Lydia Perkins yn troi angerdd am ofal yn fenter i’r dyfodol

Bydd Lydia Perkins yn dathlu graddio o gampws Birmingham Prifysgol Cymru Y Drindod Dewi Sant (PCYDDS) y mis hwn ar ôl ennill Anrhydedd Dosbarth Cyntaf mewn BSc Iechyd a Gofal Cymdeithasol.

Ar ôl treulio 17 mlynedd yn gweithio fel gwarchodwr plant, datblygodd Lydia angerdd dros gefnogi eraill a helpu teuluoedd i ffynnu. Wedi’i hysgogi gan ei huchelgais i sefydlu ei busnes byw â chymorth a llety â chymorth ei hun, penderfynodd barhau â’i haddysg ac ennill y wybodaeth a’r sgiliau sydd eu hangen i gamu ymlaen yn y sector iechyd a gofal cymdeithasol.

“Datblygais angerdd cryf dros ofalu am eraill a gwneud gwahaniaeth cadarnhaol ym mywydau pobl,” meddai Lydia. “Wrth i’m diddordebau dyfu ym maes iechyd a gofal cymdeithasol, roeddwn i eisiau ennill cymhwyster cydnabyddedig a fyddai’n cefnogi fy uchelgeisiau i’r dyfodol.”

Dewisodd Lydia y cwrs hwn oherwydd ei ffocws ar arweinyddiaeth, diogelu, gofal sy’n canolbwyntio ar y person, deddfwriaeth, a gwella gwasanaethau, meysydd y mae hi’n credu sy’n hanfodol ar gyfer darparu gwasanaethau gofal o ansawdd uchel.

Trwy gydol ei hastudiaethau, archwiliodd bynciau sy’n uniongyrchol berthnasol i’w nodau gyrfa, gan gynnwys arweinyddiaeth effeithiol mewn lleoliadau gofal, diogelu unigolion agored i niwed, hyrwyddo annibyniaeth, a deall y safonau rheoleiddio sy’n ofynnol o fewn gwasanaethau byw â chymorth.

Un o’r heriau mwyaf a wynebodd Lydia oedd cydbwyso ei hastudiaethau ochr yn ochr ag ymrwymiadau gwaith a phersonol. Trwy ei phenderfyniad a chynllunio a threfnu gofalus, llwyddodd i reoli ei llwyth gwaith wrth gynnal safonau academaidd uchel.

“Gwnaeth y cwrs fy herio i feddwl yn feirniadol, cynnal ymchwil annibynnol a myfyrio ar arfer proffesiynol,” meddai. “Roedd ennill anrhydedd dosbarth cyntaf yn foment falch ac yn adlewyrchu’r ymrwymiad a’r ymdrech a neilltuais i’m hastudiaethau.”

Cred Lydia bod y rhaglen wedi cryfhau ei gwybodaeth broffesiynol a’i hyder personol.

“Mae wedi gwella fy nealltwriaeth o arfer iechyd a gofal cymdeithasol, arweinyddiaeth a darparu gwasanaethau, tra hefyd yn cynyddu fy hyder yn fy ngallu i gyflawni nodau uchelgeisiol,” meddai.

Ar ôl graddio, mae Lydia yn bwriadu parhau â’i datblygiad proffesiynol wrth weithio tuag at sefydlu ei busnes byw â chymorth a llety â chymorth ei hun.

“Rwy’n gobeithio defnyddio’r wybodaeth a’r sgiliau a gefais drwy’r cwrs i greu gwasanaethau o ansawdd uchel sy’n hyrwyddo annibyniaeth, urddas a chanlyniadau cadarnhaol i’r unigolion rwy’n eu cefnogi.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071