Myfyrwyr yn archwilio effaith camreoli gwastraff a'i ganlyniadau i gymunedau Cymru

Mae myfyrwyr Meistr ym Mhrifysgol Cymru Y Drindod Dewi Sant wedi clywed sut mae canlyniadau gwastraff wedi’i reoli’n wael yn y byd go iawn yn effeithio ar y wlad.

Wrth geisio mynd i’r afael â heriau gwastraff cynyddol gymhleth ledled Cymru, gwahoddwyd arbenigwyr blaenllaw yn y cwmni rheoli gwastraff Envirovue i draddodi darlith wadd i fyfyrwyr sy’n astudio Rheolaeth Eiddo a Chyfleusterau a Chadwraeth a Rheolaeth Amgylcheddol.

Clywodd myfyrwyr sut mae troseddau gwastraff, goruchwyliaeth annigonol a phrosesau trin anghyson yn parhau i effeithio ar gymunedau ac awdurdodau lleol. Fe wnaeth y sesiwn annog myfyrwyr i weld gwastraff fel deunydd sydd â gwerth parhaus yn hytrach na rhywbeth sy’n cael ei daflu.

Fe wnaeth Emily Handstock, Rheolwr Busnes gyda’r cwmni gwastraff arbenigol sy’n rhoi technoleg yn gyntaf, ymweld â’r brifysgol ddoe i drafod pwysigrwydd rheoli gwastraff yn effeithiol. Soniodd yn ei sgwrs am y modd y mae symud i ffwrdd o reolaeth gwastraff ‘traddodiadol’ yn llwybr uniongyrchol i lwyddiant a sut mae arloesi yn hanfodol wrth ddiogelu’r amgylchedd.

Dysgodd y myfyrwyr hefyd y dylid defnyddio systemau a phrosesau olrhain ar draws y diwydiant fel atebion i leihau allbwn gwastraff, dal troseddwyr gwastraff i gyfrif a lleihau allyriadau carbon yn unol â nodau cenedlaethol.

Meddai Lara Hopkinson, Uwch Ddarlithydd ym Mhrifysgol Cymru Y Drindod Dewi Sant: 

“Diolch yn fawr iawn i Emily am ddod i mewn a siarad â’n myfyrwyr Meistr am bwnc rydw i’n ei garu - rheoli gwastraff.

“Er y gallwn ddysgu’r holl theori i’n myfyrwyr, mae’n wych iddyn nhw wrando ar yr hyn y mae’n ei olygu yn ymarferol ac i ddeall sut mae cwmni fel Envirovue yn ceisio symud i ffwrdd o’r norm a gwneud arferion cylchol yn realiti.”

Ychwanegodd Emily:

 “Roedd yn fraint siarad â myfyrwyr sydd eisoes yn gweithio mewn rolau lle gallant ddylanwadu ar sut mae gwastraff yn cael ei reoli, neu a fydd yn ymgymryd â rolau o’r fath yn fuan. Pan nad yw gwastraff yn cael ei drin yn gywir, mae’r canlyniadau’n cael eu teimlo’n gyflym ac yn aml gan y cyhoedd. Trwy drin gwastraff fel adnodd yn hytrach nag ôl-ystyriaeth, mae potensial gwirioneddol i leihau niwed a chryfhau atebolrwydd ar draws y system.

“Gall gwell tryloywder a gefnogir gan offer data modern helpu i dynnu sylw at ble mae gwastraff yn cyrraedd yn y pen draw, pwy sy’n gyfrifol a sut y gellir lleihau risgiau. Mae rhannu’r mewnwelediad hwn gyda myfyrwyr yn gam pwysig wrth annog dulliau gwybodus, blaengar o fewn y genhedlaeth nesaf o ymarferwyr.”

I ddysgu rhagor am Envirovue a’i wasanaethau, ewch i: www.envirovue.io

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476