Penodi Jacqui Jones yn Gadeirydd newydd Sefydliad Lletygarwch Cymru

Mae Prifysgol Cymru Y Drindod Dewi Sant (PCYDDS) yn falch o gyhoeddi bod Jacqui Jones, Rheolwr Rhaglen ar gyfer y portffolio Rheolaeth Teithio, Twristiaeth, Digwyddiadau a Gwyliau Rhyngwladol, wedi’i phenodi’n Gadeirydd newydd Sefydliad Lletygarwch Cymru (IoH Cymru).

Gyda chefndir helaeth mewn addysg twristiaeth ac ymgysylltu â’r diwydiant, mae penodiad Jacqui yn adlewyrchu ei hymrwymiad eithriadol i hyrwyddo rhagoriaeth mewn lletygarwch, teithio a thwristiaeth ledled Cymru a thu hwnt.

Mae Jacqui yn aelod o Bwyllgor Hyfforddiant ac Addysg y Sefydliad Teithio a Thwristiaeth (ITT) ac mae’n gwasanaethu fel Cydlynydd ABTA. Chwaraeodd ran ganolog yn enwi PCYDDS yn Ganolfan Ragoriaeth ar gyfer Teithio a Thwristiaeth, sy’n cydnabod safonau uchel y brifysgol mewn addysgu, cydweithredu â diwydiant, a datblygiad myfyrwyr.

Mae Sefydliad Lletygarwch Cymru yn rhwydwaith hirsefydlog a rhanbarthol o’r corff proffesiynol, sy’n ymroddedig i gefnogi aelodau ledled Cymru. Mae’n hyrwyddo twf a ffyniant y sectorau lletygarwch, hamdden a thwristiaeth, gan annog datblygiad proffesiynol a lleoli Cymru yn gyrchfan o ddewis.

O dan arweinyddiaeth Jacqui, bydd IoH Cymru yn parhau i hyrwyddo llwybrau gyrfa, safonau proffesiynol, a datblygu sgiliau ar draws y rhanbarth. Bydd Grŵp Myfyrwyr ffyniannus y sefydliad yn parhau i fod yn ffocws, gan ddarparu llwyfan i genhedlaeth nesaf gweithwyr proffesiynol y diwydiant gysylltu, dysgu a thyfu trwy gynadleddau myfyrwyr a diwydiant, rhwydweithio a digwyddiadau cymdeithasol.

Wrth siarad am ei phenodiad, dywedodd Jacqui Jones: “Mae’n fraint ymgymryd â rôl Cadeirydd IoH Cymru. Rwy’n angerddol am feithrin talent a hyrwyddo Cymru fel cyrchfan o’r radd flaenaf ar gyfer lletygarwch a thwristiaeth. Mae’r swydd newydd hon yn ategu fy ngwaith yn y Drindod Dewi Sant, lle rydym yn ymdrechu i rymuso’r genhedlaeth nesaf o arweinwyr trwy addysg, cydweithredu ac ymgysylltu yn y byd go iawn.”

Mae penodiad Jacqui hefyd yn cryfhau cysylltiadau diwydiant IoH Cymru. Mae James Hayward, Rheolwr Clwstwr Celtic Collections, wedi’i benodi’n Is-gadeirydd, gan weithio ochr yn ochr â Jacqui i gynrychioli’r diwydiant ledled Cymru a chefnogi’r genhedlaeth nesaf o weithwyr proffesiynol lletygarwch. Yn wreiddiol, ymunodd Jacqui a James â phwyllgor IoH Cymru gyda’i gilydd a chyflwynasant gyfres o ddigwyddiadau ar-lein ac wyneb yn wyneb effeithiol yn ystod cyfnod Covid. Mae eu partneriaeth yn parhau i ffynnu, ac mae cynlluniau eisoes ar y gweill ar gyfer cyfres o fentrau a digwyddiadau newydd a fydd yn gyrru cydweithredu ac arloesi academia ar draws y sector.

Ychwanegodd Jacqui: “Mae ein perthynas â Celtic Collections yn parhau i dyfu ac mae cael James yn Is-gadeirydd yn dod â chyfoeth o fewnwelediad a phrofiad yn y diwydiant. Gyda’n gilydd, rydym yn cynrychioli’r diwydiant ar draws Cymru a’r genhedlaeth nesaf o weithwyr proffesiynol ac rydym yn cynllunio pethau mawr ar gyfer IoH Cymru.”

Mae’r penodiad hefyd yn cydnabod cyfraniad gweithredol Jacqui i raglen ddigwyddiadau IoH Cymru. Gan weithio gyda’r Athrofa, helpodd i drefnu ‘Rheoli’r Trac’ yng Nghae Rasio Ffos Las a chydlynodd ddwy gynhadledd hynod lwyddiannus IoH Cymru yn y Senedd, y bu i’r ddwy ohonynt ddod ag arweinwyr, gweithwyr proffesiynol a myfyrwyr at ei gilydd i ddathlu arloesedd a rhagoriaeth ym maes lletygarwch a thwristiaeth Cymru.

Bydd ei rôl ddeuol o fewn y Drindod Dewi Sant ac IoH Cymru yn creu cyfleoedd pellach i fyfyrwyr a gweithwyr proffesiynol y diwydiant, gan gryfhau partneriaethau, ehangu rhwydweithiau proffesiynol, a meithrin arloesedd o fewn tirwedd twristiaeth a lletygarwch Cymru.

Dywedodd yr Athro Gareth Davies, Deon Athrofa Rheolaeth ac Iechyd y Brifysgol: “Mae penodi Jacqui yn Gadeirydd IoH Cymru yn adlewyrchu ei hymrwymiad personol a chenhadaeth ehangach y Brifysgol i gydweithio â phartneriaid diwydiant i lunio dyfodol lletygarwch a thwristiaeth yng Nghymru. Bydd ei harweinyddiaeth yn helpu i bontio addysg ac arfer, gan greu hyd yn oed mwy o gyfleoedd i’n myfyrwyr a’r gymuned dwristiaeth ehangach yng Nghymru.”

Wrth ei chroesawu i’r rôl, dywedodd Prif Swyddog Gweithredol IoH, Robert Richardson FIH MI: “Mae Jacqui wedi gweithio gyda’r Sefydliad ers blynyddoedd lawer ac mae’n deall anghenion ein haelodau ledled Cymru. Mae ei hegni a’i hangerdd dros addysgu myfyrwyr ar gyfer gyrfaoedd twristiaeth a lletygarwch yng Nghymru wedi bod yn enghreifftiol, ar ôl helpu i ffurfio Pwyllgor Myfyrwyr IoH Cymru yn y gorffennol. Bydd ei harweinyddiaeth yn helpu aelodau ledled y rhanbarth, cael mynediad at DPP ystyrlon, mentora a rhwydweithio ac annog myfyrwyr a gweithwyr proffesiynol sydd ar ddechrau eu gyrfa i weld lletygarwch fel gyrfa fodern o ddewis.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071