Prentisiaid Peirianneg Ffrwydron yn Profi Hyfforddiant o'r Radd Flaenaf yn Alford Technologies

Cafodd Gradd-brentisiaid o Brifysgol Cymru Y Drindod Dewi Sant (PCYDDS) gyfle anhygoel i brofi peirianneg ffrwydron o’r radd flaenaf ar waith yn ystod ymweliad ag Alford Technologies a’i Broadmead Range yng Ngwlad yr Haf yn gynharach yr wythnos hon.

Yn ystod yr ymweliad a gynhaliwyd gan dîm medrus iawn Alford, cyflwynwyd diwrnod eithriadol o ddysgu ymarferol a mewnwelediad technegol, gan arddangos y gorau mewn arfer proffesiynol, arloesedd a safonau diogelwch yn y diwydiant peirianneg ffrwydron. Mae’r profiad wedi cael ei ganmol fel un amhrisiadwy i brentisiaid sy’n gweithio tuag at eu graddau mewn Peirianneg Ffrwydron.

Mae Alford Technologies yn arweinydd a gydnabyddir yn fyd-eang mewn atebion a hyfforddiant peirianneg ffrwydron, sy’n adnabyddus am ei arbenigedd mewn deunyddiau egnïol, arloesedd o’r radd flaenaf, ac ymrwymiad i ddiogelwch gweithredol. Mae ei gyfleusterau yn darparu amgylchedd heb ei ail ar gyfer datblygiad proffesiynol, gan roi mynediad i ddysgwyr at arddangosiadau realistig a rheoledig iawn sy’n ategu eu hastudiaeth academaidd.

Yn ystod yr ymweliad, enillodd prentisiaid Blwyddyn 2, sydd ar hyn o bryd yn astudio Egwyddorion Peirianneg Ffrwydron ac Egwyddorion Peirianneg Systemau, brofiad ymarferol hanfodol mewn dinistrio seilwaith wedi’i ddifrodi a gwaredu ordnans nad yw wedi ffrwydro (UXO) heb ei danio. Bydd y mewnwelediadau a gafwyd yn atgyfnerthu eu dealltwriaeth academaidd yn uniongyrchol ac yn cryfhau eu datblygiad technegol a phroffesiynol.

“Roedd yr ymweliad ag Alford’s Range yn un arbennig ac yn dangos y lefelau uchaf o broffesiynoldeb ac arbenigedd,” meddai Matthew Wicker, Pennaeth Uned Brentisiaethau PCYDDS. “Cafodd ein prentisiaid eu hysbrydoli gan y manwl gywirdeb a’r arloesedd a ddangoswyd gan adael gyda gwerthfawrogiad dyfnach o’r modd y mae eu hastudiaethau’n trosi i gymwysiadau yn y byd go iawn.”

Diolchodd PCYDDS yn arbennig i Gareth Collett, CBE, am ei drefniadaeth a’i arweinyddiaeth arbenigol, ac i’r tîm cyfan yn Alford Technologies am eu hamser, eu hymrwymiad a’u hymroddiad i ddarparu profiad mor gofiadwy ac addysgol.

“Mae partneriaethau fel hyn yn hanfodol i lunio’r genhedlaeth nesaf o beirianwyr ffrwydron,” ychwanegodd Matthew. “Rydym yn ddiolchgar iawn i Alford Technologies am gefnogi datblygiad ein prentisiaid ac am helpu i bontio’r bwlch rhwng theori ac arfer proffesiynol.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071