Myfyriwr graddedig o Dde-ddwyrain Llundain yn gosod ei golygon ar fusnes gofal plant yn dilyn gradd arweinyddiaeth

Pan benderfynodd Denise McFarlane, 50 oed, ddychwelyd i addysg, roedd hi’n chwilio am fwy na dim ond gradd. Roedd hi eisiau adeiladu ar ddegawdau o brofiadau bywyd a phroffesiynol, datblygu ei sgiliau arwain, a chreu cyfleoedd newydd ar gyfer y dyfodol.

Heddiw mae Denise, o Dde-ddwyrain Llundain, yn dathlu graddio o Gampws Llundain Prifysgol Cymru Y Drindod Dewi Sant (PCYDDS) gyda BA mewn Arweinyddiaeth a Rheolaeth.

Dywedodd Denise fod dewis dychwelyd i’r brifysgol wedi’i ysbrydoli gan ffrind, a oedd yn credu y byddai amgylchedd dysgu cefnogol PCYDDS yn gweddu’n berffaith iddi.

 “Roedd fy ffrind yn gallu gweld faint roeddwn i’n mwynhau gweithio gyda phobl eraill a’u cefnogi. Dywedodd wrthyf y byddai cymuned glos PCYDDS yn addas iawn i mi, ac roedd hi yn llygad ei lle.

 “Doeddwn i ddim eisiau bod yn eistedd mewn darlithfa fawr gyda neb yn f’adnabod. Roeddwn i eisiau rhywle sy’n gwerthfawrogi trafodaeth, cydweithredu a dod i adnabod y bobl o’ch cwmpas. Dyna’n union beth rydw i wedi’i ddarganfod yma.”

Dewisodd Denise y BA Arweinyddiaeth a Rheolaeth oherwydd ei bod eisiau cryfhau ei gwybodaeth bresennol gyda chymhwyster a gydnabyddir yn rhyngwladol wrth ddatblygu sgiliau arweinyddiaeth ymarferol y gallai eu cymhwyso yn y gweithle.

 “Fy nod oedd troi fy mlynyddoedd o brofiad proffesiynol a bywyd yn gymhwyster ffurfiol wrth fireinio fy meddwl strategol. Roeddwn i eisiau deall mwy am ymddygiad sefydliadol, arwain a sut mae timau llwyddiannus yn gweithio gyda’i gilydd.

 “Yn y dyfodol, hoffwn lansio fy musnes gofal plant fy hun a defnyddio popeth rydw i wedi’i ddysgu i adeiladu tîm cryf a chreu diwylliant gwaith cadarnhaol.”

Un o’r agweddau y mae Denise wedi’i fwynhau fwyaf yw’r awyrgylch cefnogol a grëwyd gan ddosbarthiadau llai, lle mae myfyrwyr yn cael eu hannog i rannu syniadau a dysgu oddi wrth ei gilydd.

“Mae’r trafodaethau yn yr ystafell ddosbarth oedd un o’r uchafbwyntiau mwyaf i mi. Mae pawb yn dod â phrofiadau a safbwyntiau gwahanol, ac rydyn ni’n gallu herio ffordd o feddwl ein gilydd mewn ffordd gadarnhaol iawn. Mae’r darlithwyr yn annog y sgyrsiau hynny, sy’n gwneud dysgu yn llawer mwy diddorol.”

Roedd hi hefyd yn gweld dull ymarferol y cwrs yn arbennig o werthfawr.

 “Mae edrych ar astudiaethau achos busnes go iawn a chymhwyso damcaniaethau arwain i heriau modern yn y gweithle wedi fy helpu i feddwl yn wahanol. Mae wedi rhoi fframwaith ymarferol i mi yr wyf yn gwybod y byddaf yn ei ddefnyddio ymhell ar ôl i mi raddio.”

Fel llawer o fyfyrwyr aeddfed, mae Denise yn cydbwyso astudio ochr yn ochr â chyfrifoldebau bob dydd, ond mae’n dweud bod y gefnogaeth sydd ar gael yn PCYDDS wedi gwneud yr holl wahaniaeth.

 “Roedd heriau wrth ddychwelyd i addysg. Daeth rheoli amser yn bwysig iawn, ond doeddwn i byth ar fy mhen fy hun. Mae’r darlithwyr, Tim, Lizeta a Prithwa, bob amser wedi bod yn hygyrch a chefnogol, ac mae ein dosbarth wedi adeiladu ymdeimlad gwirioneddol o gymuned lle mae pawb yn helpu ei gilydd.”

Mae Denise yn dweud fod y profiad wedi newid ei hyder a’r ffordd y mae’n mynd ati i arwain. 

 “Yn academaidd, rydw i wedi magu cymaint o hyder. Yn broffesiynol, rwy’n meddwl llawer yn fwy strategol am sefydliadau, arweinyddiaeth, a datrys problemau nag erioed o’r blaen.

 “Mae graddio yn rywbeth rwy’n hynod falch ohono. Mae’r radd hon wedi rhoi’r hyder i mi ddilyn fy uchelgeisiau, ac rwy’n gyffrous i gyfuno popeth rydw i wedi’i ddysgu â fy mhrofiad bywyd wrth i mi ddechrau adeiladu fy musnes gofal plant fy hun.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071