Arddangosfa STEM y Drindod Dewi Sant yn tynnu sylw at raddedigion sy'n barod i'r diwydiant a dysgu yn y byd go iawn

Mae Prifysgol Cymru Y Drindod Dewi Sant yn dathlu cyflawniadau ei myfyrwyr blwyddyn olaf yn Arddangosfa STEM eleni ar gampws SA1 y Glannau yn Abertawe, gan ddangos sut mae addysg sy’n canolbwyntio ar ddiwydiant, partneriaethau cyflogwyr a dysgu ymarferol yn helpu graddedigion i sicrhau gyrfaoedd llwyddiannus ar draws y sectorau peirianneg, technoleg, cyfrifiadura a dylunio.

Mae’r arddangosfa flynyddol yn rhoi cyfle i fyfyrwyr gyflwyno prosiectau arloesol, ymchwil ac atebion ymarferol a ddatblygwyd trwy gydol eu hastudiaethau tra’n rhoi mynediad uniongyrchol i gyflogwyr a phartneriaid diwydiant at dalent sy’n dod i’r amlwg.

Yn fwy nag arddangosfa o waith myfyrwyr, mae’r digwyddiad yn tynnu sylw at ymrwymiad y Drindod Dewi Sant i ddarparu profiadau go iawn i fyfyrwyr sy’n eu paratoi ar gyfer gyrfaoedd proffesiynol o’r eiliad y maent yn graddio.

Ar draws y Gyfadran, mae myfyrwyr eisoes yn trosi eu hastudiaethau academaidd i gyfleoedd cyflogaeth trwy leoliadau, interniaethau, prosiectau diwydiant byw a mentrau allgyrsiol.

Yn ddiweddar, derbyniodd Nathan Evans, myfyriwr Peirianneg Fecanyddol, Wobr Sefydliad y Peirianwyr Mecanyddol (IMechE) ac mae wedi sicrhau rôl raddedig gyda Thîm Fformiwla Un Aston Martin, tra bydd y myfyriwr Peirianneg Fecanyddol Harry Rogers yn dechrau ei yrfa raddedig y mis hwn gyda’r arbenigwr ailgynhyrchu modurol yn Llanelli, ATC.

Mae myfyrwyr Peirianneg Chwaraeon Modurol hefyd wedi mwynhau llwyddiant sylweddol. Mae Harvey Levell, o Abertawe, wedi sicrhau swydd raddedig fel Peiriannydd CAD Iau gydag arbenigwr Jaguar SNG Barratt, lle bydd yn dylunio a datblygu cydrannau perfformiad ar gyfer cerbydau clasurol a modern. Yn ystod ei astudiaethau, cyfunodd Harvey ddysgu academaidd â phrofiad ymarferol trwy Dîm Rasio Chwaraeon Modur y Brifysgol a gwaith gyda Martin Stretton Racing, gan ennill profiad gwerthfawr mewn awyrgylch rasio go iawn.

Mae Cameron Andrews, un o raddedigion Peirianneg Chwaraeon Modur, wedi lansio ei fusnes ei hun, CLA Composites, sy’n arbenigo mewn cyd-rannau cyfansawdd ac atgyweiriadau. Trwy ei ymwneud â Thîm Rasio Chwaraeon Modur y Brifysgol, aeth Cameron ymlaen i fod yn Beiriannydd Cyfansawdd Arweiniol; wrth ddatblygu’r sgiliau technegol, arweinyddiaeth a datrys problemau sydd wedi ei helpu i fynd ar drywydd cyfleoedd gydag ystod o gwmnïau.

Teithiodd y fyfyrwraig ryngwladol Hannah Bathgate o Sydney, Awstralia, i astudio Peirianneg Chwaraeon Modurol yn y Drindod Dewi Sant ac mae eisoes wedi sicrhau rôl raddedig gyda’r gwneuthurwr byd-eang Caterpillar. Mae Hannah yn cydnabod amgylchedd dysgu ymarferol y Brifysgol a’r ymwneud â’r Tîm Rasio Motorsport am roi’r sgiliau a’r hyder iddi lwyddo yn y diwydiant.

Mae partneriaethau y Brifysgol â busnesau hefyd yn parhau i greu cyfleoedd ar draws y sectorau digidol a chreadigol. Yn dilyn cydweithrediad diweddar â chwmni logisteg SHIPMAX o Abertawe, mae Kieran Brown, myfyriwr Cyfrifiadura Cymhwysol, wedi mynd o interniaeth i swydd lawn-amser, tra bod y fyfyrwraig Dylunio Graffeg Caitlyn Davis yn parhau i weithio gyda’r cwmni fel dylunydd llawrydd ar ôl ei lleoliad.

Dywedodd Mark Cocks, Deon Athrofa Gwyddoniaeth a Chelf Cymru y Brifysgol: “Mae’r Arddangosfa STEM yn cynrychioli penllanw blynyddoedd o waith caled, creadigrwydd ac arloesedd gan ein myfyrwyr, ond mae hefyd yn dangos rhywbeth llawer mwy, cryfder y partneriaethau yr ydym wedi’u hadeiladu gyda diwydiant a’r cyfleoedd y mae’r rhain yn eu creu i’n graddedigion.

“Nid yw ein myfyrwyr yn dysgu theori yn yr ystafell ddosbarth yn unig. Maent yn cymhwyso eu gwybodaeth trwy brosiectau byw, lleoliadau, interniaethau, cystadlaethau diwydiant, ymchwil a chydweithio â chyflogwyr. Mae’r profiadau hyn yn eu helpu i ddatblygu’r arbenigedd technegol, y sgiliau proffesiynol a’r hyder sydd eu hangen i ffynnu mewn diwydiannau cystadleuol iawn.

“Mae llwyddiant myfyrwyr yn sicrhau cyfleoedd gyda sefydliadau fel Tîm Fformiwla Un Aston Martin, Caterpillar, SNG Barratt, ATC a SHIPMAX yn dangos effaith y dull hwn. Mae cyflogwyr yn dweud wrthym fwyfwy eu bod yn gwerthfawrogi graddedigion sy’n gallu dangos profiad yn y byd go iawn, gallu datrys problemau ac yn meddu ar ymwybyddiaeth o’r diwydiant, a dyna’n union beth mae ein myfyrwyr yn ei ennill trwy gydol eu hamser yn y Drindod Dewi Sant.

“Mae’r arddangosfa yn rhoi cyfle i gyflogwyr, darpar fyfyrwyr a’r gymuned ehangach weld y dalent ryfeddol sy’n dod i’r amlwg o’n campws SA 1 y Glannau yn Abertawe ac effaith go iawn y gwaith y mae ein myfyrwyr yn ei wneud.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071