Partneriaeth ymchwil yn dilysu technoleg orthoteg arloesol a wneir ar fesur y claf ar yr un diwrnod

Mae astudiaeth ATiC yn canfod bod system orthoteg ar fesur y claf yn darparu gwell cysur ochr yn ochr â pherfformiad biomecanyddol effeithiol 

Mae partneriaeth ymchwil rhwng Canolfan Arloesi Technolegau Cynorthwyol (ATiC) ym Mhrifysgol Cymru Y Drindod Dewi Sant a Kaydiar Ltd wedi cyrraedd carreg filltir bwysig ar ôl i astudiaeth annibynnol ddangos effeithlonrwydd a chysur system orthoteg ar fesur y claf ar yr un diwrnod. 

Gwerthusodd yr astudiaeth dechnoleg PROmorph Kaydiar, sy’n galluogi orthosau wedi’u haddasu i gael eu cynhyrchu’n gyflym mewn lleoliadau clinigol gan ddefnyddio proses mowldio thermol arloesol.  Ar wahân i ddulliau gweithgynhyrchu traddodiadol, sydd fel arfer yn gofyn am argraffiadau traed, castiau plastr a chamau cynhyrchu lluosog, mae gan y system PROmorph y potensial i gyflwyno orthosis ar fesur y claf yn ystod un apwyntiad clinigol. 

Gan ddefnyddio cyfleusterau symudiad dynol uwch a pherfformiad mesur ATiC, asesodd ymchwilwyr y perfformiad biomecanyddol a phrofiad defnyddiwr o’r orthosau PROmorph yn erbyn orthosau ar fesur y claf  a gafodd ei weithgynhyrchu gan ddefnyddio dulliau traddodiadol a mewnwadnau esgidiau safonol. 

Roedd yr astudiaeth yn cynnwys dadansoddiadau manwl o gerddediad cyfranogwyr iach, gan ymgorffori mesuriadau plât grym, cipio symudiad, mapio pwysau traed ac adborth defnyddwyr. Dangosodd canlyniadau bod yr orthosau PROmorph yn ailddosbarthu pwysau’n effeithiol ar draws y droed gan gynnal patrymau cerdded naturiol.  Yn ogystal, graddiodd cyfranogwyr yr orthosau PROmorph fel yr opsiwn mwyaf cyfforddus a brofwyd. 

Mae ATiC wedi cwblhau gwerthusiad defnyddioldeb ffurfiannol gyda phodiatryddion ym Mwrdd Iechyd Hywel Dda ochr yn ochr â’r astudiaeth effeithlonrwydd ac mae’n parhau i gefnogi’r prosiect trwy baratoi ar gyfer gwerthusiad defnyddioldeb cyfunol o’r prototeip terfynol.   Gyda’i gilydd, mae’r astudiaethau hyn yn helpu i adeiladu’r sylfaen dystiolaeth sydd ei hangen i gefnogi masnacheiddio a mabwysiadu clinigol yn y dyfodol. 

Mae’r gwaith yn ffurfio rhan o gydweithrediad ehangach a ariannir gan Innovate UK sy’n cynnwys Kaydiar, ATiC, Sefydliad TriTech (Bwrdd Iechyd Prifysgol Hywel Dda), CBM Cymru (PCYDDS) a CPI.  Mae’r consortiwm sy’n dod ag arbenigedd mewn arfer clinigol, ailsefydlu, biomecaneg, datblygu cynnyrch ac arloesi masnachol ynghyd, yn helpu i gyflymu’r broses o ddatblygu technolegau orthoteg cyflym ar gyfer gofal iechyd. 

Meddai David Barton, Rheolwr Gyfarwyddwr Kaydiar: 

“Rydym wrth ein boddau gyda chanlyniadau’r cydweithrediad hwn gydag ATiC.  Gyda’n gilydd, rydym wedi profi nad oes rhaid i bresgripsiynau orthoteg ar fesur y claf gymryd misoedd i wneud neu gostio ffortiwn.  Gallem bellach haneru’r gost a chyflwyno presgripsiwn yr un diwrnod, o’r apwyntiad cyntaf i’r cynnyrch terfynol.  Mae hyn yn ddatblygiad arloesol i’r sectorau podiatreg ac orthoteg, ac rydym yn gyffrous i barhau i wthio ffiniau’r hyn sy’n bosibl mewn partneriaeth ag ATiC a’r GIG.”

Meddai Dr Yajie Zhang, Arweinydd Ymchwil yn ATiC:

“Mae’r prosiect yn dangos gwerth cyfuno datblygu cynnyrch arloesol gyda gwerthusiad annibynnol trylwyr.  Ychydig iawn o astudiaethau o ddylunio orthoteg wedi dod â dadansoddiad cinetig a cinemateg, mapiau pwysau, ac adborth defnyddwyr ynghyd mewn un gwerthusiad, ond dyna’n union beth rydyn ni wedi’i gyflawni.  Yn ogystal, mae ein cyfleusterau wedi ein caniatáu i addasu’r amgylchedd profi a chynnal y broses fowldio ar y safle, gan wneud y gwerthusiad yn gynhwysfawr ac yn ymarferol.   Rwy’n gyffrous i weld sut mae’r dechnoleg yn parhau i ddatblygu a’r effaith y gellir ei chael mewn arfer clinigol.”

Meddai Shelly Doolan, Rheolwr Prosiect ATiC:

“Mae ein cydweithrediad â Kaydiar yn enghraifft ardderchog o sut mae ATiC yn helpu partneriaid yn y diwylliant i gyflymu arloesedd mewn iechyd a llesiant.  Trwy ddarparu cyfleusterau arbenigol, arbenigedd ymchwil a gwerthusiad annibynnol, rydym wedi cefnogi pob cam datblygiad, o brofi defnyddioldeb i ddadansoddiad biomecanyddol manwl.  Mae’r astudiaeth ddiweddaraf yn garreg filltir bwysig, ac rydym yn edrych ymlaen at barhau ein gwaith gyda Kaydiar, wrth i’r dechnoleg symud tuag at ei gwerthusiad terfynol a’i mabwysiadu clinigol yn y dyfodol.”

Cefnogi Arloesi Trwy Bartneriaeth

Mae ATiC yn gweithio gyda sefydliadau academaidd, diwylliant, iechyd, gofal cymdeithasol, a’r trydydd sector i ddatblygu technolegau a gwasanaethau sy’n gwella iechyd a llesiant.  Wrth gyfuno dylunio sy’n canolbwyntio ar y defnyddiwr gyda thechnegau mesur ffisiolegol a pherfformiad gwrthrychol, mae’r ganolfan yn helpu sefydliadau i gynhyrchu’r dystiolaeth sydd ei hangen i ddod â chynhyrchion arloesol i’r farchnad. 

Ynglŷn ag ATiC

Mae Canolfan Arloesi Technolegau Cynorthwyol (ATiC) ym Mhrifysgol Cymru Y Drindod Dewi Sant yn cefnogi ymchwil, arloesi, datblygu cynnyrch a gwerthuso ar draws y sectorau iechyd, llesiant a thechnoleg gynorthwyol.  Mae ATiC sydd wedi’i leoli yn Abertawe yn darparu cyfleusterau arbenigol ar gyfer gwerthuso defnyddioldeb, dadansoddi ymddygiad dynol, asesu symudiadau, prototeipio a datblygu technoleg. 

Ynglŷn â Kaydiar

Kaydiar Ltd yw datblygwr y system orthoteg PROmorph, technoleg arloesol sy’n galluogi darpariaeth orthoteg ar fesur y claf trwy broses fowldio thermal a ddarperir yn uniongyrchol mewn lleoliadau clinigol. 

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071