PCYDDS i Gynnal Cynhadledd Ryngwladol Residuum 2026 sy'n Archwilio Dyfodol Celf, Dylunio a Thechnoleg

Bydd Prifysgol Cymru Y Drindod Dewi Sant (PCYDDS) yn cynnal Cynhadledd Ryngwladol flynyddol Residuum 2026 rhwng 5 ac 8 Mai, gan ddod â chymuned fyd-eang o ysgolheigion, artistiaid a dylunwyr at ei gilydd i archwilio dyfodol celf, dylunio, addysg a thechnoleg.

Mae’r gynhadledd ddwyieithog pedwar diwrnod, a gyflwynir yn Saesneg a Mandarin, yn cynnig rhaglen ddeinamig a hygyrch sy’n cyfuno cyfranogiad ar-lein â phrofiadau trochi byw a ffrydir o ystafell drochi’r Brifysgol, adnodd o’r radd flaenaf ar Gampws Glannau Abertawe. Wedi’i chynllunio i ymgysylltu â chynulleidfaoedd wyneb yn wyneb ac o bell, mae Residuum 2026 yn creu platfform rhyngweithiol ar gyfer deialog, cydweithredu ac arloesi rhyngwladol. 

Bydd Residuum 2026 yn cynnwys prif sgyrsiau a sgyrsiau gwadd gan feddylwyr rhyngwladol blaenllaw, gan gynnwys:

• Charlotte von Essen (Ysgol Economeg Stockholm), yn cyflwyno “Education That Frees: A Human‑Centred Framework for Education in an Age of AI”, yn archwilio sut y gall systemau addysg gadw gwerthoedd dynol a chreadigrwydd mewn cyd-destunau a yrrir yn gynyddol gan AI.
• Dr Michael Schofield (Prifysgol Leeds), yn cyflwyno sgwrs sy’n canolbwyntio ar y berthynas rhwng AI, celf a gwneud ffilmiau, gan archwilio arferion creadigol sy’n dod i’r amlwg a goblygiadau deallusrwydd peirianyddol ar gyfer adrodd straeon gweledol. 

Trosolwg o Raglen y Gynhadledd 

Diwrnod 1 – Dydd Llun 5 Mai
Mae’r gynhadledd yn agor gyda phrif raglen ar-lein a ffrydir yn fyw, sy’n cynnwys siaradwyr gwadd a thrafodaethau byw. Mynychir ar-lein yn unig, gan ganiatáu i gyfranogwyr rhyngwladol ymuno o bob cwr o’r byd. 

Diwrnod 2 - Dydd Mawrth 6 Mai
Bydd rhaglen wedi’i churadu o gyflwyniadau cynhadledd a recordiwyd ymlaen llaw yn cael ei rhyddhau ar-lein, gan gynnig mynediad hyblyg i gyfranogwyr i bapurau ymchwil, prosiectau creadigol, a sesiynau thematig. Mynychir ar-lein yn unig. 

Diwrnod 3 - Dydd Mercher 7 Mai
Cynhelir sgyrsiau cynhadledd y Ddoethuriaeth Broffesiynol a ffrydir yn fyw ac Arddangosfa’r MA Arfer Creadigol, wedi’u ffrydio o ystafell drochi y Drindod Dewi Sant. Gall cynulleidfaoedd fynychu’n bersonol yn Adeilad Fforwm, Campws Glannau Abertawe, neu wylio ar-lein. 

Diwrnod 4 - Dydd Iau 8 Mai
Mae’r diwrnod olaf yn parhau gyda chyflwyniadau’r Ddoethuriaeth Broffesiynol a ffrydir yn fyw ac Arddangosfa’r MA Arfer Creadigol, unwaith eto ar gael i gynulleidfaoedd wyneb yn wyneb ac ar-lein, gan ddarparu llwyfan ar gyfer ymchwil arloesol a gwaith seiliedig ar arfer. 

Themâu a Ffocws

Mae Residuum 2026 yn tynnu sylw at ehangder ac uchelgais ymchwil greadigol gyfoes trwy themâu yn cynnwys:

• Hiraeth: Gorffennol Coll neu Ddyfodol Coll
• Dychymyg Trochol
• AI: Chwyldro a Safbwyntiau’r Dyfodol
• Deall Treftadaeth fel Symbol o’r Dyfodol
•  
• Cyfathrebu mewn Byd Cyfoes
• Methodolegau Arloesol
• Diffinio eich Arfer yn Arwain Newid
• Dyfodol Diwydiannau Creadigol Tsieina 

Wedi’i threfnu gan raglen Doethuriaeth Broffesiynol PCYDDS mewn Celf a Dylunio a’r rhaglen MA Celf a Dylunio, nod y gynhadledd yw meithrin deialog feirniadol, herio paradeimau confensiynol ac archwilio datblygiadau blaengar ar draws disgyblaethau creadigol. 

Dywedodd Kylie Boon, Darlithydd mewn Celf a Dylunio yn y Drindod Dewi Sant: “Mae Residuum 2026 yn gyfle cyffrous i ddod â chymuned wirioneddol ryngwladol o bobl greadigol ac ymchwilwyr at ei gilydd i archwilio’r heriau a’r cyfleoedd sy’n llunio dyfodol celf a dylunio. Trwy gyfuno technolegau trochol â safbwyntiau amrywiol, mae’r gynhadledd yn creu gofod ar gyfer cyfnewid ystyrlon, arloesi, a ffyrdd newydd o feddwl am arfer, addysg, a chydweithredu byd-eang.” 

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071