweithle ac yn cynnwys gwaith tîm, meddwl strategol a sgiliau arwain sydd mor fuddiol ar gyfer y dyfodol.

Mae’r gweithdai hefyd yn cynnwys sesiynau ar sgiliau digidol, hapchwarae, dylunio gemau, seiber-ddiogelwch, archwiliad o sut mae’r diwydiant gemau yn cael ei ariannu, yn ogystal â sesiynau ar yrfaoedd a lles ynghyd â’r rhaglenni hyfforddi sydd ar gael mewn addysg bellach ac uwch, gan gynnwys prentisiaethau.

Ariennir y prosiect drwy Gronfa Ffyniant Gyffredin Cyngor Sir Caerfyrddin yn dilyn cais llwyddiannus a gyflwynwyd ar y cyd gan dîm Ymgysylltu Dinesig Y Drindod Dewi Sant a Choleg Sir Gâr sydd wedi bod yn darparu’r prosiect. 

Dywedodd Richard Morgan, darlithydd mewn Cyfrifiadura yn Y Drindod Dewi Sant: “Mae cystadleuaeth Gaming Heros wedi bod yn gyfle gwych i PCYDDS ymgysylltu â Choleg Sir Gâr, Esports Cymru a dysgwyr ifanc ar draws y rhanbarth sy’n awyddus i ddatblygu eu sgiliau digidol trwy gyfrwng gemau ac adloniant.

“Rydym yn ystyried hwn yn brofiad dysgu ar gyfer Addysg Uwch hefyd, fel adeiladu cysylltiadau rhwng partneriaid academaidd, endidau proffesiynol ac, yn bwysicaf oll, y rhai sy’n gobeithio parhau i astudio yn y meysydd hyn. Mae hyn yn ein galluogi i ddeall yn well sut y gall ymdrechion cydweithredol helpu i godi ymwybyddiaeth a darparu cyfleoedd ar gyfer ystod o ddewisiadau gyrfa digidol creadigol ar gyfer y genhedlaeth nesaf”.

Ychwanegodd  Mark Richards, Cyfarwyddwr Cynorthwyol Peirianneg, Technoleg, Celfyddydau Creadigol a Chwaraeon Coleg Sir Gâr: “Rydym yn falch iawn o gynnal y digwyddiad hwn yn ein hystafell eSports boblogaidd. Mae’n gyfle gwych i bobl ifanc ymgolli yn y dirwedd ddigidol, gan gyfuno eu sgiliau digidol â chreadigrwydd ac ysbryd cystadleuol chwaraeon. Mewn partneriaeth â Phrifysgol Cymru Y Drindod Dewi Sant, ysgolion lleol, ac Esports Wales, sy’n cefnogi disgyblion i ddatblygu ymwybyddiaeth o’r nifer o lwybrau gyrfa digidol sydd ar gael yn Sir Gaerfyrddin a’r rhanbarth ehangach.

Dywedodd Mr Steffan Hubbard, Pennaeth Bagloriaeth Cymru ac Athro TGCh yn Ysgol Gyfun Emlyn: “Mae mynychu confensiwn Arwyr Hapchwarae yng Ngholeg Sir Gâr yn grymuso disgyblion trwy arddangos llwybrau gyrfa yn y diwydiant esports, meithrin sgiliau mewn gwaith tîm, cyfathrebu a thechnoleg, a thanio angerdd a all arwain at lwyddiant yn y dyfodol mewn gemau a thu hwnt”.

Dywedodd John Jackson, Cyfarwyddwr Esports Wales: “Mae’r diwydiant esports yn parhau i dyfu yng Nghymru, nid yn unig fel math o adloniant ond fel llwyfan allweddol ar gyfer datblygu gyrfa yn y sectorau digidol a chreadigol. Mae ein prosiect yn Esports Wales yn chwarae rhan hanfodol wrth harneisio’r potensial hwn, gan ddarparu llwybrau i bobl ifanc a gweithwyr proffesiynol ragori mewn gemau, technoleg a thu hwnt, tra hefyd yn meithrin cymunedau lleol trwy ein rhaglenni arloesol.”

Cynhelir Digwyddiad Gwobrau i’r cystadleuwyr yn Yr Egin ar gampws Caerfyrddin y Brifysgol ar 25 Tachwedd gyda digwyddiadau gyrfaoedd dilynol yn cael eu cynnal ym mis Rhagfyr yn y Brifysgol.   Y cyflwynydd Gwobrau yw Ameer Davies-Rana, cyflwynydd profiadol ar S4C a BBC Radio Cymru sy’n ymweld yn rheolaidd ag ysgolion a phrifysgolion i hyrwyddo’r Gymraeg.  Bydd tlysau yn cael eu cyflwyno i enillwyr y tîm o bob ysgol ac yna cinio dathlu.

Gwybodaeth Bellach

Eleri Beynon

Pennaeth Cyfathrebu Corfforaethol a Chysylltiadau Cyhoeddus    
Cyfathrebu Corfforaethol a Chysylltiadau Cyhoeddus     
E-bost: eleri.beynon@pcydds.ac.uk  
Ffôn: 07968 249335