Taith Myfyriwr wedi’i Thanio gan Angerdd a Phwrpas

Nid oedd y llwybr i Brifysgol Cymru Y Drindod Dewi Sant (PCYDDS) yn unionsyth i Ethan Scriven, ond yr oedd yn drawsnewidiol.  Fel llawer o fyfyrwyr y tarfwyd ar eu taith academaidd gan y pandemig, roedd rhaid i Ethan addasu’n gyflym ac ailfeddwl ei ddyfodol.  Mae’r hyn a ddechreuodd fel newid i’w gynlluniau wedi troi’n brofiad gwerth chweil, llawn twf, cysylltiadau, a chyfleoedd annisgwyl.  

A heddiw mae’n graddio gyda gradd anrhydedd dosbarth cyntaf mewn Rheolaeth Teithio a Thwristiaeth Ryngwladol mewn seremoni yn Arena Abertawe. 

Wedi cynllunio ar y cychwyn ar gyfer gyrfa yn yr heddlu, ail-werthusodd Ethan ei gynlluniau yn ystod pandemig COVID-19 ar ôl gorffen ei gwrs Gwasanaethau Cyhoeddus a Chwaraeon Awyr Agored yn y coleg. “Nid oeddwn yn barod ar gyfer prifysgol ar yr adeg hon,” mae’n cyfaddef, felly penderfynodd astudio BTEC mewn Teithio a Thwristiaeth yng Ngholeg Merthyr Tydfil yn lle hynny.  Arweiniodd y cyfnod o oedi ac adfyfyrio at sgwrs gyda rheolwr y rhaglen Jacqui Jones, trobwynt a ddaeth ag ef i PCYDDS i astudio Rheolaeth Teithio a Thwristiaeth Rhyngwladol.   

Nid y cwricwlwm yn unig oedd yr hyn a ddenodd Ethan at y cwrs, ond y profiadau byd go iawn yr oedd yn eu cynnig.  “Y cyfleoedd, y cysylltiadau agos â diwydiant, a’r profiadau ymarferol oedd yr hyn a oedd wedi sefyll allan i mi mewn gwirionedd,” meddai.  

Roedd ei uchelgeisiau wedi gwreiddio nid yn unig mewn datblygiad proffesiynol, ond mewn twf personol. “Fy nod oedd adeiladu hyder, deall y diwydiant, ac yn fwyaf, ddod yn well fersiwn ohonof i fy hun.” 

Cyflwynodd y cwrs fwy nag oedd Ethan yn disgwyl. O deithiau maes trochol i leoliadau gwaith proffil uchel, cymerodd amrywiaeth eang o rolau a’i wthiodd o’i fan gyffyrddus ac yn ddwfn i’r diwydiant teithio a thwristiaeth.  Mae rhai o’i brofiadau nodedig yn cynnwys:  

• Rheolwr Cynigion i Mitours 

• Staff bar a lletygarwch mewn digwyddiadau chwaraeon mawr, gan gynnwys Cymru yn erbyn Lloegr ym Mhencampwriaeth y Chwe Gwlad 

• Cwnselydd mewn gwersyll haf drwy CCUSA yn yr Unol Daleithiau 

• Staff gwahoddedigion arbennig yn nigwyddiadau Ironman 

• Gwesteiwr cynhadledd ar gyfer ITT Future You Cymru 

Nid oedd y rolau hyn wedi adeiladu ei CV yn unig, roeddent wedi adeiladu ei hyder, ei wydnwch, a’i allu i lywio byd o dwristiaeth a digwyddiadau cyflym sy’n canolbwyntio ar bobl. 

Nid yw taith Ethan wedi bod heb gyfnodau anodd.  Wynebodd heriau personol arwyddocaol, gan gynnwys profedigaeth deuluol a straen am berfformiad academaidd.  Ond, ni wnaeth eu hwynebu ar ei ben ei hun.  “Drwy siarad â Jacqui Jones ac ymgysylltu â’r myfyrwyr eraill, roeddwn yn gallu parhau â’m hastudiaethau,” rhannodd.  “Roedd y rhwydwaith cymorth wedi fy helpu i ganolbwyntio ar fwynhau bywyd yn y brifysgol a thynnu fy meddwl oddi ar y pethau anodd.” 

Mae Ethan yn siarad yn angerddol am yr hyn y mae’r cwrs hwn wedi rhoi iddo a’r hyn y gall ei gynnig i eraill.  “Mae’r cwrs, nid yn unig yn rhoi gradd i chi,  mae’n rhoi profiadau, rolau gwirfoddol, y byddwch byth yn meddwl amdanynt, ffrindiau oes, a llawer o hyder!” 

Ym mis Mehefin, roedd Ethan yn paratoi ar gyfer un o’i gyfleoedd mwyaf cyffrous hyd yma: siarad yng nghynhadledd ITT Future You 2025 yn Sardinia, yr Eidal. Roedd ar banel yn trafod deallusrwydd artiffisial a’i effaith ar y diwydiant twristiaeth, gan gynnig cipolwg ar sut mae ei genhedlaeth yn gweld y dirwedd waith sy’n newid. 

“Dim ond dechrau fy nhaith yw hyn,” meddai. “Ac rwy’n gyffrous i weld lle mae’r ffordd yn mynd â mi.” 

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476