Athrofa Confucius ac Athrofa Addysg a Dyniaethau PCYDDS yn Adfyfyrio ar Gyfnewidfa Wybodaeth Lwyddiannus gydag Ysgolheigion Prifysgol Undeb Beijing

Mae Athrofa Confucius ac Athrofa Addysg a Dyniaethau (IEH) Prifysgol Cymru Y Drindod Dewi Sant (PCYDDS) wedi cynnal sesiwn Cyfnewidfa Wybodaeth gydweithredol lwyddiannus gydag ysgolheigion gwadd o Brifysgol Undeb Beijing, gan ddod ag addysgwyr, archwilwyr a thechnolegwyr ynghyd i archwilio cymwysiadau arloesol technoleg mewn dysgu a hygyrchedd. 

Canolbwyntiodd rhaglen y bore ar ddulliau digidol a throchol i gefnogi dysgwyr a myfyrwyr niwroamrywiol gydag anghenion dysgu ychwanegol.  Clywodd mynychwyr gan Alison Rees-Edwards a Laura Hutchings, Arweinydd Digidol y Sefydliad:  IEH, a gyflwynodd eu hymchwil ar fapio amgylcheddau’n ddigidol i gefnogi myfyrwyr niwroamrywiol yn well.  

Yn ogystal, arddangosodd Laura ap realiti rhithwir (VR) a gafodd ei gyd-greu ochr gyda dysgwyr niwroamrywiol, gan ddangos gwerth dylunio cydweithredol wrth greu profiadau addysgol hygyrch. 

Rhannodd Laura Emmanuel (Hyfforddiant Cychwynnol Athrawon) fewnwelediadau i sut y defnyddir ystafell drochol PCYDDS i nodi ac ymateb i anghenion disgyblion ag anghenion dysgu ychwanegol, tra cyflwynodd Dr Ceri Phelps, Seicolegydd Iechyd, Arweinydd Prosiect a Phrif Ddarlithydd mewn Seicoleg Gymhwysol yn PCYDDS, uchafbwyntiau ei phrosiect ‘Colli aelodau o’r Corff:  Cerdded yn ein Hesgidiau”, gan gynnig safbwynt pwerus ar brofiadau byw gan bobl sydd wedi colli aelodau o’u cyrff. 

Yn ogystal, roedd y digwyddiad yn cynnwys ysgolheigion gwadd o Brifysgol Undeb Beijing, a ddangosodd dechnolegau awdioleg a hygyrchedd sy’n dod i’r amlwg a chynhigiodd safbwyntiau rhyngwladol gwerthfawr ac arfer cynhwysol yn Tsieina.  Cyfoethogodd eu cyfraniadau trafodaethau’r diwrnod ac agorodd lwybrau newydd ar gyfer cydweithredu byd-eang. 

Ehangodd rhaglen y prynhawn archwilio arloesi a chynhwysiant, gyda sgyrsiau ar ddeallusrwydd artiffisial, economi ddigidol Tsieina, polisi anabledd, a newyddiaduraeth foesegol.  Daeth y diwrnod i ben gyda sesiwn rhwydweithio anffurfiol yn cyfuno seremoni te Tsieineaidd â the prynhawn traddodiadol Cymreig, gan ddarparu llwyfan cynnes a symbolaidd ar gyfer cyfnewid parhaus. 

Creodd y Gyfnewidfa Wybodaeth ofod bywiog, ymarferol, rhyngddisgyblaethol a dynnodd sylw at botensial cydweithredu traws-ddiwylliannol wrth hyrwyddo addysg gynhwysol, wedi’i wella gan dechnoleg. 

Meddai Laura Hutchings:  “Roedd yn ysbrydoledig rhannu’r gwaith rydym wedi bod yn ei ddatblygu gyda myfyrwyr niwroamrywiol a dangos sut y gallwn gyd-greu drawsnewid offer digidol fel yr ap VR.  Mae gweithio’n uniongyrchol gyda dysgwyr wedi ein helpu i ddylunio amgylcheddau sy’n adlewyrchu eu hanghenion a’u profiadau.  Ychwanegodd cyfraniadau ein cydweithwyr ym Mhrifysgol Undeb Beijing ddyfnder go iawn i’r diwrnod, gan gynnig safbwyntiau newydd ar hygyrchedd a chynhwysiant.   Mae’r gyfnewidfa wedi sbarduno trafodaethau a phosibiliadau cyffrous ar gyfer cydweithio yn y dyfodol.” 

Ychwanegodd Cyfarwyddwr Gweithredol Athrofa Confucius, Krystyna Krajewska: “Mae ein partneriaeth â Phrifysgol Undeb Beijing yn rhychwantu 18 mlynedd ac yn parhau i esblygu mewn ffyrdd sy’n ystyrlon ac yn flaengar.  Mae’r Gyfnewidfa Wybodaeth ar AI mewn addysg wedi bod yn arbennig o ffrwythlon, gan ein galluogi i ddysgu o arbenigedd ein gilydd.   Rydym bellach yn archwilio cynhadledd ar-lein ar gyfer y flwyddyn nesaf a fydd yn archwilio dimensiynau athronyddol a moesegol AI, yn ogystal â’i gymwysiadau ymarferol wrth gefnogi cynhwysiant addysgol yng Nghymru a Tsieina.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071