Un o raddedigion y Drindod Dewi Sant yn gwneud gradd Plismona Proffesiynol er cof am ei rhieni

Mae myfyriwr graddedig o Sir Gaerfyrddin a oresgynnodd colli ei dau riant wrth astudio wedi dathlu graddio o Brifysgol Cymru Y Drindod Dewi Sant (PCYDDS) gyda gradd mewn Plismona Proffesiynol.

Dewisodd Tanith Coulson, sy’n bump ar hugain oed, astudio yn y Drindod Dewi Sant i ddatblygu ei gwybodaeth a’i sgiliau, ennill cymhwyster cydnabyddedig ac agor cyfleoedd gyrfa yn y dyfodol. Wedi’i hysbrydoli gan ei hastudiaethau Safon Uwch mewn Troseddeg a diddordeb hirsefydlog yn y system cyfiawnder troseddol, cofrestrodd ar raglen Plismona Proffesiynol y Brifysgol.

Trwy gydol ei hastudiaethau, cafodd Tanith brofiad ymarferol gwerthfawr, gan gynnwys gwirfoddoli yn y Pwynt Cymorth ar Stryd y Gwynt Abertawe, lle bu’n gweithio ochr yn ochr â swyddogion yr heddlu a’r gwasanaethau brys, a chyfweld ag arbenigwr yr heddlu fel rhan o’i hymchwil traethawd hir.

Fodd bynnag, roedd ei thaith prifysgol wedi’i nodi gan golled bersonol ddwfn. Ar ôl colli ei mam yn 17 oed, gohiriodd Tanith fynd i’r brifysgol cyn cofrestru yn y Drindod Dewi Sant yn y pen draw. Yn ystod ei thrydedd flwyddyn, collodd ei thad hefyd, gan wneud cwblhau ei gradd yn gyflawniad mwy fyth.

Dywedodd Tanith: “Pan ddechreuais fy ngradd, un o’m cymhellion mwyaf oedd ei chwblhau er cof am fy mam. Doeddwn i erioed wedi dychmygu y byddwn i’n ei wneud er cof am fy nhad hefyd erbyn diwedd fy nhaith prifysgol.

“Roedd cydbwyso gwaith, astudiaethau, a galar yn eithriadol o anodd, ond ni allwn fod wedi gwneud hynny heb gefnogaeth fy narlithwyr a’m ffrindiau. Fe wnaeth eu hanogaeth fy helpu i dal ati drwy fy nhraethawd hir, arholiadau, ac aseiniadau terfynol er mwyn i mi allu graddio. Colli fy nau riant yn ystod  fy nhaith addysg fu’r her anoddaf i mi ei hwynebu erioed, a dyna pam rydw i’n hynod o falch o fod wedi graddio.”

Canmolodd Tanith y gefnogaeth a gafodd gan staff academaidd a’r cyfleoedd a ddarparodd y cwrs.

Dywedodd: “Mae’r cwrs wedi fy helpu i ddod yn fwy hyderus a gwella fy sgiliau cyfathrebu. Rhoddodd hefyd gyfleoedd i mi ddatblygu fy ngalluoedd arweinyddiaeth, cryfhau fy sgiliau rheoli amser, ac adeiladu perthnasoedd cadarnhaol ag eraill. Mae’r profiadau hyn wedi gwneud i mi deimlo’n llawer mwy parod ar gyfer cyfleoedd gyrfa yn y dyfodol.”

Mae Tanith bellach yn bwriadu defnyddio’r wybodaeth a’r sgiliau a gafodd yn y Drindod Dewi Sant wrth iddi ddechrau cam nesaf ei gyrfa.

Ychwanegodd: “Am amser hir, fy ffocws oedd gorffen y brifysgol, yn enwedig ar ôl colli fy nhad. Ar adegau doeddwn i ddim yn meddwl y byddwn i’n gallu ei wneud. Wyth mis yn ddiweddarach, gallaf ddweud yn falch fy mod wedi gwneud hynny – fe wnes i raddio. Rydw i wedi mwynhau fy amser yn y Drindod Dewi Sant, rwy’n ddiolchgar am yr holl gyfleoedd, ac edrychaf ymlaen at bennod nesaf fy mywyd.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071