Arddangosfa Haf PCYDDS 2026 yn tynnu sylw at dalent greadigol sy'n barod ar gyfer gyrfa ledled Cymru a thu hwnt
Bydd myfyrwyr o Brifysgol Cymru Y Drindod Dewi Sant (PCYDDS) yn cyflwyno eu prosiectau mawr terfynol yr haf hwn yn rhan o Arddangosfa Haf 2026 y Brifysgol. Bydd y rhaglen yn lansio gydag arddangosfeydd Coleg Celf Abertawe fydd yn agor ar 15 Mai yn Abertawe, a bydd yn parhau ar draws Caerfyrddin, Caerdydd a Llundain hyd at fis Gorffennaf.
Mae’r arddangosfa flynyddol yn dathlu creadigrwydd, arloesedd a phroffesiynoldeb myfyrwyr sy’n graddio ar draws ystod eang o ddisgyblaethau, gan gynnwys Patrymau Arwyneb a Thecstilau, Celfyddyd Gain, Dylunio Graffig, Actio, Gwneud Ffilmiau Antur, Dylunio Modurol a rhagor. Cynhelir arddangosfeydd yn Abertawe yn Adeilad Dinefwr a Chyfnewidfa Ddylunio ALEX, gyda pherfformiadau ychwanegol yn Yr Egin ac arddangosfeydd proffil uchel yng Nghaerdydd a Llundain.
Un o gonglfeini calendr y Brifysgol yw’r Arddangosfa Haf sydd hefyd yn cynnwys gwaith gan fyfyrwyr yn Academi Celfyddydau Llais a Dramatig Cymru (WAVDA), gan gynnig llwyfan bywiog i berfformwyr sy’n dod i’r amlwg gysylltu â gweithwyr proffesiynol, asiantau a chynulleidfaoedd yn y diwydiant.
Mae’r arddangosfa eleni yn rhoi pwyslais cryf ar gyflogadwyedd, gan adlewyrchu ymrwymiad y Drindod Dewi Sant i baratoi graddedigion ar gyfer gyrfaoedd llwyddiannus yn y diwydiannau creadigol. Mae llawer o fyfyrwyr yn sicrhau rolau, comisiynau a chyfleoedd llawrydd yn uniongyrchol o arddangos eu gwaith, tra bod eraill yn symud ymlaen i sefydliadau creadigol blaenllaw, busnesau newydd, ac astudiaethau ôl-raddedig.
Meddai Dr Mark Cocks, Deon Sefydliad Gwyddoniaeth a Chelf Cymru yn PCYDDS: “Mae Arddangosfa Haf 2026 yn dangos nid yn unig creadigrwydd eithriadol ein myfyrwyr, ond eu parodrwydd i gamu’n hyderus i ymarfer proffesiynol. Mae’r arddangosfeydd hyn yn dod yn fwy ac yn fwy yn fannau lansio ar gyfer gyrfaoedd, a myfyrwyr yn ennill comisiynau, cyflogaeth a chydnabyddiaeth diwydiant o’r eiliad y byddant yn cyflwyno eu gwaith. Mae’n ysbrydoledig gweld eu syniadau’n cyfieithu i gyfleoedd yn y byd go iawn.”
Mae diwydiannau creadigol y DU yn parhau’n rym economaidd pwysig, gan gyfrannu dros £100 biliwn bob blwyddyn ac yn tyfu’n gyflym. Mae’r Drindod Dewi Sant yn chwarae rôl allweddol, gan roi i fyfyrwyr y sgiliau ymarferol, y meddylfryd entrepreneuraidd a’r cysylltiadau diwydiant sydd eu hangen i ffynnu.
Meddai Caroline Thraves, Cyfarwyddwr Academaidd (Celf a’r Cyfryngau) yng Ngholeg Celf Abertawe PCYDDS: “Ein ffocws yw sicrhau bod myfyrwyr yn ein gadael ni nid yn unig yn bobl greadigol dalentog, ond hefyd yn weithwyr proffesiynol hyderus. Mae’r Arddangosfa Haf yn bont hanfodol rhwng addysg a chyflogaeth, lle mae myfyrwyr yn cyflwyno portffolios sy’n barod i’r diwydiant, yn adeiladu rhwydweithiau ac yn aml yn sicrhau eu rolau cyntaf. Mae’n hynod werth chweil gweld cymaint o raddedigion yn mynd ymlaen i yrfaoedd cyffrous a chynaliadwy.”
Gydag enw da ers amser maith yn un o ysgolion celf mwyaf blaenllaw’r DU, mae Coleg Celf Abertawe yn parhau i greu graddedigion sy’n mynd ymlaen i fod yn artistiaid, dylunwyr, gwneuthurwyr ffilmiau ac entrepreneuriaid creadigol dylanwadol.
Ychwanegodd Lynne Seymour, Cyfarwyddwr Academaidd: Diwydiannau Dylunio a Pherfformio: “Mae’r arddangosfa hon yn adlewyrchu uchelgais, gallu i addasu a phroffesiynoldeb ein myfyrwyr. Maen nhw’n deall sut i gydweithio, ymateb i friffiau, ac arloesi o fewn cyd-destunau diwydiant go iawn. Mae cyflogwyr yn chwilio am raddedigion sy’n gallu cael effaith uniongyrchol - a dyna’n union beth mae ein myfyrwyr yn barod i’w wneud. Mae llawer yn ein gadael ni sydd yn gweithio yn y diwydiannau maen nhw’n eu caru.”
Graddiodd Ellie Jones, (yn y llun) gyda Gradd Dosbarth Cyntaf mewn BA (Anrh) Darlunio yn 2025, ac enillodd Wobr Spotlight AOI nodedig yn New Designers yn Llundain. Mae’r wobr yn dathlu darlunydd sydd â phortffolio sy’n barod ar gyfer y diwydiant a llais creadigol ffres ac arloesol.
I Ellie, 23 oed, mae darlunio yn fwy na ffurf gelf, mae’n ffordd o gysylltu pobl â lles, ymwybyddiaeth ofalgar a’r byd naturiol. Mae ei hadrodd straeon gweledol wedi’i drwytho â chynhesrwydd a phersonoliaeth, ac mae ei defnydd nodedig o liw a gwead yn rhoi arddull adnabyddadwy ar unwaith i’w gwaith.
“Roedd yn anrhydedd i mi dderbyn Gwobr Spotlight AOI a chael fy enwi ymhlith graddedigion darlunio gorau’r DU,” meddai Ellie, sy’n byw ym Mhontypridd. “Mae’r gefnogaeth rydw i wedi’i chael gan Goleg Celf Abertawe wedi bod yn anhygoel, a rhoddodd y gydnabyddiaeth hon hyder gwirioneddol i mi wrth i mi ddechrau adeiladu fy ngyrfa mewn darlunio.”
Uchafbwyntiau’r Digwyddiad
Abertawe – Coleg Celf Abertawe (SCA)
Noson Agoriadol: 15 Mai
Arddangosfa STEM (Adeilad IQ): 29 Mai, 2–4pm
Pensaernïaeth: 5 Mehefin, 6pm
Dylunio Modurol: 27 Mehefin, 6pm
Caerfyrddin
Gwneud Ffilmiau Antur: 13 Mai, 6:30–9:30pm
Actio a Dylunio Set: 15–16 Mai (gweler yr amserlen am amseroedd)
Caerdydd
Arddangosfa Diwydiant WAVDA (Theatr Porters):
15 Mai, 7pm
16 Mai, 2pm a 7pm
Dawns Fasnachol: 29 Mai, 2:30pm a 7.30pm, Tŷ Dawns, Canolfan Mileniwm Cymru
Theatr Gerdd a BA Perfformio: 19 Mehefin, 1pm a 7.30pm a Mehefin 20, 2pm a 7.30pm, Tŷ Haywood
Perfformiad Llais BMus: 3 Mehefin, 5pm clasurol datganiad, datganiad pop 7pm, Haywood House
Llundain
Arddangosfa Celfyddyd Gain a Ffotograffiaeth
Oriel Copeland, Llundain
18 Mehefin (6:00pm - Hwyr)
19-20 Mehefin (10:00 - 18:00)
Arddangosfa Dylunwyr Newydd (Canolfan Dylunio Busnes): 1–4 Gorffennaf
Yn cynnwys rhaglenni mewn Patrwm Arwyneb a Thecstilau, Crefftau Dylunio, Dylunio Graffig, Darlunio, a Dylunio Cynnyrch a Dodrefn
Gwybodaeth Bellach
Rebecca Davies
Swyddog Gweithredol Cysylltiadau â’r Wasg a’r Cyfryngau
Cyfathrebu Corfforaethol a Chysylltiadau Cyhoeddus
E-bost: rebecca.davies@pcydds.ac.uk
Ffôn: 07384 467071