Prosiect Cyfranogiad Plant mewn Ysgolion yn Cyhoeddi Dogfen Friffio ar Bolisi yn Dilyn Cyfnod yr Ymchwil Cychwynnol
Mae’n bleser gan y prosiect Cyfranogiad Plant mewn Ysgolion , menter gydweithredol a gyllidir gan y Cyngor Ymchwil Economaidd a Chymdeithasol (ESRC), hysbysu ei fod yn cyhoeddi’i ddogfen friffio gyntaf ar bolisi.
Mae’r garreg filltir hon yn nodi cwblhau cyfnod cychwynnol y prosiect, a oedd yn cynnwys dadansoddiad cynhwysfawr o ddeddfwriaeth addysgol Cymru a dogfennau polisi gan ymestyn o 1999 i 2023.
Mae’r prosiect yn dod ag arbenigedd o Brifysgol Gorllewin Lloegr (UWE), Prifysgol Abertawe, Prifysgol Cymru Y Drindod Dewi Sant (PCYDDS), a Phrifysgol Metropolitan Caerdydd ynghyd. Ei brif ffocws yw archwilio a hyrwyddo hawliau cyfranogi plant ifanc o fewn lleoliadau addysg gynradd is yng Nghymru. Drwy archwilio polisïau ac arferion presennol, nod yr ymchwil yw dynodi a sefydlu methodolegau addysgu sy’n ymgorffori hawliau cyfranogi plant yn effeithiol mewn ystafelloedd dosbarth ac ysgolion.
Pwysleisiodd Dr Alison Murphy, Cyd-ymchwilydd i’r prosiect Cyfranogiad Plant mewn Ysgolion a Darlithydd yn yr Athrofa Addysg yn PCYDDS, arwyddocâd y gwaith hwn: “Mae ein dadansoddiad yn datgelu ymrwymiad cryf o ran polisi i hawliau cyfranogi plant yng Nghymru. Fodd bynnag, mae bwlch yn parhau rhwng bwriadau polisïau ac arferion mewn ystafelloedd dosbarth. Nod y ddogfen friffio hon yw pontio’r bwlch hwnnw drwy ddarparu mewnwelediadau ar gyfer addysgwyr a llunwyr polisi y gellir eu gweithredu.”
Mae’r ddogfen friffio ar bolisi yn cynnig canfyddiadau allweddol o’r dadansoddiad o ddeddfwriaeth a pholisi, gan dynnu sylw at feysydd lle mae cefnogaeth dda i hawliau cyfranogi a dynodi cyfleoedd am welliannau pellach. Mae’n adnodd gwerthfawr i addysgwyr, arweinwyr ysgol, a llunwyr polisi sy’n ymrwymedig i feithrin amgylcheddau dysgu cynhwysol a chyfranogol i blant ifanc.
Darllenwch y briff polisi yn Gymraeg: https://childrens-participation.org/uploads/Policy%20Briefing%20Welsh.pdf
I gael rhagor o wybodaeth am y prosiect Cyfranogiad Plant mewn Ysgolion, ewch i https://childrens-participation.org/publications.
Gwybodaeth Bellach
Arwel Lloyd
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: arwel.lloyd@pcydds.ac.uk
Ffôn: 07384 467076