Wythnos Ddylunio 2026 yn cysylltu myfyrwyr dylunio graffeg y Drindod Dewi Sant â’r diwydiant

Mae’r cwrs Dylunio Graffig (BA Anrh) yng Ngholeg Celf Abertawe Prifysgol Cymru Y Drindod Dewi Sant wedi dod ag Wythnos Ddylunio 2026 i ben yn llwyddiannus. Rhaglen flynyddol yw hon o sgyrsiau, gweithdai, briffiau byw a gweithgareddau cydweithredol sy’n cysylltu myfyrwyr yn uniongyrchol ag arfer y diwydiant.

Wedi’i chyflwyno dros wythnos lawn, daeth yr Wythnos Ddylunio â myfyrwyr, staff a gweithwyr proffesiynol creadigol ynghyd ar gyfer rhaglen ddwys a gynlluniwyd i adlewyrchu realiti arfer dylunio cyfoes wrth gefnogi creadigrwydd, cydweithredu a chyflogadwyedd.

Wrth adfyfyrio ar bwysigrwydd yr Wythnos Ddylunio, dywedodd Donna Williams, Rheolwr y Rhaglen Dylunio Graffig (BA Anrh) yn y Drindod Dewi Sant:

“Rwy’n credu’n gryf mewn creu’r amgylchedd cywir. Pan fydd amgylchedd dysgu yn cael ei lunio’n fwriadol i fod yn ddiogel, yn ddifyr ac yn wirioneddol gynhwysol yn ei weithrediad, nid yn unig fel geiriau mewn dogfen bolisi, mae’r posibiliadau creadigol yn ddiddiwedd, ac mae bod yn rhan o hyn yn rhywbeth i fod yn falch ohono.

“Mae’r Wythnos Ddylunio yn dangos y dull hwn ar waith, gan gyfuno gweithgarwch sy’n canolbwyntio ar y diwydiant gyda chydweithredu, deialog ac arbrofi, ac annog myfyrwyr i ymgysylltu’n hyderus â heriau proffesiynol mewn lleoliad cefnogol.”

Dyluniwyd a chrëwyd yr hunaniaeth weledol ar gyfer Wythnos Ddylunio 2026 gan Martha Stephens, myfyrwraig ail flwyddyn, gyda’r brandio wedi’i roi ar ddeunyddiau hyrwyddo a digwyddiadau trwy gydol yr wythnos.

Agorodd yr wythnos gyda briff byw gan Sky, a gyflwynwyd fel rhan o berthynas hirsefydlog rhwng y Brifysgol a’r sefydliad. Mae’r bartneriaeth wedi datblygu trwy gyflogaeth i raddedigion a chydweithrediad parhaus, gyda nifer o gyn-fyfyrwyr Dylunio Graffig (BA Anrh) bellach yn gweithio mewn rolau uwch yn Sky. Yn flaenorol, mae cyn-fyfyrwyr wedi dychwelyd i’r cwrs yn ystod mentrau fel yr Wythnos Ddylunio i rannu eu profiad a mewnwelediad proffesiynol gyda myfyrwyr cyfredol. Bydd y tîm o fyfyrwyr buddugol - Tavian James, Bethany Martin, Jack Clements a Joe Nash - yn mynd ymlaen i gyflwyno eu gwaith yn Sky Creative yn Llundain.

Dydd Mawrth, gweithiodd myfyrwyr ar set friff byw gan ffowndri teip a stiwdio ddylunio Foundary 37 (F37), dan arweiniad y Cyfarwyddwr Dylunio Duncan Gravestock. Roedd y briff yn annog y defnydd o ddulliau cydweithredol ac arbrofol ar gyfer dylunio teipograffig. Dewiswyd Lowri James, Jack Lewis, Lewys Davies, Tavian James a Gracie Cant-Bull yn enillwyr, gyda thrafodaethau ar y gweill ynghylch y posibiliad o ddatblygu’r ffurfdeip buddugol ymhellach, y tu hwnt i’r gweithdy.

Roedd cyfleoedd i ymgysylltu ymhellach â’r diwydiant trwy gydol yr wythnos yn cynnwys gweithdai, sgyrsiau a sesiynau ymarferol gyda phobl greadigol gwadd, ochr yn ochr â chyfleoedd i fyfyrwyr brofi syniadau, mireinio llifoedd gwaith proffesiynol ac archwilio ystod o lwybrau gyrfa o fewn y diwydiannau creadigol. 

Rhannodd Lowri Bowen, myfyrwraig ail flwyddyn, ei phrofiad o’r Wythnos Ddylunio, gan dynnu sylw at sut y gwnaeth y rhaglen ddwys helpu i ddatblygu hyder, sgiliau cydweithredu a dealltwriaeth myfyrwyr o weithio yn y diwydiannau creadigol:

“Roedd yr Wythnos Ddylunio yn hwyl, yn heriol ac yn hynod werthfawr. Mae gweithio ar friffiau diwydiant byw wedi ein helpu i gydweithio â phobl newydd, gwthio ein sgiliau dylunio o dan gyfyngiadau amser a chael mewnwelediad go iawn i sut y gallem weithio fel dylunwyr ar ôl y Brifysgol. Mae derbyn sylwadau cadarnhaol ac adeiladol gan weithwyr proffesiynol y diwydiant wedi rhoi hwb i’m hyder ac wedi gwneud i’m nodau gyrfa deimlo’n gyraeddadwy.

Profiadau fel hyn sy’n gwneud y cwrs Dylunio Graffig yn y Drindod Dewi Sant mor werthfawr – maen nhw wedi rhoi sgiliau ymarferol, cysylltiadau â’r diwydiant a hyder i mi, ac fe fydd y rheini’n aros gyda mi ymhell ar ôl graddio.”

Ochr yn ochr â gweithgarwch y diwydiant, roedd yr Wythnos Ddylunio hefyd yn cynnwys mentrau dan arweiniad myfyrwyr, gan gynnwys Noson Gwis gymunedol. Cododd y digwyddiad dros £200 tuag at arddangosfa Dylunio Graffig y drydedd flwyddyn a daeth â myfyrwyr a staff o bob rhan o Goleg Celf Abertawe at ei gilydd.

Daeth yr Wythnos Ddylunio i ben ddydd Gwener gyda rhaglen o gyflwyniadau terfynol, arddangosfeydd a’r sesiwn galw heibio Holi’r Darlithydd, gan gynnig cyfle i fyfyrwyr drafod gwaith sydd ar y gweill a syniadau gyda staff ar draws y cwrs.

Rhoddwyd cydnabyddiaeth i nifer o gyflawniadau’r myfyrwyr yn ystod y diwrnod olaf. Derbyniodd Grug Owen, myfyrwraig ail flwyddyn, Wobr Dewi Sant am brosiect rhagorol, a ganmolwyd gan y panel beirniadu am ei ymagwedd gysyniadol gref a’i ddefnydd dwyieithog hyderus o ddelwedd a theipograffeg. Cafodd Ethan Entwistle ei gydnabod hefyd am ymrwymiad eithriadol trwy gydol yr wythnos, a dyfarnwyd iddo daith tair wythnos y talwyd amdani i Tsieina, lle bydd yn cynrychioli’r cwrs Dylunio Graffig trwy arddangos gwaith ar draws prifysgolion partner.

Mae’r Wythnos Ddylunio yn parhau i fod yn nodwedd sy’n greiddiol i’r cwrs Dylunio Graffig (BA Anrh), gan atgyfnerthu ymrwymiad y Brifysgol i addysg greadigol sy’n berthnasol yn broffesiynol, sy’n seiliedig ar y diwydiant ac sydd dan arweiniad myfyrwyr.

Gwybodaeth Bellach

Mared Anthony

Swyddog Cyfathrebu a Chysylltiadau Cyhoeddus: Cysylltiadau Cyn-fyfyrwyr   
Cyfathrebu Corfforaethol a Chysylltiadau Cyhoeddus   
E-bost: mared.anthony@pcydds.ac.uk     
Ffôn: +447482256996