Ymweliad Cyn-fyfyrwyr Gwydr Lliw Pensaernïol â Choleg Celf Abertawe

Yn ddiweddar, cafodd Coleg Celf Abertawe’r pleser o groesawu’n ôl grŵp o gyn-fyfyrwyr Gwydr Lliw Pensaernïol o ddosbarth 1985. Wedi’i drefnu gan y cyn-fyfyriwr Simon Knight, daeth yr aduniad â graddedigion ynghyd o bob cwr o’r DU a thramor i ailgysylltu gyda’i gilydd, a gyda’r man lle ymffurfiwyd eu teithiau artistig gyntaf.

Fel rhan o’r ymweliad, mwynhaodd y grŵp daith o amgylch y cyfleusterau prosesu gwydr a’r stiwdios a sbardunodd atgofion llawen o diwtoriaid, cyd-fyfyrwyr, a phrosiectau o bedwar degawd yn ôl. Trawyd y cyn-fyfyrwyr  gan y trawsnewidiad yn y cyfleusterau, ac roedd yr amrywiaeth o offer newydd a’r arloesedd a ddangoswyd yng ngwaith gwydr y myfyrwyr Crefftau Dylunio cyfredol wedi creu argraff arnynt.

Wrth wraidd y digwyddiad roedd arddangosfa arbennig o Archif Gwydr Lliw Abertawe, casgliad sydd wedi’i ddigideiddio ac ar gynnydd, o gannoedd o baneli myfyrwyr a grëwyd yn Abertawe ers yr 1970au. I’r cyn-fyfyrwyr, rhoddodd yr arddangosfa gyfle iddyn nhw nid yn unig i ailymweld â gweithiau hanesyddol ond hefyd i gysylltu eu hetifeddiaeth eu hunain â myfyrwyr heddiw.

Wrth adfyfyrio ar y digwyddiad, dywedodd trefnydd yr aduniad, Simon Knight:

“Y catalydd ar gyfer yr aduniad oedd sylweddoli y byddai’n 40 mlynedd cyn bo hir ers i ni ddechrau’r cwrs Gwydr Lliw Pensaernïol yn Abertawe. Syrthiodd y gwaith trefnu arnaf i gan fod gen i gronfa ddata weithredol trwy fy ngrŵp gwydr lliw ar y cyfryngau cymdeithasol.

“Yr hyn nad oeddwn wedi fy mharatoi ar ei gyfer oedd pa mor dda y byddai’r digwyddiad. Fe wnaethom fwynhau cyflwyniadau gwych ar strwythur a chwmpas cyfredol y cwrs yn yr ysgol, diweddariadau ar archifau dylunio a gwaith celf cyn-fyfyrwyr, a thaith o amgylch cyfleusterau helaeth yr ysgol.

“O fewn ychydig funudau i’r cyflwyniad, roedd yn amlwg i bawb fod yr hud a brofwyd gennym yn dal i fod yno, a hynny mewn digonedd. Daeth pleser mwyaf y dydd gyda’r ddealltwriaeth bod popeth yr oeddem ni wedi’i brofi bryd hynny yn dal i fodoli nawr mewn ffurf mor wych ac yn aros, yn barod i wasanaethu cenedlaethau o artistiaid a phobl greadigol o’r newydd.”

Ychwanegodd Martin Crampin, Cymrawd Ymchwil yng Nghanolfan Uwchefrydiau Cymreig a Cheltaidd Prifysgol Cymru sy’n arwain prosiect Archif Gwydr Lliw Abertawe:

“Mae deialog barhaus gyda chyn-fyfyrwyr yn parhau i fod mor bwysig wrth i ni barhau i ddogfennu a deall pwysigrwydd ein casgliadau yng Ngholeg Celf Abertawe. Gan dynnu ar atgofion y cyn-fyfyrwyr hyn o’r cyfnod y gwnaethant dreulio yn astudio gwydr lliw yn Abertawe ddeugain mlynedd yn ôl, roeddem yn gallu dyddio a phriodoli nifer o eitemau yn y casgliad.”

Mae’r gwaith ar Archif Gwydr Lliw Abertawe yn parhau, dan arweiniad Marilyn Griffiths, Martin Crampin, a Christian Ryan. Gellir archwilio’r catalog sydd ar gynnydd ar-lein yn swansea.stainedglass.wales

Roedd yr ymweliad yn ddathliad o atgofion a rennir ac yn ein hatgoffa o effaith barhaus addysgu gwydr lliw Abertawe ar genedlaethau newydd o artistiaid.

Gwybodaeth Bellach

Mared Anthony

Swyddog Cyfathrebu a Chysylltiadau Cyhoeddus: Cysylltiadau Cyn-fyfyrwyr   
Cyfathrebu Corfforaethol a Chysylltiadau Cyhoeddus   
E-bost: mared.anthony@pcydds.ac.uk     
Ffôn: +447482256996