Hyfforddwr arweinyddiaeth ryngwladol yn dathlu graddio ag MA yn PCYDDS

Ar ôl mwy na 25 mlynedd mewn rolau arweinyddiaeth ryngwladol uwch,  mae Cristina-Laura Novotny yn dathlu graddio ag MA mewn Hyfforddi a Mentora, rhan o’r Fframwaith Arfer Proffesiynol, o Brifysgol Cymru Y Drindod Dewi Sant (PCYDDS).  

Gyda chefndir helaeth ym maes cyllid, gweithrediadau, llywodraethu, cydymffurfiaeth, rheolaethau mewnol a hyfforddi gweithredol, mae Cristina wedi dal swyddi corfforaethol uwch gyda sefydliadau byd-eang, gan gynnwys Philip Morris a Schneider Electric, cyn symud i faes ymgynghori, datblygu arweinyddiaeth a hyfforddi trawsnewidiol. 

Dywedodd Cristina ei bod wedi penderfynu astudio yn PCYDDS oherwydd bod y rhaglen yn rhoi cyfle i ddefnyddio ei dysgu drwy brofiad proffesiynol helaeth wrth gryfhau sylfeini academaidd ei harfer. 

“Cefais fy nenu at PCYDDS oherwydd bod y rhaglen yn cynnig llwybr academaidd a oedd yn cydnabod ac yn adeiladu ar fy mhrofiad proffesiynol, tra hefyd yn fy herio i ddyfnhau fy arfer adfyfyriol a chysylltu fy ngwaith yn fwy penodol â theori, ymchwil a safonau proffesiynol.” 

Dewisodd y cwrs oherwydd ei fod yn cyd-fynd yn agos â’i gwaith fel ymarferydd.  

“Roeddwn i eisiau rhaglen a fyddai’n fy ngalluogi i integreiddio fy hyfforddiant blaenorol a’m profiad proffesiynol gydag adfyfyrio academaidd trylwyr. Roedd y llwybr Cydnabod Dysgu Achrededig yn arbennig o werthfawr, gan ei fod yn fy ngalluogi i ddangos sut roedd fy nysgu a’m harfer blaenorol yn bodloni disgwyliadau academaidd Lefel 7.”  

Un o uchafbwyntiau’r MA oedd y cyfle i adfyfyrio’n fanwl ar ei datblygiad personol a phroffesiynol. 

“Mae’r cwrs wedi fy helpu i gysylltu theori, arfer, goruchwyliaeth, moeseg a dysgu personol mewn ffordd llawer mwy integredig. Gwerthfawrogwn yn arbennig yr aseiniadau adfyfyriol, gan eu bod yn fy annog i archwilio nid yn unig yr hyn rydw i’n ei wneud, ond hefyd pwy ydw i.” 

Mae gwaith arbenigol Cristina’n canolbwyntio ar drawsnewid effeithiolrwydd arweinyddiaeth mewn lleoliadau sefydliadol.  

Roedd cydbwyso astudiaethau ôl-raddedig ag ymrwymiadau teuluol a rôl ryngwladol anodd yn cyflwyno heriau, fel yr oedd trosi blynyddoedd o ddysgu drwy brofiad i fframwaith academaidd. Ychwanegodd Cristina ei bod hi wedi 

“goresgyn hyn trwy ddod yn fwy disgybledig yn fy arfer adfyfyriol, defnyddio goruchwyliaeth, ailedrych ar ddamcaniaethau allweddol a chaniatáu i mi fy hun arafu ac archwilio fy nysgu yn fwy beirniadol.” 

Creda Cristina bod yr MA yn arbennig o werthfawr i ymarferwyr profiadol sy’n ceisio cryfhau eu harfer proffesiynol. 

“Byddwn yn bendant yn argymell y cwrs, yn enwedig i ymarferwyr profiadol sydd eisiau dyfnhau eu harfer proffesiynol trwy adfyfyrio academaidd. Mae’r rhaglen yn cynnig cyfle gwerthfawr i integreiddio profiad, theori, moeseg ac ymchwil. Mae’n ymwneud nid yn unig ag ennill cymhwyster, ond hefyd am ddod yn fwy ymwybodol a hyddysg fel ymarferydd.” 

Dywedodd Sarah Loxdale, Uwch Ddarlithydd ac Arweinydd ar Gydnabod Dysgu Blaenorol drwy Brofiad (RPEL): 

“Mae llwyddiant Cristina’n tynnu sylw at werth cydnabod dysgu blaenorol drwy brofiad ar lefel uwch. Trwy lwybr RPEL, roedd hi’n gallu dangos sut roedd ei phrofiad proffesiynol sylweddol yn bodloni disgwyliadau Lefel 7, wrth gymryd rhan mewn adfyfyrio academaidd trylwyr. Mae’r dull hwn nid yn unig yn dilysu arbenigedd presennol ond hefyd yn herio ymarferwyr i ymestyn eu meddwl, gan arwain at weithwyr proffesiynol mwy hyderus ac adfyfyriol, sy’n canolbwyntio ar dystiolaeth.” 

Dywed Cristina fod y cwrs eisoes wedi cael effaith sylweddol ar ei datblygiad proffesiynol a phersonol. 

“Yn broffesiynol, mae wedi fy helpu i fynegi fy ymagwedd gyda mwy o eglurder a hyder. Mae hefyd wedi cryfhau fy ngallu i gysylltu canlyniadau ag effaith sefydliadol. Yn bersonol, mae wedi dyfnhau fy hunan-ymwybyddiaeth ac wedi fy helpu i adfyfyrio’n fwy bwriadol ar fy nhwf, fy ngwerthoedd a’m presenoldeb.” 

Ychwanegodd Lowri Harris, Uwch Ddarlithydd o fewn y Fframwaith Arfer Proffesiynol (PPF): 

 “Mae taith Cristina’n enghraifft bwerus o sut mae’r Fframwaith Arfer Proffesiynol yn galluogi gweithwyr proffesiynol profiadol i drosi arfer helaeth, lefel uchel yn gyflawniad academaidd. Mae ei gallu i adfyfyrio’n feirniadol ar ei phrofiad, ac i gysylltu hyn â theori ac ymchwil, yn ymgorffori’n union yr hyn y mae’r MA wedi’i gynllunio i’w gefnogi. Rydym yn falch o weld ymarferwyr fel Cristina yn dyfnhau eu heffaith drwy’r rhaglen.” 

Ar ôl graddio, mae Cristina’n bwriadu parhau i ddatblygu ei gwaith mewn effeithiolrwydd arweinyddiaeth drawsnewidiol, tra’n integreiddio ymchwil yn fwy llawn i’w harfer. Mae hi hefyd yn gobeithio parhau i gyfrannu at dwf mewn amgylcheddau rhyngwladol cymhleth a mynd ar drywydd datblygiad academaidd a phroffesiynol pellach. 

Os oes diddordeb gennych mewn datblygu eich arfer proffesiynol, mae ceisiadau bellach ar agor ar gyfer y cyfnod derbyn ym mis Hydref – anfonwch e-bost at ppf@uwtsd.ac.uk neu ewch i https://www.uwtsd.ac.uk/cy/fframwaith-arfer-proffesiynol am ragor o wybodaeth. 

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476