“Dewisais fuddsoddi ynof fi fy hun”: O alar i dwf, taith un myfyriwr yn ysbrydoli eraill cyn nosweithiau agored Penfro

Mae dwy noson agored sydd ar y gorwel ym Mhenfro yn gobeithio dangos sut y gall addysg uwch drawsnewid bywydau ac ychydig o straeon sy’n cyfleu hynny’n well na stori Fred Murad, y myfyriwr lleol.

Cynhelir y digwyddiadau gan Brifysgol Cymru Y Drindod Dewi Sant yn Ysgol Gymunedol Priordy Cil-maen, a byddant yn tynnu sylw at raddau rhan-amser mewn Addysg Gynhwysol sydd wedi’u cynllunio ar gyfer y rhai sy’n cydbwyso gwaith, teulu ac ymrwymiadau eraill.

I Fred, fodd bynnag, nid oedd y daith i addysg wedi dechrau gydag uchelgais ond gyda cholled.

“Ni ddechreuodd fy nhaith i addysg uwch yn sgil sicrwydd, ond yn sgil colled ddofn ac angen brys i ailadeiladu bywyd gydag ystyr.”

Ar ôl marwolaeth ei wraig, a oedd yn bartner ac yn ffrind gorau iddo, gadwyd Fred i ofalu am ei blant ifanc wrth lywio galar ac ansicrwydd. Fe wnaeth y penderfyniad anodd i adael ei swydd, gan gamu i ffwrdd o sefydlogrwydd ar un o gyfnodau anoddaf ei fywyd.

 “Ar y pwynt hwnnw, roedd gen i ddewis: parhau i gael fy niffinio gan golled neu sefyll i fyny ac ymladd dros ddyfodol fy nheulu. Dewisais fuddsoddi ynof fi fy hun.”

Yr hyn a ddilynodd oedd proses o ailadeiladu graddol. Trwy raglen Springboard, cwblhaodd Fred gyrsiau rhifedd, TG, cymorth ystafell ddosbarth a chymorth cyntaf - pob un yn helpu i adfer hyder a threfn.

 “Nid oedd dychwelyd i addysg fel myfyriwr aeddfed yn hawdd, ond daeth yn achubiaeth… Mae pob cymhwyster wedi fy helpu i fagu hyder, adfer trefn, ac ailddarganfod ymdeimlad o gyfeiriad ar adeg pan oedd popeth yn teimlo’n ansicr.”

Arweiniodd yr ymdeimlad adnewyddedig hwnnw o bwrpas ef i addysg uwch, gan gofrestru ar y Radd Sylfaen mewn Addysg Gynhwysol a gyflwynir yn lleol yng Nghil-maen.

Ers dros ddegawd, mae’r cyrsiau hyn wedi cael eu cynnig yn y gymuned, gan greu llwybrau hygyrch i addysg uwch i’r rhai na fyddent, o bosibl, fel arall yn ei ystyried.Wedi’u cyflwyno mewn sesiynau gyda’r nos yng Nghil-maen, maent yn gweddu’n arbennig i bobl sydd eisoes yn gweithio neu’n gwirfoddoli mewn ysgolion, gan gynnwys cynorthwywyr cymorth dysgu a chynorthwywyr addysgu.

Dywed Fred bod y profiad wedi bod yn drawsnewidiol.

“Mae’r rhaglen yn academaidd drylwyr ond yn gefnogol iawn, gan gydnabod bod myfyrwyr yn aml yn dod â phrofiadau bywyd cymhleth gyda nhw i’w hastudiaethau.”

Ac yntau bellach yn ei ail flwyddyn, mae wedi symud ymlaen i gyflogaeth amser llawn fel tiwtor yng Ngholeg Sir Benfro ac mae’n gweithio tuag at ei gymhwyster addysgu AET Lefel 3.

Ond y tu hwnt i ddilyniant gyrfa, mae’r cwrs wedi ail-lunio sut mae’n deall dysgu ei hun.

 “Mae’r Radd Sylfaen mewn Addysg Gynhwysol wedi newid popeth o ran sut rwy’n deall dysgu, rhwystrau a chymorth. Mae wedi rhoi mewnwelediad i mi i’r hyn y mae fy mhlant fy hun a llawer o ddysgwyr eraill yn ei brofi bob dydd.”

Mae’r hyn a ddechreuodd fel trobwynt personol wedi dod yn rhywbeth mwy allanol.

 “Nid yw fy nysgu bellach yn rhwybeth personol yn unig; mae wedi dod yn ffordd o roi yn ôl.”

Mae ei stori yn un y mae’r brifysgol yn gobeithio y bydd eraill yn y gymuned a allai fod yn ystyried dychwelyd i addysg yn uniaethu â hi.

Bydd y nosweithiau agored sydd ar y gorwel yn cynnig cyfle i ddarpar fyfyrwyr gwrdd â darlithwyr, archwilio’r cyrsiau a gofyn cwestiynau mewn lleoliad hamddenol, lleol.

Mae’r rhaglenni sefydledig hyn wedi cael eu cyflwyno yng Nghil-maen ers dros 10 mlynedd, gyda channoedd o fyfyrwyr yn symud ymlaen i raddio gyda gradd. Trwy gynnig cyrsiau yn lleol, mae’r brifysgol wedi creu llwybr cydnabyddedig ar gyfer dysgwyr annhraddodiadol, yn enwedig y rhai sy’n cydbwyso astudio â bywyd gwaith a theuluol.

Wedi’u haddysgu ar ôl oriau ysgol mewn amgylchedd cefnogol, llai ffurfiol na champws traddodiadol, mae’r sesiynau gyda’r nos yng Nghil-maen yn gwneud addysg uwch yn fwy hygyrch i bobl leol, yn enwedig y rhai sy’n gweithio neu’n gwirfoddoli mewn ysgolion fel Cynorthwywyr Cymorth Dysgu neu gynorthwywyr addysgu.

Bydd nosweithiau agored yn cael eu cynnal yn Ysgol Gymunedol Priordy Cil-maen:

• Dydd Mawrth 19 Mai, 4:00–6:00pm
• Dydd Mawrth 23 Mehefin, 4:00–6:00pm 

Mae gan Fred neges glir i unrhyw un sy’n ansicr ynglŷn â chymryd y cam cyntaf:

 “Os ydych chi’n ystyried gwneud y radd hon, byddwn yn ei hargymell yn fawr. Mae’r brifysgol yn gefnogol iawn, mae’r staff darlithio yn wybodus, yn groesawgar, ac mae awydd gwirioneddol ganddynt i chi lwyddo.”

Nid yw ei daith yn ymwneud â gadael y gorffennol ar ôl, ond ag adeiladu rhywbeth ystyrlon ohono.

“Mae’r hyn a ddechreuodd mewn caledi wedi tyfu i fod yn stori o ddyfalbarhad, ailddyfeisio a gwasanaeth… adeiladu dyfodol gyda phwrpas - i mi fy hun, fy mhlant ac i’r myfyrwyr rydw i nawr yn eu cefnogi.”

I’r rhai sy’n mynychu’r nosweithiau agored, mae ei brofiad yn enghraifft bwerus o’r hyn sy’n bosibl ac yn ein hatgoffa nad yw byth yn rhy hwyr i ddechrau eto.

I gael rhagor o wybodaeth neu os oes gennych unrhyw gwestiynau am y rhaglen, cysylltwch â Rheolwr y Rhaglen, Cindy Hunt, yn c.hunt@uwtsd.ac.uk 

Gwybodaeth Bellach

Arwel Lloyd

Prif Swyddog Cyfathrebu a Chysylltiadau Cyhoeddus     
Cyfathrebu Corfforaethol a Chysylltiadau Cyhoeddus     
E-bost: arwel.lloyd@pcydds.ac.uk  
Ffôn: 07384 467076