Myfyrwyr y Drindod Dewi Sant yn dod â Phantomeim Cymraeg yn fyw
Mae myfyrwyr blwyddyn gyntaf y cwrs BA Dylunio a Chynhyrchu Setiau ym Mhrifysgol Cymru Y Drindod Dewi Sant (PCYDDS) wedi ymuno â Chwmni Mega ar eu cynhyrchiad diweddaraf ‘Gwion Bach a Ceridwen y Wrach.’
Dros y mis nesaf, bydd Cwmni Mega yn mynd â’i bantomeim diweddaraf i leoliadau ledled Cymru, gyda’r cynhyrchiad yn cynnwys elfennau o’r set wedi’u hadeiladu gan fyfyrwyr y Drindod Dewi Sant. Daw’r cydweithio ar adeg arbennig o gyffrous i gyrsiau creadigol y Brifysgol, gyda’r Drindod Dewi Sant yn 1af yn y DU ar gyfer Drama a Dawns yn y Guardian University Guide 2027, sy’n cydnabod cryfder ei darpariaeth ar draws y celfyddydau perfformio.
Cysylltodd y cwmni â’r tîm Dylunio a Chynhyrchu Setiau yn y Brifysgol i gefnogi’r gwaith o adeiladu’r set, gan roi cyfle i fyfyrwyr gyfrannu at gynhyrchiad theatr proffesiynol a gweld eu gwaith yn dod yn fyw ar y llwyfan.
Mae’r gwaith cydweithredol yn rhan o fodwl y myfyrwyr, Adeiladu Golygfeydd, lle maent yn ymateb i friff creadigol yn y byd go iawn ac yn datblygu’r sgiliau sydd eu hangen i gyflawni prosiectau mewn amgylchedd perfformio byw.
Trwy’r prosiect, mae’r myfyrwyr wedi ennill profiad ymarferol gwerthfawr, gan ddatblygu eu galluoedd technegol, eu creadigrwydd a’u hyder wrth adeiladu cysylltiadau â gweithwyr proffesiynol sy’n gweithio yn y diwydiant theatr yng Nghymru.
Mae’r cydweithredu hefyd wedi rhoi cyfle i weithio ochr yn ochr ag Ellie Reynolds, un o raddedigion y Drindod Dewi Sant, a ddyluniodd set y cynhyrchiad.
Dywedodd Cyfarwyddwr Cwmni Mega, Lisa Marged:
“Mae’n fraint gallu cynnig y profiad hwn iddyn nhw wrth iddynt ddechrau eu gyrfaoedd yn y maes.
“Mae hefyd yn wych cydweithio ag Ellie Reynolds am yr eildro! Y tro cyntaf oedd fel cynorthwyydd gwisgoedd ar ein taith pantomeim y llynedd, ac eleni mae hi wedi dylunio, creu a phaentio’r set drawiadol ar gyfer ‘Gwion Bach a Ceridwen y Wrach’.
“Mae Ellie yn berson eithriadol o dalentog a chreadigol, ac yn bleser gweithio gyda hi; rydym yn hynod ddiolchgar am ei holl waith caled ac ymroddiad.”
Dywedodd y darlithydd Dave Atkinson:
“I’r myfyrwyr a wnaeth y set hon, dyma’r tro cyntaf iddynt weithio gydag offer pŵer a sgiliau gwaith coed. Maen nhw’n dysgu mewn amgylchedd ymarferol a meithringar ac mae hynny, ynghyd â’r briff ar gyfer cleient proffesiynol, yn rhoi tir dysgu perffaith iddynt ddatblygu eu sgiliau ac adeiladu dealltwriaeth o sut i’w cymhwyso yn y byd go iawn. Dyma’r eildro i ni adeiladu ar gyfer Cwmni Mega ac mae’n bleser gwirioneddol cynnal perthynas â’r diwydiant.”
I gael rhagor o wybodaeth am y cwrs BA Dylunio a Chynhyrchu Setiau, ewch i: Dylunio a Chynhyrchu Setiau (Llawn amser) | Prifysgol Cymru Y Drindod Dewi Sant
I gael tocynnau ar gyfer y cynhyrchiad, ewch i: Hafan - Cwmni Mega.Cymru
Gwybodaeth Bellach
Lowri Thomas
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: lowri.thomas@pcydds.ac.uk
Ffôn: 07449 998476