Prifysgol Cymru Y Drindod Dewi Sant yn lansio Hwb Mabwysiadu Roboteg - De Cymru i gyflymu mabwysiadu roboteg, cynhyrchiant a sgiliau

Mae Prifysgol Cymru Y Drindod Dewi Sant (PCYDDS) yn arwain Hwb Mabwysiadu Roboteg - De Cymru, menter newydd gwerth miliynau o bunnoedd a gyflwynir fel rhan o Raglen Mabwysiadu Roboteg genedlaethol Innovate UK.

Wedi’i leoli yn Ardal Arloesi SA1 Abertawe, bydd yr Hwb yn darparu lle ffisegol i fusnesau gael mynediad at dechnolegau roboteg, arbenigedd, arddangosiadau a chymorth ymarferol.

Bydd cwmnïau’n gallu archwilio cymwysiadau posibl, ymgymryd â gweithgaredd dichonoldeb a phrofi-cyn-buddsoddi, a gweithio gydag arbenigwyr technegol cyn ymrwymo i fuddsoddiad.

Bydd yr Hwb yn cefnogi busnesau ar draws sectorau gan gynnwys gweithgynhyrchu, ynni, cyfleustodau a seilwaith, tra hefyd ar gael i ddiwydiannau eraill lle gall roboteg ddarparu budd mesuradwy.

Bydd y gefnogaeth yn cynnwys diagnosteg a chyngor annibynnol, gweithgaredd arddangos a phrofi-cyn-buddsoddi ymarferol, cymorth technegol arbenigol, broceriaeth i bartneriaid technoleg ac integreiddio priodol, datblygu’r gweithlu a chysylltiadau â chyfleoedd cyllid a chyllido perthnasol.

Dywedodd Richard Morgan, Deon Cynorthwyol Cyfadran Gwyddoniaeth a Chelf Prifysgol Cymru Y Drindod Dewi Sant, sy’n arwain y fenter: “Yn hytrach na datblygu technolegau roboteg newydd, bydd yr Hwb yn helpu busnesau i nodi lle gall awtomeiddio ychwanegu gwerth, rhoi cynnig ymarferol ar dechnolegau profedig, profi a dilysu atebion posibl, a chael mynediad at yr arbenigedd cywir cyn gwneud penderfyniadau.

“Mae llawer o sefydliadau’n cydnabod manteision posibl roboteg ond maent yn parhau i fod yn ansicr ynghylch ble i ddechrau neu sut i’w mabwysiadu’n effeithiol. Drwy gynnig cyngor diduedd a chyfleoedd i brofi atebion cyn ymrwymo i fuddsoddi, bydd yr Hwb yn helpu busnesau i wella cynhyrchiant, ansawdd, diogelwch, gwydnwch a chystadleurwydd hirdymor.” 

Mae’r Hwb yn dod â chonsortiwm helaeth o weithgynhyrchwyr roboteg, integreiddwyr systemau, cwmnïau technoleg arbenigol, darparwyr sgiliau, partneriaid ariannu a safleoedd arddangos diwydiannol ynghyd.

Yn ogystal â chyfleusterau presennol Y Drindod Dewi Sant ar gyfer roboteg, awtomeiddio a gweithgynhyrchu digidol yn Abertawe, a mynediad at safleoedd partneriaid ac arddangoswyr ledled y rhanbarth, bydd yr Hwb yn rhoi mynediad i fusnesau at ystod eang o dechnolegau ac arbenigedd.

Bydd yr Hwb hefyd yn chwarae rhan bwysig wrth ddatblygu sgiliau’r dyfodol. Bydd myfyrwyr, prentisiaid a gweithwyr o sefydliadau sy’n cymryd rhan yn cael profiad ymarferol o roboteg ddiwydiannol uwch trwy brentisiaethau gradd, rhaglenni addysg uwch, Datblygiad Proffesiynol Parhaus (CPD) a hyfforddiant diwydiannol.

Dywedodd yr Athro Elwen Evans CB, Is-Ganghellor PCYDDS: “Mae Hwb Mabwysiadu Roboteg - De Cymru yn dangos y rôl hanfodol y gall prifysgolion ei chwarae wrth ddod â byd academaidd, diwydiant a phartneriaid technoleg ynghyd i fynd i’r afael â heriau’r byd go iawn.

“Drwy arwain y cydweithrediad hwn, mae’r brifysgol yn helpu busnesau i groesawu arloesedd yn hyderus, gan greu cyfleoedd newydd i’n myfyrwyr, ein prentisiaid a’n gweithlu yn y dyfodol.”

Ychwanegodd Richard Morgan: “Yr hyn sy’n gwneud yr Hwb Mabwysiadu Roboteg - De Cymru yn unigryw yw cryfder ac ehangder y bartneriaeth sydd y tu ôl iddo; mae ein partneriaid yn cynnwys Avallan Ltd, Didactic Services Ltd, Majotech Partnership Ltd, Poet Systems Ltd, Promaterial Ltd, Sutro Group Ltd a Vodafone Ltd. Rydym hefyd yn cael ein cefnogi gan Omron, Boston Dynamics, ABB a TWI Wales.

“Drwy ddod â hyn oll ynghyd, rydym wedi creu ecosystem gydweithredol sy’n rhoi mynediad i fusnesau at yr arbenigedd, y technolegau a’r gefnogaeth sydd eu hangen arnynt ym mhob cam o’u taith awtomeiddio.”

Beth sy’n digwydd nesaf?

Bydd busnesau sydd â diddordeb mewn roboteg ac awtomeiddio yn gallu ymgysylltu â’r Hwb i drafod eu hanghenion a nodi’r camau nesaf mwyaf priodol, o ddiagnosteg camau cynnar hyd at astudiaethau dichonoldeb, profi-cyn-buddsoddi, broceriaeth, datblygu’r gweithlu a chymorth gweithredu.

I gael rhagor o fanylion ar sut y gall busnesau ymgysylltu â’r Hwb, cysylltwch â roboticshub@uwtsd.ac.uk

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071