Prifysgol Cymru Y Drindod Dewi Sant (PCYDDS) yn chwarae rhan ganolog yn seremoni lofnodi hanesyddol MOST BRIDGES UNESCO yn eu pencadlys ym Mharis

Camodd Y Drindod Dewi Sant i ganol y llwyfan ym Mharis yr wythnos hon (ddydd Llun, 29 Ionawr) ar gyfer llofnodi cylch gorchwyl MOST BRIDGES UNESCO ym mhencadlys UNESCO.

Gustavo Merino, Cyfarwyddwr Polisi Cymdeithasol, UNESCO; Gabriela Ramos, Cyfarwyddwr Cyffredinol Cynorthwyol ar gyfer y sector Gwyddorau Cymdeithasol a Dynol UNESCO; Luiz Oosterbeek, Llywydd y Cyngor Rhyngwladol ar gyfer Athroniaeth a Gwyddorau Dynol (ar y sgrin); Steven Hartman, Cyfarwyddwr Gweithredol Sylfaenol BRIDGES ac aelod o Fwrdd Cyfarwyddwyr y Dyniaethau ar gyfer yr Amgylchedd

Mae BRIDGES, clymblaid gwyddorau cynaliadwyedd byd-eang a drefnir o fewn Rhaglen Rheoli Trawsnewidiadau Cymdeithasol (MOST) UNESCO, yn gosod y Dyniaethau ar flaen y gad o ran ymchwil a phrosiectau cynaliadwyedd ledled y byd.

Roedd y garreg filltir hon yn nodi dechrau’r cam gweithredol nesaf a llywodraethiant tymor hir Clymblaid MOST BRIDGES UNESCO. Mae’r datblygiad hwn yn ailddatgan BRIDGES yn rhaglen fyd-eang a flaenoriaethir gan UNESCO mewn gwyddor cynaliadwyedd integredig, dan arweiniad y Dyniaethau ar gyfer y degawd nesaf.

Roedd yr Athro Steven Hartman, Cyfarwyddwr Gweithredol Sefydlu clymblaid fyd-eang MOST BRIDGES UNESCO, wrth law i gymeradwyo’r Cylch Gorchwyl. Mae’r Cyfarwyddwr Gweithredol yn goruchwylio’r Hwb BRIDGES Blaenllaw yn Labordy Dyfodol Byd-eang Julie Ann Wrigley ym Mhrifysgol Talaith Arizona, ac Ysgrifenyddiaeth Fyd-eang BRIDGES yn Y Drindod Dewi Sant ac felly mae’r rôl wedi’i hangori yn y ddau sefydliad. Ymunodd yr Athro Hartman â Chyfarwyddwr Cyffredinol Cynorthwyol UNESCO, Gabriela Ramos, ac arweinyddiaeth Ysgrifenyddiaeth Rheoli Trawsnewidiadau Cymdeithasol i ffurfioli Cylch Gorchwyl BRIDGES yn y seremoni. Yn dilyn yr arwyddo, mynegodd yr Athro Hartman ei frwdfrydedd:

“Mae llofnodi’r Cylch Gorchwyl MOST BRIDGES-UNESCO yn garreg filltir hollbwysig yn natblygiad y glymblaid a gweithrediad cenhadaeth BRIDGES. Mae’r cam hwn yn cadarnhau ymrwymiad y gymuned fyd-eang i drosoli cyfoeth y Dyniaethau wrth wireddu cymdeithasau cynaliadwy.”

Gan gadarnhau’r rôl allweddol y mae’r Drindod Dewi Sant yn falch o’i chwarae yn gartref Ysgrifenyddiaeth Fyd-eang Clymblaid MOST BRIDGES-UNESCO tynnodd yr Athro Elwen Evans, Is-Ganghellor yn Y Drindod Dewi Sant, sylw at arwyddocâd y seremoni:

“Mae’r seremoni hon nid yn unig yn cadarnhau rôl ganolog Y Drindod Dewi Sant mewn BRIDGES ond hefyd yn cryfhau’r bartneriaeth gynyddol rhwng Y Drindod Dewi Sant, UNESCO, ASU a’r holl sefydliadau blaenllaw sy’n cefnogi hybiau rhanbarthol BRIDGES yn fyd-eang. Rydym wedi ymrwymo’n llwyr i hyrwyddo a datblygu’r gwaith hwn ymhellach a chyfrannu at yr amcanion byd-eang a osodwyd gan UNESCO a’r Cyngor Llywodraethu sydd bellach yn ymgynnull o ganlyniad uniongyrchol i’r cam pwysig hwn.

Wrth i Glymblaid BRIDGES gychwyn ar y bennod nesaf yn ei hanes, mae’r Drindod Dewi Sant yn parhau i ymroi i sbarduno newid cadarnhaol trwy ymchwil arloesol ac ymdrechion cydweithredol.”

Gwybodaeth Bellach

Arwel Lloyd

Prif Swyddog Cyfathrebu a Chysylltiadau Cyhoeddus     
Cyfathrebu Corfforaethol a Chysylltiadau Cyhoeddus     
E-bost: arwel.lloyd@pcydds.ac.uk  
Ffôn: 07384 467076