WorldSkills: Sbarduno Cydweithredu a Chyflogadwyedd yn PCYDDS

Ym Mhrifysgol Cymru Y Drindod Dewi Sant (PCYDDS), rydym yn ymfalchïo’n fawr yng nghyflawniadau ein myfyrwyr, yn enwedig pan fydd eu sgiliau’n cael eu cydnabod ar lwyfannau cenedlaethol a rhyngwladol. Mae’r cyhoeddiad diweddar bod pedwar o’n myfyrwyr a’n prentisiaid wedi cael eu dewis ar gyfer Rowndiau Terfynol Cenedlaethol WorldSkills UK 2025 nid yn unig yn garreg filltir iddynt hwy yn unigol – mae’n ddatganiad pwerus am rôl cystadlaethau sgiliau wrth siapio graddedigion sy’n barod am y diwydiant.

Ym mis Tachwedd, bydd PCYDDS hefyd yn gweithredu fel un o’r lleoliadau swyddogol ar gyfer cynnal y rowndiau terfynol cenedlaethol, gan groesawu cystadleuwyr, arbenigwyr ac ymwelwyr o bob cwr o’r DU i gampws Glannau Abertawe. Yn yr erthygl hon,  mae Lee Pratt, Rheolwr yr Academi Sgiliau Gweithgynhyrchu Uwch a Llysgennad Sgiliau y Brifysgol, yn  esbonio sut mae hyn yn llawer mwy nag arddangosfa: mae’n llwyfan hanfodol ar gyfer ymgysylltu â’r diwydiant, arloesi, ac o ran cyflogadwyedd ein graddedigion.

Pontio’r Byd Academaidd a Diwydiant

Mae cystadlaethau WorldSkills yn ymwneud â mwy na medalau yn unig. Maent yn ymwneud â meincnodi yn erbyn y goreuon, mewn amodau byd go iawn, o dan archwiliad gweithwyr proffesiynol y diwydiant. Mae’r heriau wedi’u cynllunio mewn cydweithrediad â chyflogwyr, gan sicrhau eu bod yn adlewyrchu safonau a disgwyliadau’r gweithle modern.

I PCYDDS,  mae’r aliniad hwn yn amhrisiadwy. Mae’n golygu bod ein myfyrwyr nid yn unig yn dysgu mewn ystafelloedd dosbarth a gweithdai ond hefyd yn cymhwyso eu gwybodaeth mewn cyd-destunau sy’n berthnasol i’r diwydiant. Boed hynny’n beirianneg meddalwedd, seiberddiogelwch, neu weithgynhyrchu uwch, mae cymryd rhan yn WorldSkills yn pontio rhwng astudiaeth academaidd ac arfer y diwydiant.

Cymerwch Luke Redmore, sy’n astudio am Radd-brentisiaeth mewn Peirianneg Meddalwedd, sydd ar hyn o bryd yn cwblhau ei leoliad yng Ngwasanaeth Sifil y DU. Mae ei daith WorldSkills wedi ei helpu i oresgyn syndrom y ffugiwr, tyfu mewn hyder, a mireinio ei arbenigedd technegol. Yn yr un modd, mae Rehan Joseph, sy’n astudio Rhwydweithiau Cyfrifiadurol a Seiberddiogelwch, wedi cryfhau ei ffocws gyrfa drwy baratoi ar gyfer y gystadleuaeth Technegydd Seilwaith Rhwydwaith. Yn ôl y ddau fyfyriwr mae’r cyfuniad o gefnogaeth academaidd yn PCYDDS a’r addysgu sy’n seiliedig ar y diwydiant yn allweddol i’w llwyddiant.

Partneriaethau Diwydiant ar Waith

Mae ein rôl wrth gefnogi’r rhai a gyrhaeddodd y rownd derfynol, fel Tamzin Brewer (Canolfan Gweithgynhyrchu Arloesol ac Arbrofol) a Lloyd Thomas (peiriannydd CNC dan hyfforddiant  yn Safran Seats) yn  tynnu sylw at gryfder ein partneriaethau â chyflogwyr. Gan weithio’n agos gyda Safran a thrwy ein Hacademi Sgiliau Gweithgynhyrchu Uwch (AMSA), rydym yn cyd-ddatblygu rhaglenni hyfforddi sy’n ymateb yn uniongyrchol i anghenion y diwydiant.

Mae arweinwyr Safran wedi siarad yn glir am effaith y cydweithredu hwn: niferoedd uwch o osodwyr peiriannau medrus, llwybrau hyfforddi mwy effeithiol, a gweithwyr llawn cymhelliant sydd nid yn unig yn rhagori heddiw ond hefyd yn cynllunio datblygiad gyrfa hirdymor. Mae llwyddiant Lloyd yn WorldSkills yn dangos sut mae cydweithredu rhwng diwydiant a phrifysgol yn cynhyrchu manteision i fusnesau a dysgwyr fel ei gilydd.

Cyflogadwyedd Graddedigion trwy Ragoriaeth Sgiliau

Mae cyflogwyr yn chwilio fwyfwy am raddedigion sydd nid yn unig yn dechnegol alluog ond hefyd yn wydn, yn addasadwy, ac yn gallu perfformio o dan bwysau. Mae cystadleuwyr WorldSkills yn ymgorffori’r rhinweddau hyn. Mae trylwyredd y gystadleuaeth yn gofyn am ddatrys problemau, creadigrwydd a hunanfeddiant – pob un ohonynt yn briodoleddau y mae cyflogwyr yn eu gwerthfawrogi.

Yn PCYDDS, mae ymgorffori’r ethos hwn yn ein haddysgu a’n partneriaethau yn helpu i sicrhau bod ein graddedigion yn barod am y diwydiant. Mae WorldSkills yn gwella eu cyflogadwyedd trwy roi profiadau iddynt sy’n mynd y tu hwnt i’r ystafell ddosbarth – profiadau sy’n meithrin hyder, yn dilysu eu sgiliau yn erbyn safonau cenedlaethol, ac yn eu cysylltu â darpar gyflogwyr.

Mae cynnal Rowndiau Terfynol Cenedlaethol WorldSkills UK 2025 yn foment falch i PCYDDS. Mae’n arwydd o’n hymrwymiad nid yn unig i ragoriaeth academaidd ond hefyd i hyrwyddo addysg alwedigaethol a thechnegol ar raddfa genedlaethol. I’n myfyrwyr, mae’n gyfle i brofi eu hunain yn erbyn y goreuon. I’n partneriaid yn y diwydiant, mae’n gyfle i weld yn uniongyrchol safon y genhedlaeth nesaf o dalent. Ac i’r gymuned ehangach, mae’n brawf o’r effaith y mae addysg sgiliau yn ei chael ar dwf economaidd ac arloesi.

Mae WorldSkills yn fwy na chystadleuaeth. Mae’n gatalydd ar gyfer cyfle, yn arddangosfa ar gyfer cydweithio, ac yn ysgogi cyflogadwyedd. Yn PCYDDS,  byddwn yn parhau i hyrwyddo ei werthoedd wrth i ni baratoi ein myfyrwyr nid yn unig ar gyfer swyddi, ond ar gyfer gyrfaoedd ystyrlon, llwyddiannus mewn diwydiant.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071