Myfyrwyr PCYDDS wedi’u Dewis ar gyfer Rhaglen Uchel ei Bri Cymru yn Fenis 2026

Mae Prifysgol Cymru Y Drindod Dewi Sant 2026 (PCYDDS) yn falch o ddatgan bod dau fyfyriwr Coleg Celf Abertawe, Em Dorion ac Eve Slatter wedi’u dewis ar gyfer y rhaglen uchel ei bri, Invigilator+ Cymru yn Fenis 2026, rhan o’r 61ain Arddangosfa Gelf Ryngwladol – La Biennale di Venezia. 

Mae Em Dorion ac Eve Slatter yn astudio BA Celf Gain:  Stiwdio, Safle a Chyd-destun yng Ngholeg Celf Abertawe, PCYDDS.  Mae cael eu dewis ar gyfer y rhaglen hon yn amlygu cryfder dull a arweinir gan stiwdio y brifysgol a’i hymrwymiad i feithrin artistiaid uchelgeisiol sydd wedi’u hymgysylltu’n feirniadol. 

Mae’r rhaglen Invigilator+ a arweinir gan Gyngor Celfyddydau Cymru, yn cynnig y cyfle i artistiaid ar ddechrau eu gyrfa, curaduron a myfyrwyr dreulio amser yn Fenis yn gweithredu fel llysgenhadon i Wales in Venice / Cymru yn Fenis. Mae cyfranogwyr yn datblygu profiad proffesiynol amhrisiadwy wrth gefnogi’r arddangosfa gan ymgysylltu â chynulleidfa ryngwladol yn un o ddigwyddiadau celf gyfoes fwyaf arwyddocaol y byd. 

Yn ogystal, mae PCYDDS yn falch o gydnabod llwyddiant dau raddedig diweddar a ddewiswyd drwy’r alwad agored genedlaethol:  Niamh O’Dobhain (Celf Gain) ac Abby Poulson (Ffotograffiaeth).  Roedd y ddau yn rhan o dîm Artes Mundi 11 yn ddiweddar ac maen nhw’n parhau i adeiladu gyrfaoedd yn y sector celfyddydau gweledol, gan adlewyrchu effaith barhaus cymuned greadigol PCYDDS. 

Mae cyflwyniad Cymru yn Fenis eleni, Sownd yn cael ei arwain gan yr artistiaid Manon Awst a Dylan Huw mewn cydweithrediad ag Oriel Myrddin ac Oriel Davies, gan arddangos y gorau o arfer artistig cyfoes Cymru ar lwyfan rhyngwladol. 

Meddai Alexander Duncan, Darlithydd mewn Celf Gain ac MA Dialogau Cyfoes yng Ngholeg Celf Abertawe, PCYDDS:  “Mae cyfleoedd fel Invigilator+ yn drawsnewidiol i artistiaid sy’n dod i’r amlwg.  Bydd Em ac Eve yn cael eu trochi mewn amgylchedd sy’n dwyn ynghyd arfer cyfoes arloesol â chyd-destun hanesyddol cyfoethog Fenis.  Mae profiadau fel hyn nid yn unig yn ehangu eu dealltwriaeth o rwydweithiau celf byd-eang ond hefyd eu hyder fel ymarferwyr sy’n llywio tirwedd greadigol gymhleth ac esblygol.” 

Ychwanegodd Caroline Thraves, Cyfarwyddwr Academaidd Celf a’r Cyfryngau yn PCYDDS: “Rydym yn hynod falch o Em ac Eve, yn ogystal â Niamh ac Abby, y mae eu cyflawniadau yn dangos dyfnder y  dalent o fewn Coleg Celf Abertawe.  Mae eu cyfranogiad yng Nghymru yn Fenis a’r tu hwnt yn dyst i bŵer addysg greadigol yn PCYDDS, lle mae myfyrwyr a graddedigion yn cael eu cefnogi i ddatblygu lleisiau unigryw a chyfrannu’n ystyrlon â’r sector diwylliannol yng Nghymru ac yn rhyngwladol.” 

Mae’r rhaglen Cymru yn Fenis yn parhau i ddarparu platfform hanfodol ar gyfer talent sy’n dod i’r amlwg, gan feithrin cysylltiadau rhyngwladol a hyrwyddo Cymru fel cenedl ddiwylliannol ddeinameg a blaengar. Cefnogir y bartneriaeth yn garedig gan Etifeddiaeth Goffa Brian Ross. 

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071