Myfyrwraig graddedig yn canmol amgylchedd cefnogol campws Caerfyrddin y Drindod Dewi Sant

Mae Sophie Rockey yn llawn canmoliaeth am y gefnogaeth a gafodd wrth astudio’r BA mewn Addysg Gynradd gyda Statws Athro Cymwysedig (SAC) ar gampws Caerfyrddin y Drindod Dewi Sant.

Mae Sophie, o’r Garnant yn Rhydaman, yn graddio’r wythnos hon ac yn dweud mai ei hoff agwedd ar astudio yng Nghaerfyrddin oedd pa mor gefnogol oedd pawb.

“Roedd y darlithwyr bob amser yn hawdd mynd atynt ac yn barod i helpu, boed hynny gydag aseiniadau neu unrhyw bryderon oedd gennych”, meddai. “Maen nhw mor gefnogol ac yn wirioneddol eisiau i chi lwyddo.”

“Roedd staff yr adran Gwasanaethau Myfyrwyr yno pryd bynnag yr oedd angen cefnogaeth arnoch. Fe wnes i ffrindiau gwych trwy gydol y cwrs a gefnogodd fi ar hyd y ffordd. Roeddwn hefyd yn hoffi’r cydbwysedd rhwng prifysgol a lleoliad. Roedd gennym ddigon o amser mewn darlithoedd i ddyfnhau ein gwybodaeth am addysgu, ond fe wnaethom hefyd dreulio llawer o amser mewn ysgolion yn rhoi’r dysgu hwnnw ar waith.

Dewisodd Sophie y Drindod Dewi Sant oherwydd ei bod wedi derbyn argymhellion mor gadarnhaol gan gyn-fyfyrwyr. Mae hi’n dweud: 

“Dewisais y Drindod Dewi Sant oherwydd roeddwn wedi clywed cymaint o bethau cadarnhaol am y cwrs Addysg Gynradd gan athrawon a oedd wedi astudio yno. Roedd gan y cwrs enw da iawn, ac roeddwn i’n hoffi ei fod yn cynnig cydbwysedd da rhwng dysgu yn y brifysgol a lleoliadau ysgol. Roeddwn i’n gwybod fy mod eisiau llawer o brofiad yn yr ystafell ddosbarth ochr yn ochr â’m hastudiaethau, a rhoddodd y Drindod Dewi Sant y cyfle hwnnw i mi. Roedd yn teimlo fel y lle iawn i ddechrau fy nhaith i addysgu.”

Trwy gydol ei hastudiaethau, bu Sophie yn gweithio’n rhan-amser yn Ysgol Gymraeg Dyffryn y Glowyr a roddodd brofiad gwerthfawr iddi yn yr ystafell ddosbarth a’i helpu i fagu ei hyder a chaniatáu iddi ddatblygu ei haddysgu ochr yn ochr â’i hastudiaethau. Bonws ychwanegol yw ei bod wedi sicrhau ei swydd addysgu gyntaf. 

Dywed: “Rwy’n falch iawn o fod wedi sicrhau swydd addysgu Blwyddyn 3 yn Ysgol Gynradd Birchgrove, lle cwblheais fy lleoliad terfynol. Alla i ddim aros i barhau i fod yn rhan o’u tîm yn nhymor yr hydref. Rwy’n teimlo’n lwcus iawn fy mod wedi cael fy nghefnogi gan dîm staff mor galonogol, yn enwedig fy athro dosbarth a mentor, a wnaeth i mi deimlo’n rhan o’r ysgol o’r diwrnod cyntaf. 

“Fe wnaeth eu cefnogaeth fy helpu i dyfu mewn hyder a chadarnhau mai yn y byd addysgu yw lle rydw i eisiau bod. Rwy’n gyffrous i barhau i ddatblygu fel athro, dysgu gan gydweithwyr profiadol a chreu ystafell ddosbarth gadarnhaol lle mae plant yn mwynhau dysgu ac yn cyrraedd eu potensial llawn.”

Roedd ei hangerdd am addysgu yn amlwg trwy gydol ei hastudiaethau a’r elfen leoliad oedd ei hoff ran o’r cwrs. 

Dywed: “Roeddwn i wrth fy modd yn yr ystafell ddosbarth, ymgymryd â rôl yr athro a gweld faint tyfodd fy hyder o’r flwyddyn gyntaf i’r flwyddyn olaf. Fe wnes i hefyd gwrdd â chymaint o bobl gefnogol ar hyd y ffordd, gan gynnwys ffrindiau yn y brifysgol a mentoriaid gwych yn yr ysgol. 

Uchafbwynt gwirioneddol y cwrs oedd cael ei dewis i gyflwyno ei gwaith yn y gynhadledd addysgu flynyddol,  Anelu at Ragoriaeth, lle rhannodd ei strategaethau addysgu o’i lleoliad terfynol gyda gweithwyr addysg proffesiynol eraill.

Mae hi’n llawn canmoliaeth i’r cwrs gan ei fod yn darparu cydbwysedd da rhwng theori a phrofiad ymarferol, gan helpu myfyrwyr i adeiladu eu hyder trwy gydol y rhaglen radd tair blynedd.

Mae’n dod i’r casgliad: “Rwyf wedi dysgu cymaint dros y tair blynedd diwethaf, yn broffesiynol ac yn bersonol, ac rwy’n teimlo’n barod iawn i ddechrau fy ngyrfa addysgu.

Gwybodaeth Bellach

Eleri Beynon

Pennaeth
Cyfathrebu Corfforaethol a Chysylltiadau Cyhoeddus     
E-bost: e.beynon@pcydds.ac.uk     
Ffôn: 01267 676790