Chwaraewyr Rygbi PCYDDS yn Cynrychioli Academyddion Cymreig yn Erbyn Prifysgol Rhydychen

Cafodd wyth chwaraewr o dîm rygbi Prifysgol Cymru y Drindod Dewi Sant eu dewis i gynrychioli Academyddion Cymru mewn gêm yn erbyn Prifysgol Rhydychen yng Nghlwb Rygbi Morgannwg Wanderers yn ddiweddar. 

Llion Jones (Clwb Rygbi Llangennech) sy’n chwarae yn safle’r bachwr oedd capten y tîm a chwaraeodd Josh Wrigglesworth (Clwb Rygbi Arberth) o’r Brifysgol yn safle blaenwr rheng flaen. Helpodd y ddau i ddarparu platfform cryf i’r ‘Accies’ wrth iddynt sicrhau buddugoliaeth o un pwynt mewn gêm gystadleuol iawn. 

Gwnaeth dau aelod arall o griw PCYDDS, myfyriwr TAR Fraser Deer (Clwb Rygbi De Gŵyr), a Rob Ayers argraff ar y cae gyda chyfres o rediadau trawiadol â’r bel.  

Y tu ôl i’r sgrym, roedd Noah Potter a Twm Davies o Glwb Rygbi Rhydaman. Mae’r ddau wedi cynrychioli’r clwb nodedig ar sawl achlysur yn y gorffennol. Yn ogystal, cafwyd gêm gyntaf gofiadwy gan Ifan Rossitter (Clwb Rygbi Cefn Cribwr), a ddathlodd ei ymddangosiad cyntaf i’r Accies drwy sgorio cais. 

Roedd Keiran Edwards (Clwb Rygbi San Clêr) wedi’i ddewis ar gyfer y garfan, ond yn anffodus roedd yn rhaid iddo dynnu yn ôl oherwydd anaf. Mae tîm Rygbi PCYDDS yn gobeithio y bydd yn cael cyfle arall i gynrychioli’r clwb yn y dyfodol. 

Meddai Pennaeth Rygbi PCYDDS, Gareth Potter: 

 “Roeddwn yn falch iawn bod cymaint o’n chwaraewyr yn cynrychioli clwb ar wahoddiad a fydd yn dathlu ei ganmlwyddiant y tymor nesaf. Rydym yn gwerthfawrogi’n fawr y cyfle a roddodd staff hyfforddi’r Accies i’r bechgyn. 

 “Mae’r ffaith bod cynifer o chwaraewyr y Drindod wedi cymryd rhan mewn gêm yn erbyn sefydliad mor nodedig â Phrifysgol Rhydychen yn dangos faint mae safon rygbi yn y Brifysgol wedi datblygu dros y blynyddoedd diwethaf.”

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476