O Rwmania i Gymru: Taith ysbrydoledig Nicoleta i helpu pobl ifanc

Mae Nicoleta Dinu yn graddio o’r  BSc mewn Iechyd a Gofal Plant a Phobl Ifanc yr  wythnos hon ym Mhrifysgol Cymru Y Drindod Dewi Sant. 

Gadawodd Nicoleta ei mamwlad yn Rwmania i ddilyn cyfleoedd addysgol yng Nghymru a dechrau newydd.

Dywedodd: “Wrth dyfu i fyny yn Rwmania fel yr ieuengaf o bedwar o blant, fe wnes i wynebu adfyd sylweddol yn gynnar, gan golli fy nhad yn bedair oed a fy mam yn ystod fy arddegau. Yn hytrach na chaniatáu i’r colledion hyn fy niffinio, defnyddiais y profiadau hynny i adeiladu gwytnwch a dyfnhau fy empathi i bobl ifanc sy’n wynebu amgylchiadau anodd. Dewisais sianelu’r profiad hwnnw i rywbeth ystyrlon.”

Cyn symud i Gymru, roedd Nicoleta eisoes wedi mwynhau gyrfa o ddwy flynedd ar bymtheg ym maes gwerthu a gofal cwsmeriaid, gan gyrraedd lefelau cydlynydd a rheolydd gwerthiant uwch ond roedd ganddi ddyheadau i ehangu ei gorwelion ac adeiladu gyrfa newydd.

Dywedodd: “Pan symudais i’r DU, dechreuais o’r newydd, gan ddysgu iaith newydd, addasu i ddiwylliant gwahanol, ac ailadeiladu fy hunaniaeth broffesiynol mewn amgylchedd anghyfarwydd.

“Daeth addysg yn drobwynt i mi, gan ddangos nad yw byth yn rhy hwyr i ailgyfeirio eich bywyd gyda phwrpas a dewrder” 

Mae Nicoleta, sy’n byw yng Nghas Newydd ond yn symud i Abertawe ym mis Medi, yn llawn balchder wrth iddi raddio o gampws y Brifysgol yn Abertawe ac mae’n edrych ymlaen at ddechrau’r MSc mewn Seicoleg Gymhwysol, gan ddechrau ym mis Hydref 2026. 

Dywedodd: “Rwy’n anelu at weithio ym maes iechyd meddwl ieuenctid ac ymyrraeth gynnar oherwydd rwy’n deall, o brofiad byw, sut y gall y gefnogaeth gywir ar yr adeg iawn drawsnewid bywyd person ifanc”.

Wrth iddi barhau i hyrwyddo iechyd a llesiant pobl ifanc, mae ei gweledigaeth yn cael ei chrynhoi mewn cred syml ond grymus: “Myfyrwyr iach, dyfodol iach, cymdeithas iach.”

Gwybodaeth Bellach

Eleri Beynon

Pennaeth
Cyfathrebu Corfforaethol a Chysylltiadau Cyhoeddus     
E-bost: e.beynon@pcydds.ac.uk     
Ffôn: 01267 676790