Jenny Day

Ar gyfer y prosiect ‘Gutun Owain: Bardd y ffin a Dyn y Dadeni’, mae Jenny yn golygu cerddi Gutun Owain ac yn astudio natur ei ysgolheictod a’i gysylltiadau â’i noddwyr dysgedig, er mwyn archwilio rôl gogledd-ddwyrain Cymru ac ardal Croesoswallt yn natblygiad y Dadeni Dysg yng Nghymru. Gweithiodd ar sawl prosiect cynharach yn y Ganolfan. Yn fwyaf diweddar, bu’n golygu cerddi darogan a briodolir i Fyrddin, o’r oesoedd canol diweddar a’r cyfnod modern cynnar, ac yn astudio eu harwyddocâd ar gyfer prosiect ‘Barddoniaeth Myrddin’ <myrddin.cymru>. Fel aelod o dîm y prosiect ‘Tirweddau Sanctaidd’, cyn hynny, bu’n golygu’r cerddi a ganodd Gutun Owain i ddau o abadau Glyn y Groes, gan archwilio’r hyn y mae’r farddoniaeth yn ei ddweud wrthym am yr abaty Sistersaidd pwysig hwn. Gweithiodd cyn hynny ar y prosiectau ‘Cwlt y Seintiau yng Nghymru’, ‘Llif a Llifogydd’ a ‘Barddoniaeth Guto’r Glyn’, a bu’n aelod o dîm golygyddol Geiriadur Prifysgol Cymru.