O Ddirgelion Llofruddiaeth i Droseddau Seiber: Partneriaeth PCYDDS yn Agor Drysau i Yrfaoedd Cyffrous

28 Tachwedd 2025

Mae partneriaeth rhwng Prifysgol Cymru Y Drindod Dewi Sant (PCYDDS), Gwasanaeth Tân ac Achub Canolbarth a Gorllewin Cymru a Heddlu De Cymru yn darparu cyfle i fyfyrwyr Coleg Gŵyr Abertawe gamu i esgidiau gweithwyr proffesiynol y gwasanaethau brys.

Gower College students attending Swansea Law School Academy events

Mae’r gweithgareddau wedi’u trefnu fel rhan o Academi Ysgol y Gyfraith Abertawe, PCYDDS mewn cydweithrediad â thîm Allgymorth a Recriwtio Myfyrwyr PCYDDS, Gwasanaeth Tân ac Achub Canolbarth a Gorllewin Cymru, Heddlu De Cymru a Choleg Gŵyr. Nod y bartneriaeth yw dangos nad yw addysg wedi’i chyfyngu i’r dosbarth yn unig a’i bod yn agor drysau i yrfaoedd cyffrous, gan lunio arweinwyr y dyfodol.

Mae’r gyfres o sesiynau trochi, gan gynnwys diwrnodau datrys troseddau Dirgelwch Llofruddiaeth, diwrnodau seiberdroseddau a hyd yn oed Heriau E-Chwaraeon, wedi bod yn boblogaidd iawn gyda’r myfyrwyr, gan gynnig cyfle iddynt ymestyn y tu hwnt i’r ystafell ddosbarth er mwyn cael profiad ymarferol o’r swyddi hyn.

Meddai Victoria Slade o dîm Allgymorth a Recriwtio Myfyrwyr PCYDDS: “Rydym wedi lansio cyfres gyffrous o ddigwyddiadau addysgol sy’n cyfuno dysgu gyda gweithredu yn y byd go-iawn. Mae’r digwyddiadau wedi’u cynllunio i ysbrydoli arweinwyr y sectorau cyfreithiol a’r gwasanaethau cyhoeddus yn y dyfodol.

“Mae’r gweithgareddau’n cynnwys dehongli cliwiau mewn efelychiadau dirgelwch llofruddiaeth i ddadansoddi haenau cymhleth seiberdroseddu, drwy chwarae rôl byd go iawn y gweithwyr proffesiynol. O gamu i esgidiau swyddog prawf neu ddysgu sut i reoli heriau diogelwch y cyhoedd gyda’r gwasanaeth tân, mae pob eiliad wedi’i gynllunio i fod yn llawn profiadau o’r byd go iawn.”

Y Sesiynau Dirgelwch Llofruddiaeth oedd uchafbwynt arbennig y profiadau yn ôl y myfyrwyr a weithiodd mewn timau i ddatrys achosion troseddol cymhleth, gan ddatblygu eu sgiliau ymchwilio a dyfnhau eu dealltwriaeth o gyfraith droseddol. Cynlluniwyd y sesiynau, nid yn unig i fod yn brofiad hwyliog ac egnïol, ond hefyd i feithrin gwaith tîm, meddwl beirniadol, a’r gallu i wneud penderfyniadau o dan bwysau – pob un ohonynt yn sgiliau allweddol wrth orfodi’r gyfraith ac ymarfer cyfreithiol.

Yn ogystal, rhoddodd y Diwrnod Seiberdroseddau gyfle i fyfyrwyr fynd i’r afael â maes bygythiadau diogelwch ar-lein sy’n prysur gynyddu, gan gynnig offer ymarferol iddynt er mwyn deall a mynd i’r afael â seiberdroseddau – sgil sy’n dod yn fwyfwy hanfodol yn yr oes ddigidol heddiw. Yn y cyfamser, cynigodd y Diwrnod E-Chwaraeon safbwynt arall, gan ddod ag ymdeimlad o hwyl yn ogystal â thynnu sylw at y croestoriadau cynyddol rhwng technoleg, y gyfraith a chystadleuaeth.

Meddai Rebecca Mugford o Goleg Gŵyr Abertawe: Mae “Academi Ysgol y Gyfraith Abertawe yn caniatáu i’n dysgwyr yn yr ail flwyddyn brofi sut beth yw bywyd prifysgol yn PCYDDS.

“Mae ein dysgwyr yn edrych ymlaen at y sesiynau pob wythnos. Mae’r sesiynau’n caniatáu iddynt ddysgu a datblygu’r sgiliau trosglwyddadwy sydd eu hangen arnynt ar gyfer addysg uwch a chyflogaeth yn y dyfodol.

“Mae’r staff yn PCYDDS yn groesawgar ac yn gyfeillgar iawn, maen nhw’n mynd y tu hwnt i’r gofyn i roi’r profiad gorau i ni.

“Roedd ein dysgwyr blaenorol sydd wedi mynychu’r Academi ac wedi gwneud cais i PCYDDS, yn teimlo’n gyffyrddus i wneud hynny, ar ôl bod yn yr amgylchedd o’r blaen a chwrdd â’r staff a’r academyddion.

“Mae’r dysgwyr hyn wedi bod yn symud ymlaen drwy eu rhaglenni gradd ac maen nhw’n cymryd rhan mewn gweithgareddau gwirfoddoli gyda gwahanol sefydliadau sector lleol, diolch i PCYDDS”.

Meddai myfyrwyr Coleg Gŵyr Abertawe Ella a Grace, a gymerodd ran yn y rhaglen:

“Ers bod yn yr Academi, mae wedi agor ein llygaid i’r brifysgol ac mae hyn wedi dangos y cyfleoedd sydd ar gael i ni. Mae wedi profi nad oes rhaid i ddysgu ddigwydd yn yr ystafell ddosbarth gan ein bod wedi bod ar lawer o deithiau, er enghraifft i bencadlys y gwasanaeth tân a phencadlys yr heddlu. Rydym wedi siarad â llawer o ymwelwyr yn y brifysgol ac wedi cymryd rhan mewn gweithgareddau. Mae’r staff mor gymwynasgar ac yn barod pob amser i gamu i mewn a rhoi cyngor ac awgrymiadau i ni. Mae hwn wedi bod yn brofiad anhygoel ac maen nhw wedi gwneud i ni deimlo mor gyffyrddus, cawsom hyd yn oed pitsa a hwdis”.

Meddai Laura Knight, Darlithydd yn Ysgol y Gyfraith Abertawe: “Ar ôl misoedd o drochi yn y rhaglenni arloesol hyn, bydd myfyrwyr yn graddio mewn seremoni graddio – arwydd traddodiadol o gyflawniad academaidd, sy’n symboleiddio’r holl waith caled, y sgiliau a’r profiad y maen nhw wedi’u cael drwy gydol eu hastudiaethau.

“Mae’r digwyddiadau hyn yn fwy na chyfle i wisgo’n ffansi; maen nhw’n cynrychioli uchafbwynt trylwyredd academaidd a dysgu ymarferol yn y byd go iawn.

“Wrth i Ysgol y Gyfraith Abertawe barhau i bontio’r blwch rhwng damcaniaeth ac arfer, mae’r digwyddiadau cydweithredol hyn yn dangos y gall dysgu fod mor deinameg a chyffrous ag y mae’n addysgol”.

Drwy roi cyfle i fyfyrwyr ymgysylltu a datrys troseddau, diogelwch digidol a senarios diogelwch y cyhoedd, nod Ysgol y Gyfraith Abertawe yw llunio’r genhedlaeth nesaf o weithwyr proffesiynol sy’n barod nid yn unig i astudio’r gyfraith ond i’w byw.

Daeth Laura Knight i’r casgliad: “Mae wedi bod yn bleser gweithio gyda dysgwyr Coleg Gŵyr drwy gydol eu taith academaidd. Mae gweld hyder y dysgwyr yn tyfu o wythnos i wythnos wrth iddynt ymgyfarwyddo â lleoliad y brifysgol yn amhrisiadwy. Mae adborth gan y garfan ddiweddaraf wedi bod yn hynod gadarnhaol gyda llawer o’r dysgwyr yn dweud nad oedden nhw’n meddwl bod y brifysgol yn opsiwn iddynt cyn ymuno â’r academi, ond diolch i’r profiad hwn, mae bellach yn opsiwn maen nhw’n ei ystyried. Yn ogystal, roeddwn am fynegi fy niolch i bob un o’r tîm a oedd yn rhan o’r gweithgareddau a’r sefydliadau lleol sydd wedi darparu mewnwelediadau amhrisiadwy yn ystod y sesiynau”.