Y Drindod Dewi Sant yn Cynnal Lansiad Prosiect Blwyddyn 12 Cynllun Addysg Beirianneg Cymru

Mae Prifysgol Cymru Y Drindod Dewi Sant (PCYDDS) yn falch o gynnal lansiad Prosiect 6ed Dosbarth Cynllun Addysg Beirianneg Cymru (EESW) yn ei Champws yng Nglannau SA1. Daeth y digwyddiad, a drefnwyd gan Jeremy Morgan, Cydlynydd EESW De Cymru, â pheirianwyr uchelgeisiol ifanc, arbenigwyr y diwydiant ac addysgwyr ynghyd ar gyfer dechrau ysbrydoledig i’r her y flwyddyn hon.

Mae’r prosiect EESW yn cysylltu timau o hyd at wyth o fyfyrwyr Blwyddyn 12 o ysgolion a cholegau ledled Cymru â chwmnïau lleol sy’n gosod briff peirianneg go iawn iddynt. Dros y misoedd nesaf, bydd myfyrwyr yn gweithio ar y cyd i ddylunio, profi a darparu atebion arloesol i’r heriau a aseiniwyd iddynt.

Eleni, roedd y digwyddiad croeso yn cynnwys timau o Ysgol yr Esgob Gore, Ysgol yr Esgob Vaughan, Ysgol Gyfun Bryntirion, Ysgol Gyfun Cynffig, Ysgol Gyfun Gŵyr, ac Ysgol a Chanolfan y Chweched Dosbarth Gatholig Sant Joseff. Roedd cynrychiolwyr o’u cwmnïau partner yn bresennol i gyflwyno’r briffiau her a rhoi hwb cychwynnol i’r broses greadigol.

Ochr yn ochr â gweithgareddau EESW, arddangosodd tîm Recriwtio ac Allgymorth Myfyrwyr a staff academaidd PCYDDS ystod drawiadol y brifysgol o gyrsiau sy’n gysylltiedig â pheirianneg gan gynnwys Chwaraeon Moduro, Peirianneg Ynni a Pheirianneg Amgylcheddol, a chyfleoedd Gradd-brentisiaethau. Archwiliodd myfyrwyr y labordai a chyfleusterau o’r radd flaenaf sydd gan y brifysgol hefyd yn ystod teithiau tywys a gweithdai ymarferol.

Dywedodd Donna Williams, Uwch Swyddog Ehangu Mynediad PCYDDS: “Mae’r Drindod Dewi Sant yn falch iawn o gydweithio â Chynllun Addysg Beirianneg Cymru ac yn ddiolchgar i fod yn rhan o fenter mor ysbrydoledig. Roedd croesawu myfyrwyr i’n campws am y tro cyntaf yn gyfle gwych i arddangos ein cyfleusterau, gan gynnwys yr adran chwaraeon moduro a’r ystafell drochol, ac i dynnu sylw at ehangder y cyfleoedd sydd ar gael yn y Brifysgol. Edrychwn ymlaen at eu croesawu yn ôl yn y dyfodol.”

Meddai Jeremy Morgan: “Mae EESW yn ddiolchgar iawn i dîm Recriwtio ac Allgymorth Myfyrwyr y brifysgol ac i’w Hacademyddion am gynnal y digwyddiad cyffrous hwn.”

Mae athrawon a myfyrwyr wedi canmol trefniant ac effaith y digwyddiad.

Meddai Martin Gore, Uwch Dechnegydd Gwyddoniaeth Ysgol yr Esgob Gore, Abertawe: “Cafodd y digwyddiad hwn ei drefnu’n dda iawn, fel bob amser, gan y Drindod Dewi Sant (hon oedd fy nhrydedd flwyddyn yn cymryd myfyrwyr yma ar gyfer y digwyddiad hwn). Roedd y myfyrwyr yn credu bod y cynnwys yn addysgiadol ac yn ddiddorol. Roedd y cyflwyniadau gan staff y Brifysgol a Jeremy o EESW yn glir, yn addysgiadol ac yn gryno ac yn berthnasol i nodau EESW. Edrychwn ymlaen at ddychwelyd ar gyfer y gweithdai yn y dyfodol agos.”

Ychwanegodd Hywel Longman, Pennaeth Ffiseg Ysgol Gyfun Gwyr: “Mae’r cyfleusterau sydd ar gael yn y Drindod Dewi Sant yn arwain y ffordd ym maes peirianneg, yn enwedig ym maes chwaraeon moduro. Os ydych chi’n ystyried mynd i’r brifysgol hon i astudio, yn enwedig o fewn peirianneg, mae’r cyfleoedd sydd ar gael yn bendant yn werth eu harchwilio.”

Rhannodd Joe Pallett, myfyriwr o Ysgol Gyfun Gwyr, ei frwdfrydedd: “Heddiw rwyf wedi dysgu bod y Drindod Dewi Sant yn cynnig amrywiaeth o opsiynau gradd gwych, gan gynnwys gradd peirianneg chwaraeon moduro cŵl iawn! Mae’r cyfleusterau’n wych ac fe wnaethon ni ymweld â’r ystafell drochol a’r llyfrgell hefyd, prifysgol cŵl iawn!”

Pwysleisiodd y digwyddiad werth cydweithredu rhwng addysg a diwydiant, gan ysbrydoli’r genhedlaeth nesaf o beirianwyr i arloesi, dylunio a llunio’r dyfodol.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071