Un o raddedigion MBA PCYDDS yn anelu am yrfa arweinyddiaeth mewn recriwtio byd-eang

Mae angerdd am arweinyddiaeth a busnes rhyngwladol wedi arwain Himanshu Rajput, myfyriwr o Lundain, i raddio gydag MBA mewn Busnes Rhyngwladol o Brifysgol Cymru Y Drindod Dewi Sant (PCYDDS) heddiw.

Yn wreiddiol o India, symudodd Himanshu, sy’n 27 oed, i’r DU ar ôl treulio mwy na phedair blynedd yn gweithio ym maes recriwtio, caffael talent a gwasanaeth cwsmeriaid.  Yn awyddus i ehangu ei feddwl strategol a datblygu ei sgiliau arweinyddiaeth, dewisodd astudio ar gampws Llundain PCYDDS.

 “Roeddwn i eisiau mynd â fy ngyrfa i’r lefel nesaf a chael dealltwriaeth ddyfnach o sut mae busnesau’n gweithredu ac yn tyfu’n rhyngwladol”, meddai Himanshu. “Roedd ymagwedd ymarferol PCYDDS at ddysgu, ynghyd â’i darlithwyr cefnogol a chymuned o fyfyrwyr amrywiol, yn ei gwneud yn ddewis perffaith.”

Trwy gydol y cwrs, roedd Himanshu yn mwynhau’n arbennig cydweithio â chyd-ddisgyblion o ystod o gefndiroedd diwylliannol a phroffesiynol, yn ogystal â chymhwyso damcaniaeth i heriau busnes go iawn trwy astudiaethau achos, prosiectau grŵp a’r traethawd hir.

Canolbwyntiodd ei ymchwil ar rôl gynyddol Deallusrwydd Artiffisial wrth recriwtio o fewn sefydliadau sy’n seiliedig ar brosiectau, gan archwilio’r cyfleoedd y mae AI yn eu cyflwyno ar gyfer gwella effeithlonrwydd hurio a’r ystyriaethau moesegol sy’n ymwneud â thegwch a rhagfarn.

Roedd cydbwyso ymrwymiadau gwaith ochr yn ochr â’i astudiaethau wrth addasu i fywyd mewn gwlad newydd yn cyflwyno heriau, ond mae Himanshu yn dweud mai rheoli amser yn ofalus, gwytnwch a phenderfyniad a helpodd iddo lwyddo.

Dywedodd: “Mae’r MBA wedi trawsnewid y ffordd rwy’n edrych ar strategaeth, arweinyddiaeth a gwneud penderfyniadau. Yn bersonol, mae byw ac astudio yn y DU hefyd wedi rhoi hwb i fy hyder, cryfhau fy sgiliau cyfathrebu ac wedi fy helpu i ddod yn fod hyblyg.”

Ar ôl graddio, mae Himanshu yn bwriadu parhau i ddatblygu ei yrfa mewn caffael a recriwtio talent, gan gyfuno ei brofiad proffesiynol â’r wybodaeth fusnes strategol a gafwyd trwy ei MBA. Ei uchelgais hirdymor yw symud ymlaen i rôl arweinyddiaeth, gan helpu sefydliadau i adeiladu timau perfformiad uchel tra’n cael effaith gadarnhaol ar fusnesau a’u pobl.

Mae’n annog eraill sy’n ystyried astudiaeth ôl-raddedig i ddilyn yr un llwybr. “Byddwn yn argymell yr MBA hwn i unrhyw un sydd eisiau tyfu’n broffesiynol ac yn bersonol. Mae’n darparu dealltwriaeth gref o fusnes byd-eang, yn datblygu meddwl beirniadol ac yn eich arfogi â sgiliau ymarferol sy’n werthfawr ar draws ystod eang o ddiwydiannau.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071