Myfyriwr Peirianneg Beiciau Modur PCYDDS yn Adeiladu Rhan Rasio Wedi’i Haddasu ar gyfer beic modur Honda

Mae myfyriwr ail flwyddyn Peirianneg Beiciau Modur, Harry Rogers eisoes yn gwneud ei farc ym Mhrifysgol Cymru Y Drindod Dewi Sant (PCYDDS) gyda phrosiect sy’n cyfuno peirianneg fanwl, perfformiad chwaraeon moduro a dysgu cydweithredol. 

Gan weithio ochr yn ochr ag Ian Henshaw, arddangoswr technegol beiciau modur a thimau Lee Pratt o Academi Sgiliau Gweithgynhyrchu Uwch, mae Harry wedi dylunio a chynhyrchu cydosodiad pen llywio wedi’i deilwra ar gyfer beic modur rasio Honda NSF250R - arloesedd sy’n trawsnewid potensial trin y peiriant. 

Mae’r rhan Honda wreiddiol yn gydran gast na ellir ei haddasu.  Mae’r fersiwn sydd wedi’i hailgynllunio gan Harry, fodd bynnag, yn galluogi geometreg y beic i gael ei fireinio ar gyfer perfformiad rasio.  Mae hyn yn caniatáu i feicwyr modur a pheirianwyr addasu ymateboldeb y peiriant ar gyfer traciau ac amodau gwahanol – mantais fawr mewn chwaraeon moduro cystadleuol. 

Mae’r prosiect wedi bod yn adeiladwaith peirianneg cyflawn o’r dechrau i’r diwedd:

• Clampiau triphlyg wedi’u melino o alwminiwm 6082
• Coesyn llywio wedi’i droi o alwminiwm 7075

• Wedi’i beiriannu’n fanwl gywir yn gyfan gwbl yn fewnol yn PCYDDS

  Dywedodd Harry: “Mae gweithio ar y prosiect hwn wedi bod yn brofiad gwych. Mae mynd â syniad o’r dyluniad hyd at y peiriannu a’r cydosod wedi rhoi cipolwg gwirioneddol i mi ar sut beth yw gweithio fel peiriannydd dylunio mewn chwaraeon moduro. Drwy gydol y prosiect, rydw i wedi ennill profiad ar draws sawl maes peirianneg, gan gynnwys defnyddio meddalwedd CAD/CAM, dadansoddi elfennau meidraidd, ac egwyddorion peiriannu, i enwi ond rhai. Rydw i wedi dysgu cymaint gan y tîm MADE+, ac mae’n hynod gyffrous gweld fy ngwaith yn cael ei ddefnyddio ar feic rasio MotoEng NSF250R.”

Mae gwaith Harry yn enghraifft o ethos tîm MADE+ y Brifysgol, sy’n hyrwyddo cydweithredu a dysgu trawsddisgyblaethol.  Gweithiodd myfyrwyr, academyddion ac arbenigwyr y diwydiant gyda’i gilydd i gyfuno dyluniad uwch gyda sgiliau gweithdy ymarferol, gan sicrhau bod y cynnyrch terfynol yn bodloni safonau uchel gymwysiadau rasio. 

Wrth adfyfyrio ar y cyflawniad, canmolodd staff broffesiynoldeb a sylw Harry i fanylion, gan nodi bod ei gyfraniad eisoes wedi denu cydnabyddiaeth o fewn cymuned y brifysgol. 

Dywedodd Ian Henshaw: “Mae cydweithrediad parhaus rhwng y myfyrwyr peirianneg a’r cyfleusterau cynhyrchu sydd wedi’u lleoli ar gampws IQ yn hanfodol. Mae’n dda i’r myfyrwyr weld eu syniadau’n mynd o ddyluniadau digidol ac efelychiadau meddalwedd i eitemau wedi’u hargraffu 3D, ond mae cael rhannau gorffenedig wedi’u cynhyrchu i oddefgarwch a’u profi o fewn timau Chwaraeon Moduro’r Brifysgol Drindod Dewi Sant yn hanfodol i ddatblygiad ein peirianwyr yn y dyfodol. Mae’n helpu ein graddedigion i gael rhywbeth sy’n eu gwahaniaethu wrth symud i’r diwydiant.”

Meddai Dr Mark Cocks, Deon Athrofa Gwyddoniaeth a Chelf y Brifysgol: 

“Mae prosiect Harri yn enghraifft wych o’r math o arloesedd yn y byd go iawn y mae ein myfyrwyr yn gallu eu cyflawni.  Drwy gymryd cydran rasio a’i hail-beiriannu ar gyfer hyblygrwydd a pherfformiad, mae wedi dangos nid yn unig sgil technegol, ond hefyd y gallu creadigrwydd a datrys problemau y mae chwaraeon moduro yn gofyn amdanynt. 

Gyda chyfleusterau arbenigol, addysgu sy’n canolbwyntio ar ddiwydiant, a chyfleoedd i fyfyrwyr weithio ar heriau peirianneg byw, mae gradd Peirianneg Rasio Modur PCYDDS yn parhau i ddarparu’r llwyfan perffaith i beirianwyr uchelgeisiol fel Harry droi angerdd yn arfer. 

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071