Rygbi Dynion PCYDDS yn Sicrhau Dwbl Hanesyddol!

Mae Tîm Rygbi XV 1af Dynion Prifysgol Cymru Y Drindod Dewi Sant (PCYDDS) wedi dathlu tymor bythgofiadwy trwy gipio Tarian y Gorllewin a phencampwriaeth cynghrair Haen 4 y Gorllewin. Gan gwblhau ymgyrch anorchfygol, tra arglwyddiaethodd y tîm yn eu chwe gêm gynghrair, gan sgorio cyfanswm trawiadol o 394 o bwyntiau ac ildio dim ond 50. Gorffennon nhw o flaen Hartpury, eu gwrthwynebwyr agosaf, a’u gwthio nhw allan o drwch blewyn 34-31 yn y rownd derfynol agos ym Mhrifysgol Caerfaddon.

O dan arweinyddiaeth gadarn y capten Ben James, gwelwyd perfformiadau allweddol gan y tîm gydol y tymor. Eu buddugoliaeth dyngedfennol oddi cartref yn erbyn y Brifysgol Amaethyddol Frenhinol a osododd y cywair ar gyfer eu rhediad pencampwriaeth, a’r chwaraewyr trydedd flwyddyn profiadol Dafydd Jones a Cian Trevelyan yn chwarae rôl hanfodol wrth dalu’n ôl am golli mewn gêm agos iawn yn Cirencester y tymor blaenorol.

Un o straeon amlycaf y tymor oedd Will James, a gwblhaodd ei yrfa rygbi prifysgol ar ôl chwarae ym mhob gêm dros y tair blynedd ddiwethaf. Achlysur hollbwysig arall oedd rownd gynderfynol ymgyrch y cwpan, lle wynebodd PCYDDS brawf anodd yn erbyn Prifysgol Caerdydd. Yn sgil perfformiadau dyn y gêm y mewnwr Noah Potter a’r Wythwr Iestyn Wood, ymdrechodd y tîm yn galed i sicrhau buddugoliaeth yn yr ail hanner.

Yn y tymor hwn hefyd ymddangosodd dau o chwaraewyr Academi’r Scarlets am y tro cyntaf yng ngharfan PCYDDS. Dangosodd Ellis Payne ei allu ymosodol yn erbyn Prifysgol Gorllewin Lloegr, tra sgoriodd Tiaan Sparrow gais tyngedfennol yn y fuddugoliaeth gartref ar Hartpury. Yn ogystal, roedd y brifysgol yn ymfalchïo’n fawr yn y myfyriwr ail flwyddyn, Harri Thomas, a chwaraeodd ran allweddol yn ymgyrch Chwe Gwlad dan 20 Cymru, gan gynnwys perfformiad rhagorol yn erbyn Lloegr yn y gêm derfynol.

Mae Rygbi PCYDDS yn parhau i feithrin perthynas gref â chlybiau lleol, gan gynnwys timau Super Rygbi Cymru, Cwins Caerfyrddin a Llanymddyfri. Mae chwech o chwaraewyr y brifysgol wedi cynrychioli’r timau hyn dros y flwyddyn ddiwethaf, a hynny’n tynnu sylw at lwyddiant y bartneriaeth hon. Cafodd y maswr Sam Potter ei wobrwyo am berfformiadau arbennig yn PCYDDS a Chlwb Rygbi Rhydaman drwy sicrhau lle yn Academi’r Dreigiau.

Yn ogystal â’r chwaraewyr, mae Rygbi PCYDDS yn ffynnu oherwydd ei dîm cymorth ymroddedig. Roedd myfyrwyr BSc Chwaraeon a Therapi Ymarfer Corff Joanna Cathersides a Ffion Jones yn allweddol wrth ddarparu gofal meddygol lefel uchel gydol y tymor. Mae’r cydweithrediad rhwng Undeb y Myfyrwyr, clybiau prifysgol, a’r Academi Chwaraeon hefyd wedi bod yn hanfodol yn llwyddiant parhaus y tîm mewn cystadlaethau BUCS.

Meddai Pennaeth Rygbi PCYDDS, Gareth Potter: 

“Roedd mynd â’r dwbl yn wobr haeddiannol i grŵp tynn iawn o unigolion sydd wedi gweithio’n ddiflino drwy gydol y tymor. Mae’r myfyrwyr blwyddyn gyntaf wedi ychwanegu ansawdd pellach at y garfan ac mae’r rhaglenni sgiliau a datblygiad corfforol yr ydym yn eu rhedeg ochr yn ochr â’n clybiau partner yn allweddol i ddatblygiad y bobl ifanc hyn. Mae’r rhaglen rygbi yma yn datblygu’n dda ac yn rhoi cyfle i’r bechgyn gael blas o BUCS yn ogystal â chwarae gyda’u clybiau cartref. Hoffwn i roi diolch arbennig i’r holl staff ystafell gefn am eu hymroddiad a’u cymorth. Rydyn ni’n edrych ymlaen at groesawu rhagor o fyfyrwyr newydd ym mis Medi i helpu gydag ymgyrch y tymor nesaf yn y cynghrair uwch.”

Adleisiodd Lee Tregoning, Pennaeth Academi Chwaraeon PCYDDS, y teimladau hyn: 

“Llongyfarchiadau enfawr i bawb sy’n cymryd rhan. Mae’r garfan wedi dangos ymrwymiad eithriadol, ac mae’n wych gweld myfyrwyr o Gaerfyrddin ac Abertawe yn cofleidio’n llawn y diwylliant rygbi y mae Gareth wedi’i adeiladu’n llawn. Rydyn ni’n edrych ymlaen at adeiladu ar y llwyddiant hwn a sefydlu PCYDDS ymhellach yn brif gyrchfan ar gyfer chwaraewyr rygbi uchelgeisiol sydd am hyfforddi a chystadlu mewn amgylchedd proffesiynol wrth ennill addysg o’r radd flaenaf.”

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476