Y Drindod Dewi Sant ar frig cynghrair ar gyfer Pensaernïaeth

12 Mehefin 2026

Mae Prifysgol Cymru Y Drindod Dewi Sant (PCYDDS) wedi cael ei gosod yn 1af yn y DU ar gyfer Pensaernïaeth yng Ngwobrau Prifysgol Unifresher 2027.

Final Year UWTSD Architecture students at their Prize Giving evening

Asesodd y safle 55 o brifysgolion y DU sy’n cynnig Pensaernïaeth ar draws wyth mesur sy’n canolbwyntio ar fyfyrwyr, gan gynnwys ansawdd addysgu, boddhad myfyrwyr, cymorth academaidd, enillion graddedigion, costau byw a chynaliadwyedd.

Daeth cwrs Pensaernïaeth y Drindod Dewi Sant ar frig y safle trwy berfformio’n gryf o ran boddhad myfyrwyr, cefnogaeth academaidd ac ansawdd addysgu tra hefyd yn elwa o gost byw isel a chynaliadwyedd y campws.

Dywedodd y myfyriwr trydedd flwyddyn, Carys Davies, o Lanelli “Byddwn yn argymell astudio Pensaernïaeth yn y Drindod Dewi Sant oherwydd yr amgylchedd stiwdio gefnogol a’r anogaeth i ddatblygu eich hunaniaeth ddylunio eich hun.

“Trwy gydol y cwrs, rwyf wedi cael fy herio i feddwl yn greadigol tra hefyd yn datblygu’r sgiliau technegol a phroffesiynol sydd eu hangen ar gyfer ymarfer.

“Mae’r tiwtoriaid yn hawdd mynd atynt ac yn wirioneddol fuddsoddi mewn helpu myfyrwyr i dyfu, gan ddarparu adborth ac arweiniad gwerthfawr trwy gydol pob prosiect. Rwyf wedi mwynhau archwilio materion byd go iawn trwy ddylunio a dysgu sut y gall pensaernïaeth effeithio’n gadarnhaol ar gymunedau a lleoedd.

“Mae’r cwrs wedi rhoi’r hyder i mi wthio fy syniadau ymhellach a pharatoi ar gyfer gyrfa mewn pensaernïaeth yn y dyfodol”.

Ychwanegodd ei chyd-fyfyrwraig Wiktoria Dolecka: “Mae fy amser yn y brifysgol wedi bod yn brofiad anhygoel, a’r rhan fwyaf gwerthfawr yw’r gymuned agos. Roedd y dosbarthiadau llai o faint yn gwneud i’r stiwdio deimlo fel teulu, a ddaeth â llawenydd ac ysbrydoliaeth i bawb. Roedd yr amgylchedd hwn hefyd yn caniatáu cefnogaeth amhrisiadwy gan y darlithwyr, a ddaeth i adnabod ni a’n gwaith yn unigol. Ar y cyfan, rhoddodd y cwrs gymaint o hyder i mi ac fe wnaeth fy helpu i dyfu fel person, byddwn yn bendant yn ei argymell.”

Dywedodd Ian Standen, Cyfarwyddwr y Rhaglen Bensaernïaeth,: “Rydym wrth ein bodd i gael ein cydnabod fel y rhaglen Bensaernïaeth orau yn y DU, gan fod y safle hwn yn dilysu ein hymrwymiad i amgylchedd stiwdio gefnogol lle mae myfyrwyr yn cael eu hannog i ddatblygu eu hunaniaeth ddylunio eu hunain. Trwy gynnal dosbarthiadau llai o faint ac awyrgylch ‘teuluol’ agos, rydym yn sicrhau bod ein tiwtoriaid yn buddsoddi’n ddwfn yn nhwf unigol pob myfyriwr, gan eu helpu i ennill y sgiliau technegol a’r hyder sydd eu hangen i gael effaith gadarnhaol ar gymunedau trwy bensaernïaeth”.

Roedd cyrsiau Celf a Dylunio Y Drindod Dewi Sant hefyd yn amlwg, gan gael eu gosod yn 5ed ledled y DU yn y safleoedd sy’n mesur y meysydd sy’n gysylltiedig fwyaf â phrofiad myfyrwyr, cyflogadwyedd a boddhad.

Dywedodd Dr Mark Cocks, Deon Athrofa Gwyddoniaeth a Chelf Cymru: “Rydym wrth ein bodd bod ein cyrsiau Pensaernïaeth a Chelf a Dylunio wedi cael eu cydnabod yng Ngwobrau Prifysgol Unifresher. Er bod Unifresher yn cynnig persbectif amgen i dablau cynghrair prifysgolion traddodiadol, mae hyn yn cydnabod ansawdd y profiad i’n myfyrwyr, cryfder ein cefnogaeth i’n myfyrwyr, rhagoriaeth ein haddysgu, a nodweddion ein hamgylchedd campws.”

Mae’r safleoedd Unifresher, a gymharodd 124 o sefydliadau, yn cyfuno blaenoriaethau myfyrwyr â data byd go iawn ar draws ansawdd addysgu, cyflogadwyedd, costau byw, bywyd nos, cynaliadwyedd, a boddhad cyffredinol myfyrwyr. Trwy flaenoriaethu canlyniadau myfyrwyr a phrofiad cyffredinol y myfyrwyr a llais y myfyrwyr, mae’r safleoedd yn cynnig golwg newydd ar berfformiad prifysgol, gan dynnu sylw at sefydliadau sy’n rhagori yn gyson mewn ansawdd addysgu, cefnogaeth myfyrwyr, a boddhad.