Arddangosfa Minecraft Drochol yn dod â Dysgu Cynhwysol yn Fyw yn PCYDDS

Cynhaliodd Prifysgol Cymru Y Drindod Dewi Sant (PCYDDS) Arddangosfa Minecraft Drochol, gan ddod â disgyblion, myfyrwyr a staff at ei gilydd i archwilio sut y gall technolegau trochol gefnogi profiadau dysgu cynhwysol a diddorol.

Cyflwynwyd y digwyddiad mewn cydweithrediad â’r Athrofa Addysg a’r Dyniaethau, Ysgol Fusnes Abertawe, tîm Profiad ac Ymgysylltu Digidol a Bantani Cymru, gyda chefnogaeth tîm Recriwtio ac Allgymorth PCYDDS.

Arddangosodd disgyblion ag anghenion dysgu ychwanegol o bob rhan o Abertawe eu “mannau dysgu delfrydol”, a ddatblygwyd gan ddefnyddio Minecraft. Cyflwynwyd eu dyluniadau yn ystafell drochi’r Brifysgol, gan ganiatáu i ddisgyblion gamu i mewn a rhannu eu syniadau mewn ffordd weledol a rhyngweithiol iawn.

Yn ogystal â’r arddangosfa, cymerodd disgyblion ran mewn gweithdai realiti rhithwir, gan ddefnyddio cymwysiadau rhyngweithiol i fagu hyder a sgiliau cydweithredu a gwneud penderfyniadau.

Chwaraeodd myfyrwyr o’r rhaglen Astudiaethau Addysg: Anghenion Dysgu Ychwanegol a Chynhwysiant ran weithredol wrth gefnogi’r diwrnod, gan weithio ochr yn ochr â disgyblion a helpu i hwyluso sesiynau.

Meddai Laura Hutchings, Arweinydd Digidol yr Athrofa Addysg a’r Dyniaethau: “Roedd yn wych cynnwys ein myfyrwyr yn y digwyddiad. Rhoddodd brofiad ymarferol gwerthfawr iddynt o weithio gyda disgyblion a defnyddio technoleg mewn lleoliad byd go iawn, sydd mor bwysig i’w datblygiad fel ymarferwyr y dyfodol.”

Ychwanegodd Glyn Jenkins, Rheolwr Profiad ac Ymgysylltu Digidol: “Roedd yn wych gweld dysgwyr o ystod mor amrywiol o gefndiroedd yn defnyddio’r ystafell drochi.Dyma un o nifer o enghreifftiau o’r modd y gellir defnyddio’r gofod i gefnogi ymgysylltu dinesig ystyrlon.”

Meddai Robyn Griffiths, Rheolwr Rhaglen yn Ysgol Fusnes Abertawe: “Yr hyn oedd yn sefyll allan oedd y modd y gwnaeth y gofod eu helpu i gamu y tu hwnt i’r ffiniau sy’n gyfforddus iddynt a dechrau ymgysylltu â dysgu ar eu telerau eu hunain.”

Dywedodd athro o Ysgol Llandeilo Ferwallt: “Roedd yn ddiwrnod anhygoel ac ysbrydoledig. Roedd y disgyblion yn teimlo eu bod yn cael eu croesawu a’u cefnogi’n llawn, ac roedd brwdfrydedd y staff am eu gwaith wedi creu gwir argraff ar bawb.”

Mae’r digwyddiad yn tynnu sylw at y modd y gall technolegau trochi greu cyfleoedd cynhwysol a hygyrch i ddysgwyr fynegi eu syniadau, magu hyder a datblygu sgiliau allweddol mewn ffyrdd diddorol ac ystyrlon. Mae hefyd yn atgyfnerthu ffocws PCYDDS ar ddysgu yn y byd go iawn, gan gysylltu dysgwyr ar bob lefel â’r offer, y profiadau a’r gefnogaeth sydd eu hangen i baratoi ar gyfer astudio yn y dyfodol, cyflogaeth a chyfranogiad ehangach mewn cymdeithas.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071