Sefydliad Brenhinol Athroniaeth a Phartneriaid Lleol - Y Drindod Dewi Sant a 4theRegion - yn cyflwyno ‘Hot Potato Talks: Growing Thought with Growing Food’
Bydd Prifysgol Cymru Y Drindod Dewi Sant (UWTSD), mewn partneriaeth â’r Sefydliad Brenhinol Athroniaeth a phartneriaid cymunedol lleol, yn cynnal digwyddiad Sgyrsiau Tatws Poeth arbennig o’r enw “Growing Thought with Growing Food” yn Ysgol Gynradd y Clase yn Abertawe ddydd Gwener 24 Ebrill 2026.
Bydd y digwyddiad yn dod â phlant, addysgwyr, ymchwilwyr ac aelodau’r gymuned ynghyd i archwilio’r cysylltiad pwerus rhwng tyfu bwyd a meithrin meddyliau iach.
Rhan o gydweithrediad parhaus Prifysgol Cymru Y Drindod Dewi Sant â’r Sefydliad Brenhinol Athroniaeth, mae’r gyfres Sgyrsiau Tatws Poeth yn annog trafodaeth feddylgar am y rôl y mae bwyd yn ei chwarae yn ein bywydau, ein cymunedau a’n lles. Mae digwyddiadau blaenorol yn y gyfres wedi dod â thyfwyr, athronwyr ac aelodau’r cyhoedd ynghyd i fyfyrio ar werth cymdeithasol, moesegol a diwylliannol bwyd.
Wedi’i gynnal yn Ysgol Gynradd Clase, bydd digwyddiad eleni yn rhoi plant wrth wraidd y sgwrs, gan dynnu sylw at sut y gall tyfu bwyd mewn ysgolion gefnogi lles, dysgu ac ymgysylltu cymunedol.
Bydd y digwyddiad yn cynnwys cyfraniadau gan Jessie Kidd, Emma North ac Eva, ochr yn ochr â disgyblion o Ysgol Gynradd Clase. Gyda’i gilydd byddant yn rhannu profiadau a mewnwelediadau ynghylch sut y gall gerddi ysgol a phrosiectau tyfu bwyd ysbrydoli chwilfrydedd, annog bwyta’n iach a chefnogi lles emosiynol.
Mae “Growing Thought with Growing Food” yn archwilio’r cysylltiad hanfodol rhwng meithrin bwyd a meithrin meddyliau iach,” eglurodd trefnydd y digwyddiad, Dr Rebekah Humphreys. “Drwy ddod â phlant, addysgwyr ac arbenigwyr ynghyd, rydym yn gobeithio sbarduno sgyrsiau ystyrlon am bwysigrwydd bwyd, lles, a’r amgylchedd.”
Mae’r digwyddiad yn rhan o’r rhaglen ehangach o weithgareddau athroniaeth ac ymgysylltu cyhoeddus a gefnogir gan Y Drindod Dewi Sant, sy’n anelu at ddod â meddwl athronyddol i gymunedau a phrofiadau bob dydd. Mae’r mentrau hyn yn creu cyfleoedd i bobl o bob oed archwilio cwestiynau a syniadau pwysig gyda’i gilydd.
Yn dilyn y sgyrsiau, gwahoddir y mynychwyr i barhau â’r sgwrs dros ginio a rhwydweithio, gan greu lle i aelodau’r gymuned, addysgwyr ac ymchwilwyr gysylltu a rhannu syniadau.
Mae lleoedd ar gyfer y digwyddiad yn gyfyngedig a rhaid eu harchebu ymlaen llaw.
Manylion y Digwyddiad
‘Hot Potato Talks: Growing Thought with Growing Food’
📅 Dydd Gwener 24 Ebrill 2026
🕙 10:00am – 1:30pm
📍 Ysgol Gynradd Clase, 88 Rhodfa Rheidol, Clase, Abertawe, SA6 7JX
Bydd y digwyddiad yn dod i ben gyda chinio a chyfle i rwydweithio a thrafodaeth anffurfiol. Cyrhaeddwch mewn pryd ar gyfer dechrau prydlon am 10am. Parcio ar y stryd yn unig.
I fynychu, gallwch archebu eich lle drwy’r ddolen gofrestru yma - Hot Potato Talks: Growing Thought with Growing Food – Fill in form
.
Gwybodaeth Bellach
Arwel Lloyd
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: arwel.lloyd@pcydds.ac.uk
Ffôn: 07384 467076