Y Darlithydd, Abi Penny, yn cael ei hanrhydeddu gan 10 Stryd Downing am Hyrwyddo Menywod mewn Chwaraeon Moduro

Roedd Abi Penny, Uwch Ddarlithydd mewn Peirianneg Chwaraeon Moduro ym Mhrifysgol Cymru Y Drindod Dewi Sant (PCYDDS), ymhlith grŵp dethol a wahoddwyd i 10 Stryd Downing i ddathlu 75 mlynedd o Fformiwla 1 a chyfraniadau rhyfeddol menywod mewn chwaraeon moduro drwy’r rhaglen Girls on Track UK.

Roedd y derbyniad yng nghartref y Prif Weinidog yn cydnabod aelodau o gymuned Girls on Track UK, menter gan Motorsport UK gyda’r nod o annog a chefnogi menywod ifanc i ddilyn gyrfaoedd mewn chwaraeon moduro, o beirianneg a dylunio i’r cyfryngau a gweithrediadau ar ddiwrnod ras.

Mae gwahoddiad Abi yn adlewyrchu ei heffaith sylweddol wrth hyrwyddo cydraddoldeb mewn addysg chwaraeon moduro a pheirianneg. Gyda bron i ddau ddegawd o brofiad, mae hi wedi dod yn eiriolwr blaenllaw dros gynhwysiant mewn diwydiant sydd yn draddodiadol yn cael ei ddominyddu gan ddynion.

“Mae cael fy nghydnabod yn Rhif 10 ochr yn ochr â menywod mor ysbrydoledig o bob rhan o gymuned chwaraeon modur y DU yn anrhydedd na fyddaf byth yn ei anghofio,” meddai Abi Penny. “Mae chwaraeon moduro wedi bod yn angerdd gydol oes, ac mae’n hynod werth chweil helpu i greu cyfleoedd i’r genhedlaeth nesaf o beirianwyr benywaidd. Trwy fentrau fel Girls on Track a’n gwaith yn y Drindod Dewi Sant, rydym yn dangos i ferched ifanc fod y diwydiant cyffrous, arloesol hwn i bawb.”

Fel un o’r sefydliadau cyntaf i lansio BEng pwrpasol mewn Peirianneg Chwaraeon Moduro—gan ddathlu ei ben-blwydd yn 25 oed y llynedd, mae’r Drindod Dewi Sant wedi chwarae rôl arloesol wrth lunio addysg chwaraeon moduro. Mae’r rhaglen yn ymfalchïo mewn nifer cynyddol o fyfyrwyr benywaidd, sydd bellach yn cyrraedd 10% o gynrychiolaeth, dwbl y cyfartaledd hanesyddol.

Mae gwaith Abi gyda Girls on Track UK, ochr yn ochr â’i harweinyddiaeth academaidd yn y Drindod Dewi Sant, wedi bod yn allweddol wrth herio hen stereoteipiau a chefnogi menywod ifanc i ffynnu mewn sector perfformiad uchel a chyflym.

“Rydym yn hynod falch o Abi a’r gwaith y mae’n ei wneud i chwalu rhwystrau mewn chwaraeon moduro,” meddai Dr Mark Cocks, Deon Athrofa Gwyddoniaeth a Chelf Cymru y Brifysgol. “Mae ei gwahoddiad i 10 Downing Street yn gydnabyddiaeth haeddiannol o’i hymroddiad, ei eiriolaeth a’i heffaith, nid yn unig mewn addysg beirianneg ond hefyd wrth rymuso’r genhedlaeth nesaf o fenywod ym maes STEM.”

Tynnodd derbyniad Girls on Track UK sylw at arweinyddiaeth fyd-eang y DU ym maes chwaraeon moduro, diwydiant sy’n cyfrannu £16 biliwn i’r economi ac yn cefnogi dros 50,000 o swyddi ledled y wlad. Roedd presenoldeb Abi Penny yn y digwyddiad yn nodi eiliad arwyddocaol i’r Drindod Dewi Sant ac i’r genhadaeth ehangach i greu dyfodol mwy cynhwysol a chynrychioliadol i chwaraeon moduro.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071