Cyhoeddi enillydd Gwobr Goffa Norah Isaac 2026.

Mae Prifysgol Cymru y Drindod Dewi Sant wedi cyhoeddi mai enillydd Gwobr Goffa Norah Isaac 2026 yw Fflur Mitchell, myfyriwr cwrs BA Addysg a Gofal Blynyddoedd Cynnar gyda Statws Ymarferydd o Landysul. 

Dyfernir Gwobr Goffa Norah Isaac i’r myfyriwr a gyfrannodd fwyaf, yn nhyb y Brifysgol, at fywyd Cymraeg y sefydliad yn ystod y flwyddyn academaidd. 

Bu Norah Isaac yn  Brif Ddarlithydd Drama a’r Gymraeg yng Ngholeg y Drindod Caerfyrddin am flynyddoedd lawer lle ysbrydolodd genedlaethau o fyfyrwyr. Magodd do ar ôl to o fyfyrwyr i fod, yn eu tro, yn athrawon medrus, a hwythau’n diolch am y cyfle a gawsant i fod wrth draed meistr.       

Gyda chefnogaeth a thrwy haelioni Cymdeithas Ddinesig Caerfyrddin, trefnwyd bod Fflur yn derbyn ei gwobr ar gampws Caerfyrddin yn ystod y seremonïau graddio.  

Meddai Fflur: 

“Mae ennill y wobr yn fraint fawr ac yn rhywbeth rwy’n hynod ddiolchgar am. Mae’n braf gweld bod yr holl waith caled, yr ymroddiad a’r ymdrech dros y tair blynedd wedi cael eu cydnabod. Mae hefyd yn rhoi hyder i mi wrth ddechrau fy ngyrfa ym maes addysg.” 

Mae Fflur erioed wedi mwynhau gweithio gyda phlant. Drwy ei gwaith fel athrawes nofio, arweinydd clybiau chwaraeon a gwaith gwirfoddol, sylweddolodd ei bod eisiau adeiladu gyrfa o fewn y byd addysg. Meddai:  

“Dewisais Brifysgol Cymru Y Drindod Dewi Sant oherwydd ei henw da ym myd addysg, y cyfleoedd lleoliad gwych a’r ffaith ei bod yn cynnig cwrs cyfrwng Cymraeg oedd yn rhoi llawer o brofiad ymarferol.” 

Chwiliodd Fflur am gwrs oedd yn cyfuno gwybodaeth academaidd â phrofiad ymarferol mewn ysgolion a lleoliadau blynyddoedd cynnar. Roedd Fflur yn dymuno datblygu fel ymarferydd proffesiynol a meithrin y wybodaeth a’r sgiliau i gefnogi plant i gyrraedd eu potensial.  Ychwanega:  

“Roedd y cwrs Addysg a Gofal Blynyddoedd Cynnar gyda Statws Ymarferydd yn apelio ataf gan ei fod yn rhoi’r sgiliau, y wybodaeth a’r profiad oedd eu hangen i weithio’n hyderus gyda phlant.” 

I Fflur,  bu gweithio allan ar leoliad yn sicr yn uchafbwynt tra’n astudio’r cwrs. Cwblhaodd dros 700 awr ar  leoliad, a rhoddodd hynny brofiad gwerthfawr iawn o weithio gyda phlant ac ymarferwyr profiadol. Elfen arall wnaeth Fflur fwynhau oedd y modiwlau ar Anghenion Dysgu Ychwanegol a Dysgu Trwy Chwarae, gan eu bod yn dangos pa mor bwysig yw addasu dysgu i anghenion pob plentyn. 

Cafodd gyfle hefyd i ddatblygu ei sgiliau drwy arwain ar nifer o weithgareddau y tu allan i’w chwrs.  Meddai:  

“Yn ogystal â hynny, roeddwn yn gweithio fel arweinydd clwb chwaraeon gyda’r Urdd, ac athrawes nofio yn y pwll ar y campws yn ogystal â gydag asiantaeth cyflenwi. Helpodd y profiadau gwaith hyn fy sgiliau cyfathrebu, cynllunio gweithgareddau a rheoli grwpiau o blant. Roedd y cyfuniad o’r profiadau hyn yn ategu’r hyn roeddwn yn ei ddysgu yn y brifysgol.” 

Bu’n flwyddyn brysur i Fflur hefyd fel Llywydd Cymdeithas Gymraeg (y Gym Gym) y Brifysgol. 

“Roedd bod yn Llywydd y Gymdeithas Gymraeg yn brofiad gwerthfawr iawn ac yn un o uchafbwyntiau fy amser yn y brifysgol. Cefais y cyfle i weithio gyda myfyrwyr o wahanol ardaloedd ledled Cymru ac i gyfrannu at greu cymuned Gymraeg fywiog a chroesawgar.  

“Fel Llywydd, roeddwn yn gyfrifol am drefnu amrywiaeth o ddigwyddiadau cymdeithasol i fyfyrwyr, gweithio’n agos gyda’r pwyllgor ac aelodau o staff y Brifysgol, a sicrhau bod pob gweithgaredd yn cael ei drefnu’n ddiogel drwy gwblhau asesiadau risg. Roedd y rôl hefyd yn cynnwys hyrwyddo’r Gymraeg ar y campws ac annog myfyrwyr i gymryd rhan mewn gweithgareddau. 

“Mae’r rôl wedi fy helpu i ddatblygu fy hyder wrth arwain pobl ac wrth gyfathrebu gyda grwpiau amrywiolRwy’n teimlo bod y profiad wedi fy mharatoi’n well ar gyfer gweithio ym maes addysg, lle mae arweinyddiaeth, cydweithio a chyfathrebu effeithiol yn sgiliau allweddol. Yn ogystal, mae wedi rhoi mwy o hyder i mi fentro ar gyfleoedd newydd, cymryd cyfrifoldeb a chynrychioli eraill mewn ffordd broffesiynol.” 

Meddai Siân Dickie, Swyddog Cangen y Drindod o’r Coleg Cymraeg Cenedlaethol: 
“Mae Fflur wedi bod yn fyfyrwraig arbennig, gan gyfuno llwyddiant academaidd rhagorol gyda chyfraniad nodedig i fywyd Cymraeg y brifysgol. Fel Llywydd ymroddedig y Gymdeithas Gymraeg yn PCYDDS, mae wedi arwain yn egnïol gan hybu cymuned fywiog drwy’r Gymraeg. Mae ei hymrwymiad i’r iaith yn amlwg, ac rydym yn hyderus y bydd yn gwneud cyfraniad gwerthfawr i fywyd Cymreig a’r Gymraeg yn ei gyrfa gyda phlant a theuluoedd yn y dyfodol.” 

Mae Fflur wedi canmol y gefnogaeth a dderbyniodd oddi wrth ei darlithwyr:  

“ Roeddent bob amser yn barod i ateb cwestiynau, rhoi adborth adeiladol ac annog fi i ddatblygu fel myfyriwr ac fel ymarferydd. Roedd eu cefnogaeth yn rhoi hyder i mi wrth gwblhau aseiniadau i’r gorau o fy ngallu.” 

Dywedodd Glenda Tinney, Tiwtor Derbyn y cwrs Blynyddoedd Cynnar: 

“Fel darlithydd Fflur mae wedi bod yn bleser cael myfyriwr mor brwdfrydig sydd wedi hybu a chefnogi  gweithgareddau cyfrwng Cymraeg darlithoedd  ac o fewn ei gwaith lleoliad.” 

Ychwanegodd y Cynghorydd Peter Hughes Griffiths o Gymdeithas Ddinesig Caerfyrddin: 

“Ein llongyfarchion cynnes i Fflur Mitchel ar ennill Gwobr Goffa Norah Isaac eleni a hynny am ei chyfraniad yn arwain gweithgareddau trwy’r Gymraeg ym Mhrifysgol Cymru y Drindod Dewi Sant.  Mae Cymdeithas Ddinesig Tref Caerfyrddin yn cyflwyno’r wobr yn flynyddol i’r myfyriwr sydd wedi dangos brwdfrydedd dros y Gymraeg yn ystod y flwyddyn golegol a aeth heibio. Roedd Fflur yn llawn deilwng a diolchwn iddi am ei gwaith.” 

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476