Nanna Ryder BA, MEd., TAR (Cynradd), TAR (AU), FHEA

Penderfynodd Nanna ddychwelyd i astudio ar ôl magu teulu a gweithio mewn ysgolion meithrin a chynradd yng Ngheredigion fel cynorthwyydd dysgu am nifer o flynyddoedd. Dilynodd radd mewn Addysg Blynyddoedd Cynnar a chwrs TAR (Cynradd) yng Ngholeg y Drindod ac yna bu’n athrawes gynradd am gyfnod mewn ysgol gynradd wledig yng Ngheredigion. Fe’i penodwyd yn ddarlithydd yn yr Ysgol Astudiaethau Addysg a Chynhwysiant Cymdeithasol yn 2008.  Yn rhan o’i rôl bu’n darlithio ar y cwrs Astudiaethau Addysg a’r Radd Sylfaen mewn Astudiaethau Cynhwysol i Gynorthwywyr Addysgu ar y campws yng Nghaerfyrddin ac mewn lleoliadau ym Mhowys a Sir Benfro.

Yn 2010 derbyniodd gymrodoriaeth gan yr Academi Addysg Uwch i ddatblygu’r ddarpariaeth Anghenion Addysgol Arbennig cyfrwng Cymraeg o fewn y Gyfadran Addysg a Hyfforddiant. Yn dilyn hynny bu’n ffocysu ar y ddarpariaeth Anghenion Dysgu Ychwanegol a Lles ar y cyrsiau BA Addysg Gynradd gyda SAC a’r TAR Cynradd ac Uwchradd yng Nghanolfan Addysg Athrawon De-orllewin Cymru, gan gyfrannu yn ogystal at fodylau yn ymwneud ag astudiaethau proffesiynol, y Cyfnod Sylfaen a mathemateg a rhifedd.

Ar hyn o bryd mae’n addysgu ar y cwrs BA a chyrsiau MA yn y Ganolfan yn ogystal â gweithio ar nifer o brosiectau ymchwil.

Ar gyfer ei gradd Meistr, bu Nanna yn ymchwilio i anawsterau iaith myfyrwyr addysg uwch cyfrwng Cymraeg a’r gefnogaeth ar eu cyfer yn ogystal â sut i gefnogi bechgyn ag anawsterau iaith penodol a dyslecsia.   Testun traethawd hir ei doethuriaeth yw ‘Beth yw canfyddiadau athrawon, cynorthwywyr cynnal dysgu a dysgwyr Cyfnod Allweddol Dau (7-11 oed) am les emosiynol a chymdeithasol yng nghyd-destun Cwricwlwm i Gymru?’

Rhwng 2017 a 2019 bu’n aelod o’r prosiect ymchwil CAMAU  Y prosiect CAMAU | UWTSD mewn cydweithrediad â Phrifysgol Glasgow, gan weithio ar gynnydd o fewn y Maes Dysgu a Phrofiad Iechyd a Lles ar gyfer y Cwricwlwm i Gymru. Ers 2022 mae’n uwch ymchwilydd ar y prosiect dilynol, sef CAMAU i’r Dyfodol Camau ir Dyfodol | University of Wales Trinity Saint David (uwtsd.ac.uk), gan gydweithio eto gyda Phrifysgol Glasgow wrth edrych ar y modd y mae ysgolion yng Nghymru yn dehongli ac yn ymgorffori cynnydd o fewn y cwricwlwm.

Mae hefyd yn gweithio ar brosiect gyda Phrifysgol Glyndŵr, Wrecsam a NAEL, a ariennir gan Lywodraeth Cymru, ar ddatblygu adnoddau dysgu proffesiynol i ysgolion yn seiliedig ar y Fframwaith Llesiant Emosiynol a Meddyliol.