Finley Jones wedi’i Henwi yng Ngharfan Brython Thunder

Mae Finley Jones yn parhau i ragori’n academaidd ac ar y cae rygbi ar ôl cael ei dewis ar gyfer carfan Brython Thunder ar gyfer y tymor sydd ar ddod tra’n astudio Therapi Chwaraeon ac Ymarfer Corff ym Mhrifysgol Cymru Y Drindod Dewi Sant (PCYDDS). 

Wrth fynegi ei chyffro, meddai Finley:                                                                                                    

“Rwy’n gyffrous iawn i gael fy newis ar gyfer Brython Thunder eleni.  Dyma fy nhrydydd tymor gyda nhw ac rwy’n ddiolchgar iawn am y cyfle i fod yn rhan o grŵp mor gryf.”

Mae Brython Thunder yn cystadlu yn yr Her Geltaidd hynod gystadleuol, cynghrair traws-genhedloedd sy’n cynnwys dau dîm o Gymru, dau dîm o Iwerddon a dau dîm o’r Alban.  Mae’r gystadleuaeth yn dod â thalent elitaidd ynghyd o bob rhan o’r gwledydd Celtaidd, gyda phob tîm yn cystadlu ar gyfer teitl yr Her Geltaidd. 

Ochr yn ochr â’i hymrwymiadau rygbi, mae Finley yn ei hail flwyddyn yn astudio Therapi Chwaraeon ac Ymarfer Corff yn PCYDDS. Dewisodd y cwrs oherwydd ei achrediad gyda’r Gymdeithas o Therapyddion Chwaraeon (SST) a’r dosbarthiadau llai sy’n caniatáu dysgu wyneb yn wyneb wedi’i bersonoli.

Ychwanegodd Finley:                     

“Yn bendant, fy hoff ran o’r cwrs yw’r ochr adsefydlu.  Gan fy mod i wedi cael rhai anafiadau gwael fy hun, mae’n ddiddorol iawn ac yn werth chweil helpu eraill i fynd yn ôl i chwarae neu weithredu heb anaf.  Mae astudio ar y cwrs hwn tra’n chwarae rygbi bendant yn helpu, gan fod y ddau’n cyd-fynd â’i gilydd yn dda iawn.”

Mae gradd Therapi Chwaraeon ac Ymarfer Corff yn cynnig profiad ymarferol cynnar, gyda lleoliadau a gwaith clinigol yn dechrau yn ystod y misoedd cyntaf o astudio.  Mae graddedigion yn cymhwyso fel therapyddion chwaraeon achrededig ar ôl tair blynedd, heb angen gradd meistr. 

“Byddwn bendant yn argymell y cwrs.  Mae’r cymorth gan y darlithwyr yn wych, ac mae’r profiad ymarferol rydych yn ei gael yn gynnar ar y cwrs yn amhrisiadwy. 

Meddai Gareth Potter, Pennaeth Rygbi PCYDDS:  

“Mae Finley yn enghraifft ragorol o berson chwaraeon ifanc ymroddedig sy’n gweithio mor galed i gyflawni ei nodau ar y cae ac oddi arno.  Mae wedi goresgyn nifer o anafiadau dros y blynyddoedd diwethaf i ddod yn rhan allweddol o garfan Brython Thunder.  Yn ogystal, mae’n aelod poblogaidd iawn o raglen Rygbi PCYDDS, lle mae’n cael profiad uniongyrchol fel ffisiotherapydd myfyriwr gyda thîm Dynion y Brifysgol.  “Rwy’n siŵr bod ganddi ddyfodol disglair fel chwaraewr a ffisiotherapydd.”

Wrth edrych tua’r dyfodol, mae Finley yn gobeithio cwblhau ei gradd ac adeiladu gyrfa yn yr amgylchedd chwaraeon, gan ddefnyddio ei phrofiad fel chwaraewr i gefnogi ac adsefydlu eraill. 

“Yn y dyfodol, hoffwn i weithio mewn chwaraeon a defnyddio fy nysgu academaidd a’m profiad fel chwaraewyr er mwyn helpu eraill i gyrraedd eu potensial.”

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476