Myfyriwr yn profi nad yw hi byth yn rhy hwyr i ddysgu sgiliau newydd

I Alejandra Montecinos, roedd gwneud cais i’r HNC Mesur Meintiau yn y Drindod Dewi Sant drwy Clirio yn darparu llwybr hyblyg a hygyrch i addysg uwch yn y DU. 

Symudodd Alejandra i’r DU o Honduras lle graddiodd mewn Peirianneg Sifil o National Autonomous University of Honduras (UNAH) yn 2010.

Roedd hi eisoes wedi datblygu gyrfa broffesiynol eang yn y diwydiant adeiladu cyn symud i’r DU ond roedd yn awyddus i ddatblygu ei gyrfa broffesiynol ac ennill cymhwyster yn y DU. 

Dewisodd Alejandra y Drindod Dewi Sant oherwydd bod cwrs HNC Mesur Meintiau, sydd wedi’i achredu gan Gymdeithas Siartredig y Peirianwyr Adeiladu (CABE), yn cynnig llwybr ymarferol a ffocws i ddiwydiant adeiladu’r DU. 

“Roeddwn i’n gweld y broses Clirio yn syml a chefnogol,” meddai. “Rhoddodd y Brifysgol arweiniad clir trwy gydol y broses ymgeisio, gan ei gwneud hi’n llawer haws nag yr oeddwn wedi’i ddisgwyl i ddechrau. Rhoddodd y profiad hyder a sicrwydd i mi fy mod yn gwneud y penderfyniad cywir ar gyfer fy nyfodol”.

Esbonia: “Fel gweithiwr proffesiynol rhyngwladol sy’n edrych i barhau â’m datblygiad ac addasu fy nghymwysterau i farchnad y DU, rhoddodd Clirio gyfle i ddod o hyd i’r cwrs cywir ar yr adeg iawn”.

“Ar ôl gweithio fel peiriannydd sifil am flynyddoedd lawer, roeddwn i eisiau ehangu fy ngwybodaeth ac ennill cymhwyster cydnabyddedig a fyddai’n fy helpu i drosglwyddo i Mesur Meintiau yn y DU. Roeddwn hefyd eisiau gwella fy rhagolygon gyrfa a pharhau i symud ymlaen yn broffesiynol yn y sector adeiladu”.

Dywed Alejandra, a symudodd i Abertawe gyda’i theulu i chwilio am gyfleoedd astudio newydd, ei bod eisiau adeiladu ar ei phrofiad peirianneg presennol wrth ennill dealltwriaeth ddyfnach o amcangyfrif, cyfraith adeiladu, mesur, caffael a rheoli costau, y mae pob un ohonynt yn cael eu cynnwys yn y cwrs blwyddyn sydd wedi’i leoli ar gampws SA1 y Brifysgol ar y Glannau yn Abertawe.

“Roedd strwythur y cwrs yn apelio ataf oherwydd ei fod yn darparu gwybodaeth hanfodol am y diwydiant a sgiliau ymarferol o fewn cyfnod cymharol fyr o amser,” meddai.

Un o uchafbwyntiau’r cwrs oedd faint o wybodaeth berthnasol am y diwydiant a gyflwynwyd o fewn un flwyddyn academaidd. 

Dywed: “Roeddwn i’n ffodus i ddysgu gan ddarlithwyr hynod gymwys ac ymroddedig. Yn benodol, roedd fy nhiwtor, a oedd hefyd yn dysgu Amcangyfrif, a’m darlithydd yn y Gyfraith Adeiladu yn hynod gefnogol ac yn chwarae rhan bwysig yn fy nhaith academaidd. Gwnaeth eu harweiniad, eu hanogaeth a’u harbenigedd proffesiynol wahaniaeth sylweddol i’m profiad dysgu” .

Dywed Alejandra fod ei phrofiad proffesiynol blaenorol yn caniatáu iddi gysylltu llawer o agweddau ar y cwrs yn uniongyrchol â phrosiectau adeiladu go iawn.  Roedd ei chefndir mewn gweinyddu contractau, goruchwylio prosiectau, gweithgareddau sy’n gysylltiedig â chostau a phrisio eiddo yn darparu cyd-destun gwerthfawr i’w hastudiaethau a’i helpu i werthfawrogi cymhwysiad ymarferol egwyddorion Mesur Meintiau.

Dywed: “Roedd symud o Honduras i Gymru yn gofyn i mi addasu nid yn unig yn academaidd ond hefyd yn ddiwylliannol, a oedd yn gwneud cwblhau’r cwrs hyd yn oed yn fwy gwerth chweil.

“Roedd dychwelyd i addysg ar ôl blynyddoedd lawer mewn ymarfer proffesiynol yn her sylweddol. Roedd astudio mewn ail iaith ac addasu i system addysg y DU yn gofyn am benderfyniad a dyfalbarhad.

“Byddwn yn argymell y cwrs hwn yn fawr i unrhyw un sydd â diddordeb mewn dilyn gyrfa mewn Mesur Meintiau neu ddatblygu eu gwybodaeth am y diwydiant adeiladu. Mae’r cwrs yn darparu sgiliau a gwybodaeth ymarferol, sy’n berthnasol i’r diwydiant tra’n cael ei addysgu gan ddarlithwyr profiadol a chefnogol. Mae’n cynnig sylfaen ardderchog ar gyfer astudiaethau pellach a datblygiad proffesiynol”.

Fel myfyriwr aeddfed gyda theulu, canfu Alejandra y gallai cydbwyso ei hymrwymiadau academaidd a phersonol yn ogystal â phwysau ariannol fod yn her, ond goresgynnodd y rhain trwy gadw ei hamcanion mewn golwg, ceisio cefnogaeth gan ddarlithwyr pan fo angen, a chynnal meddylfryd cadarnhaol trwy gydol ei hastudiaethau.

Yn broffesiynol dywed bod y cwrs wedi rhoi gwell dealltwriaeth iddi o ddiwydiant adeiladu’r DU ond mae hefyd wedi cynyddu ei hyder ac wedi dangos nad yw byth yn rhy hwyr i ddysgu sgiliau newydd, addasu i amgylchedd newydd a dilyn cyfleoedd gyrfa newydd.

Mae Alejandra bellach yn symud ymlaen i’r HND mewn Mesur Meintiau cyn cwblhau’r radd BSc mewn Mesur Meintiau.  Mae hi hefyd yn chwilio am gyfleoedd lle gall gyfuno ei phrofiad peirianneg sifil helaeth, gan ei bod wedi ennill Datganiad Cymhariaeth gan ENIC y DU sy’n dangos sut mae cymwysterau rhyngwladol yn cymharu â systemau addysg y DU. 

Gwybodaeth Bellach

Eleri Beynon

Pennaeth
Cyfathrebu Corfforaethol a Chysylltiadau Cyhoeddus     
E-bost: e.beynon@pcydds.ac.uk     
Ffôn: 01267 676790