Cydnabyddir y Drindod Dewi Sant am gynhwysiant cymdeithasol, ansawdd addysgu a phrofiad myfyrwyr yn y Times and Sunday Times Good University Guide

Mae Prifysgol Cymru Y Drindod Dewi Sant (PCYDDS) wedi cael ei chydnabod fel un o brif brifysgolion y DU am ei hymrwymiad cryf i gynhwysiant cymdeithasol, ansawdd addysgu a phrofiad myfyrwyr yn The Times a’r Sunday Times Good University Guide, a gyhoeddwyd heddiw. 

Mae’r safleoedd diweddaraf yn gosod y Drindod Dewi Sant: 

• 1af yng Nghymru ac 2il yng Nghymru a Lloegr ar gyfer Cynhwysiant Cymdeithasol 
• 1af yng Nghymru a’r 4ydd yn y DU am Ansawdd Addysgu
• 1af yng Nghymru a 5ed yn y DU am Brofiad Myfyrwyr

Tynnodd y Canllaw sylw hefyd at foddhad myfyrwyr yn y Brifysgol, gan ddweud: “Mae canlyniadau’r Arolwg Cenedlaethol newydd o fyfyrwyr yn cadarnhau bod gan Brifysgol Cymru Y Drindod Dewi Sant (PCYDDS) fyfyrwyr mwyaf bodlon Cymru, gan gadarnhau ei henw da am ddysgu wedi’i bersonoli sy’n cefnogi myfyrwyr i ffynnu.” 

Mae cyhoeddiad blynyddol The Times and Sunday Times Good University Guide yn asesu prifysgolion ar draws ystod o fesurau, gan gynnwys boddhad myfyrwyr, ansawdd ymchwil, safonau mynediad a rhagolygon graddedigion. 

Mae’r canlyniadau diweddaraf hyn yn atgyfnerthu ymrwymiad y Drindod Dewi Sant i ddarparu profiad addysgol rhagorol wrth ehangu mynediad at addysg uwch i fyfyrwyr o bob cefndir.

Dywedodd y myfyriwr dylunio graffeg, Zheng Jiayi: “Mae pwyslais y Brifysgol ar ddysgu ymarferol, ynghyd â chyfleoedd ar gyfer interniaethau a chysylltiadau â diwydiant, yn paratoi myfyrwyr ar gyfer llwyddiant yn eu meysydd dewisol. Mae bywyd bywiog y campws a’r amgylchedd syfrdanol yn cyfrannu at brofiad myfyrwyr cyfoethog a boddhaol”.

Meddai’r Athro Mirjam Plantinga, Dirprwy Is-Ganghellor Profiad Academaidd yn y Drindod Dewi Sant:

“Rydym yn falch iawn o gael ein cydnabod am ein hymrwymiad i gynhwysiant cymdeithasol, ein rhagoriaeth addysgu ac am ansawdd y profiad I fyfyrwyr yn y Good University Guide. 

“Mae ffocws y Brifysgol bob amser wedi bod ar ddarparu addysgu rhagorol a phrofiad addysgol trawsnewidiol i’n myfyrwyr. Mae eu profiad wrth wraidd y Drindod Dewi Sant ac mae mor braf gweld yr ymrwymiad hwnnw’n cael ei gydnabod yn gyhoeddus”. 

“Mae’r Brifysgol wedi adeiladu enw da am ehangu mynediad at addysg uwch ar draws ein campysau drwy ddarparu llwybrau a chyfleoedd i fyfyrwyr o bob cefndir gyflawni eu potensial ac i elwa o addysg brifysgol. Mae’r gydnabyddiaeth hon yn adlewyrchu ymroddiad, arloesedd ac angerdd ein staff, sydd wedi ymrwymo i sicrhau bod pob myfyriwr yn y Drindod Dewi Sant yn cael ei gefnogi i lwyddo.” 

Mae’r gydnabyddiaeth genedlaethol hon hefyd yn adeiladu ar gyfres o gyflawniadau diweddar y Drindod Dewi Sant, gan gynnwys safle 1af yng Nghymru ac 2il yn y DU yn dadansoddiad The Times a’r Sunday Times o’r Arolwg Cenedlaethol o Fyfyrwyr (ACF) yn ogystal ag yn y Guardian University Guide 2027 a osododd y Drindod Dewi Sant ymhlith y 50 prifysgol orau yn y DU.

Darllenwch y Canllaw Prifysgolion Da llawn 2027 

Dysgwch fwy am y Drindod Dewi Sant a’n hystod eang o opsiynau astudio ac archebwch eich diwrnod agored!

Gwybodaeth Bellach

Eleri Beynon

Pennaeth
Cyfathrebu Corfforaethol a Chysylltiadau Cyhoeddus     
E-bost: e.beynon@pcydds.ac.uk     
Ffôn: 01267 676790